ବଳଙ୍ଗା : ଅଦିନିଆ କାଳବୈଶାଖୀ ବଳଙ୍ଗା ଅଞ୍ଚଳରେ ତାଣ୍ଡବ ରଚିଛି । ଶୁକ୍ରବାର ସକାଳେ ସବୁକିଛି ସ୍ୱାଭାବିକ ରହିଥିବା ବେଳେ ସକାଳ ୯ଟାରେ ହଠାତ୍ ପ୍ରବଳ ଘଡ଼ଘଡ଼ି ସାଙ୍ଗକୁ କୁଆପଥର ବର୍ଷା ସହ ପ୍ରବଳ ବେଗରେ ପବନ ବହିଥିଲା । ପବନର ବେଗ ଏତେ ତୀବ୍ର ଥିଲା ଯେ ବଳଙ୍ଗା ନିକଟସ୍ଥ ଚନ୍ଦ୍ରାଦେଈପୁର ପରିଡ଼ା ସାହି ଗ୍ରାମର ବିଭୀଷଣ ପରିଡ଼ାଙ୍କ କୁକୁଡ଼ା ଫାର୍ମ ସମ୍ପୂର୍ଣ୍ଣ ଧରାଶାୟୀ ହୋଇଯାଇଥିଲା । ଫଳରେ ଆଜବେଷ୍ଟସ୍ ଚାପି ହୋଇ ଫାର୍ମ ଭିତରେ ଥିବା ୨ ହଜାରରୁ ଊର୍ଦ୍ଧ୍ୱ କୁକୁଡ଼ା ସମ୍ପୂର୍ଣ୍ଣ ମରିଯାଇଥିଲେ ।
କୁକୁଡ଼ାଗୁଡ଼ିକ ବିକ୍ରି ଉପଯୋଗୀ ହୋଇସାରିଥିଲାବେଳେ ଏଭଳି ଘଟଣା ନେଇ ବିଭୀଷଣ ଦୁଃଖରେ ସମ୍ପୂର୍ଣ୍ଣ ଭାଙ୍ଗିପଡ଼ିଛନ୍ତି । ସେହିଭଳି ବଡ଼ନିନିଗାଁ ସରସ୍ୱତୀ ବିଦ୍ୟାମନ୍ଦିରର ଶ୍ରେଣୀଗୃହର ଆଜବେଷ୍ଟସ ସମ୍ପୂର୍ଣ୍ଣ ଉଡ଼ିଯାଇ ଛିନଛତ୍ର ହୋଇଯାଇଛି । ବଳଙ୍ଗା ଡାକ୍ତରଖାନା ପରିସରରେ ଥିବା ଏକ ବିରାଟକାୟ କୃଷ୍ଣଚୂଡ଼ା ଗଛ ଉପୁଡ଼ି ପଡ଼ିଥିଲାବେଳେ ବିଭିନ୍ନ ସ୍ଥାନରେ ଅନେକ ଗଛ ଉପୁଡ଼ିଯିବା ସହ ଅନେକ ସ୍ଥାନରେ ଲୋକଙ୍କ ଚାଳଘରର ଛପର ନଷ୍ଟ ହୋଇଯାଇଛି ।
