ନୂଆଦିଲ୍ଲୀ : ବାଂଲାଦେଶରୁ ଏକ ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଏଥିରେ ଦେଖିବାକୁ ମିଳୁଛି, ଏକ ବଡ଼ ଜାହଜ ତଳକୁ ଚାଲି ଆସିଥିବା ଏକ ଛୋଟ ଡଙ୍ଗା ଦୁର୍ଘଟଣାଗ୍ରସ୍ତ ହୋଇ ନଦୀ ପାଣିରେ ବୁଡ଼ି ଯାଉଛି । ଏହି ଦୁର୍ଘଟଣାରେ ପ୍ରାୟ ୬ ଜଣ ଲୋକଙ୍କ ମୃତ୍ୟୁ ଘଟିଥିବା ବେଳେ ୧୦୦ରୁ ଅଧିକ ଲୋକ ନିଖୋଜ ଅଛନ୍ତି । ଯାତ୍ରୀରେ ଭରପୂର ଏହି ନୌକା କାର୍ଗୋ ଜାହଜରେ ଧକ୍କା ହୋଇଥିଲା ।
ଏହି ଦୁର୍ଘଟଣା ଢାକା ନିକଟସ୍ଥ ଶୀତାଲକ୍ଷ୍ୟା ନଦୀରେ ଘଟିଛି । ସୂଚନା ଅନୁଯାୟୀ, ବଡ଼ ଜାହଜ କିପରି ଛୋଟ ଡଙ୍ଗାକୁ କିଛି ମିଟର ପର୍ଯ୍ୟନ୍ତ ଟାଣି ନେଇ ଯାଉଛି, ଯାହାର କିଛି କ୍ଷଣ ପରେ ଡଙ୍ଗାଟି ଓଲଟି ପଡ଼ୁଛି ଏବଂ ଦେଖୁ ଦେଖୁ ପାଣିରେ ବୁଡ଼ି ଯାଉଛି । କିଛି ଲୋକ ଡଙ୍ଗା ଓଲଟିବା ପୂର୍ବରୁ ନିଜ ଜୀବନ ବଞ୍ଚାଇବା ପାଇଁ ନଦୀକୁ କୁଦି ପଡ଼ିଥିଲେ । ତେବେ ଡଙ୍ଗାଟି ବୁଡ଼ିଯିବା ପରେ ହିଁ ଜାହଜ ଅଟକୁଥିବା ଭିଡିଓରେ ଦେଖିବାକୁ ମିଳୁଛି । ଦୁର୍ଘଟଣା ସମୟରେ ଏହି ଭିଡିଓକୁ ଅନ୍ୟ ଏକ ଜାହଜର ଯାତ୍ରୀମାନେ ସେମାନଙ୍କ କ୍ୟାମେରାରେ କଏଦ କରି ନେଇଥିଲେ । ଯେତେବେଳେ ଜାହଜ ତଳେ ଡଙ୍ଗାଟି ଆସି ମାଡ଼ ହେଉଛି, ତ ଲୋକମାନେ ଜୋର୍ରେ ଚିଲ୍ଲାଉ ଥିବା ଶୁଣିବାକୁ ମିଳୁଛି ।
