ବିଜୟୱାଡା: ଆନ୍ଧ୍ରପ୍ରଦେଶର ବିଜୟୱାଡାରେ ଏକ ଦୁଃଖଦ ଘଟଣା ଦେଖିବାକୁ ମିଳିଛି । ବିରୋଧୀ ତେଲୁଗୁ ଦେଶମ ପାର୍ଟି (ଟିଡିପି)ର ଜଣେ ନେତାଙ୍କ ଦ୍ୱାରା ଯୌନ ନିର୍ଯାତନା ସହି ନପାରି ୧୪ ବର୍ଷୀୟ ନାବାଳିକା ୫ ମହଲା କୋଠାରୁ ଡେଇଁ ଆତ୍ମହତ୍ୟା କରିଛି । କ୍ଷମତାରେ ଥିବା ୱାଇଏସ୍ଆର କଂଗ୍ରେସ ପାର୍ଟି ଅଭିଯୁକ୍ତ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛି ।
ପୋଲିସ ୯ମ ଶ୍ରେଣୀ ଛାତ୍ରୀର କୋଠାରୀରୁ ଏକ ଆତ୍ମହତ୍ୟା ନୋଟ ଜବତ କରିଛି, ଯେଉଁଥିରେ କି ଲେଖାଯାଇଛି ଯେ, କୋଠାରେ ରହୁଥିବା ବିନୋଦ ଜୈନ ତାକୁ ଲଗାତାର ଶାରୀରିକ ନିର୍ଯାତନା ଦେଉଥିଲା । ଅସହ୍ୟ ହେବାରୁ ବାଧ୍ୟ ହୋଇ ଆତ୍ମହତ୍ୟା କରୁଛି ।
ଟିଡିପି ଟିକେଟରେ ପାର୍ଷଦ ଭାବେ ନିକଟରେ ହୋଇଥିବା ନଗରନିଗମ ନିର୍ବାଚନରେ ଲଢ଼ିଥିବା ଅଭିଯୁକ୍ତ ବିନୋଦ ଜୈନଙ୍କୁ ପୋଲିସ ଗିରଫ କରିଛି । ବିନୋଦର ବୟସ ୬୦ ବର୍ଷ । ପୋକ୍ସୋ ଆଇନ ଆଧାରରେ ଅଭିଯୁକ୍ତ ବିରୋଧରେ ମାମଲା ରୁଜୁ ହୋଇଛି । ନାବାଳିକାର ଜେଜେ ମା’ ଗଣମାଧ୍ୟମକୁ କହିଛନ୍ତି ଯେ, ସେ ସକାଳ ଠାରୁ ମନଦୁଃଖରେ ଥିଲା । କିନ୍ତୁ ପଚାରିଲେ ମଧ୍ୟ କିଛି କହୁ ନଥିଲା । ପାଞ୍ଚ ମହଲା କୋଠାରୁ ଡେଇଁ ଆତ୍ମହତ୍ୟା କରିଛି । ପୋଲିସ ନାବାଳିକାର କୋଠରୀରୁ ଏକ ଆତ୍ମହତ୍ୟା ନୋଟ ଜବତ କରିଛି ।
