ପୁରୀ : ପ୍ରଚଣ୍ଡ ଖରା ଓ ଲଗାଣ ବର୍ଷାରେ ଦହଗଞ୍ଜ ହେଉଛନ୍ତି ଭକ୍ତ, ଶ୍ରଦ୍ଧାଳୁ ଓ ପୁରୀବାସୀ । କେବଳ ସିଂହଦ୍ଵାର ଦେଇ ପ୍ରବେଶ କରି ମହାପ୍ରଭୁଙ୍କ ଦର୍ଶନ ବ୍ୟବସ୍ଥା ହୋଇଥିବାରୁ ଦିନକୁ ଦିନ ଲମ୍ବା ଲାଇନ୍ ବଢିବାରେ ଲାଗିଛି । ରଥଯାତ୍ରା ପରେ ଚାରିଦ୍ବାର ଖୋଲିବା ନେଇ ଗତ ରଥ ସମନ୍ୱୟ ବୈଠକରେ ସରଗରମ ଆଲୋଚନା ହୋଇଥିବା ବେଳେ ଫଳ କିନ୍ତୁ ଶୂନ । ତେବେ ଶ୍ରୀମନ୍ଦିରର ଚାରିଦ୍ବାର ଖୋଲିବା ନେଇ ସଚେତନ ନାଗରିକ ମଞ୍ଚ ତରଫରୁ ଏକଲକ୍ଷ ଦସ୍ତଖତ ଅଭିଯାନ ଆରମ୍ଭ ହୋଇଥିବା ବେଳେ ଭକ୍ତ, ସେବାୟତ ଓ ପୁରୀବାସୀ ଚାରିଦୁଆରେ ଖୋଲିବାକୁ ଦାବି କରିଥିଲେ । ଉତ୍ତରଦ୍ବାର ଦେଇ ମହାପ୍ରସାଦ ଆଣିବା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଉ ।
ତେବେ ରଥଯାତ୍ରା ପରେ ଏହା ଉପରେ ବିଚାର କରାଯିବ ବୋଲି ସୂଚନା ମିଳିଥିଲା । ଆଇନମନ୍ତ୍ରୀ ଜଗନ୍ନାଥ ସାରକାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଗତ ଦ୍ୱିତୀୟ ରଥ ସମନ୍ୱୟ ବୈଠକରେ ଚାରି ଦୁଆର ଖୋଲାଯିବା ମୁଖ୍ୟ ପ୍ରସଙ୍ଗ ମଧ୍ୟ ପାଲଟିଥିଲା । କିନ୍ତୁ ରଥଯାତ୍ରା ସରିବାର ୧୫ଦିନ ପରେ ବି ସମାନ ଅବସ୍ଥା । ତେବେ ଯାହାକୁ ନେଇ ବରିଷ୍ଠ ସେବାୟତଙ୍କ ଠାରୁ ଭକ୍ତମାନେ ଚାରିଦ୍ବାର ଖୋଲିବା ପାଇଁ ଦାବି କରିଛନ୍ତି ନଚେତ ଆନ୍ଦୋଳନ କରାଯିବ ବୋଲି ବରିଷ୍ଠ ଦାଇତାପତି ସେବକ ଚେତାବନୀ ଦେଇଛନ୍ତି ।
ସେପଟେ ଚାରିଦ୍ବାର ଯଥାଶୀଘ୍ର ଖୋଲିବା ଦାବି ନେଇ ସଚେତନ ନାଗରିକ ମଞ୍ଚ ତରଫରୁ ଶ୍ରୀମନ୍ଦିର ସିଂହଦ୍ଵାର ସମ୍ମୁଖରେ ଦସ୍ତଖତ ଅଭିଯାନ ଆରମ୍ଭ ହୋଇଥିଲା । ଏକ ଲକ୍ଷ ଭକ୍ତଙ୍କ ଠାରୁ ଦସ୍ତଖତ ରଖାଯାଇଥିଲା । ଚାରିଦ୍ବାର ନଖୋଲାଯିବା ଯୋଗୁଁ ପୁରୀବାସୀ ଦର୍ଶନରୁ ବଞ୍ଚିତ ହୋଇଛନ୍ତି । ପ୍ରତିଦିନ ପୁରୀ ବାସିନ୍ଦାମାନେ ପଶ୍ଚିମଦ୍ବାର, ଦକ୍ଷିଣଦ୍ବାର ଓ ଉତ୍ତରଦ୍ବାର ଦେଇ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିଥାନ୍ତି । କିନ୍ତୁ ବିଡମ୍ବନାର ବିଷୟ ସ୍ଥାନୀୟ ବାସିନ୍ଦାମାନଙ୍କୁ ଅନ୍ୟ ଦ୍ବାର ବାଟରେ ଛଡାଯାଉନଥିବାରୁ ଦର୍ଶନରୁ ବଞ୍ଚିତ ହେଉଛନ୍ତି । ଉତ୍ତରଦ୍ବାର ବାଟରେ ଭକ୍ତ, ଶ୍ରଦ୍ଧାଳୁମାନେ ମହାପ୍ରସାଦ କିଣିବାକୁ ଛଡାଯାଉନଥିବାରୁ ବଞ୍ଚିତ ରହୁଥିବା ଅଭିଯୋଗ ମଧ୍ୟ ହୋଇଛି। ମହାପ୍ରସାଦ ପାଇବା ପାଇଁ ଭକ୍ତମାନେ ଉତ୍ତରଦ୍ବାର ସମ୍ମୁଖକୁ ଯାଉଥିବା ବେଳେ ଅନେକ ଦଲାଲଙ୍କ ଦ୍ୱାରା ଶୋଷଣ ମଧ୍ୟ ହେଉଥିବା ଅଭିଯୋଗ ହୋଇଛି ।