ମୁମ୍ବାଇ: ମଙ୍ଗଳବାର ବିସିସିଆଇ ପକ୍ଷରୁ ୨୦୨୩-୨୪ ସିଜନ୍ ପାଇଁ ଟିମ୍ ଇଣ୍ଡିଆର ଘରୋଇ ସିରିଜ୍ କାର୍ଯ୍ୟସୂଚୀ ଘୋଷଣା କରାଯାଇଛି। ଏହି ଘୋଷଣା ଅନୁସାରେ, ଆଲୋଚ୍ୟ ସିଜନ୍ରେ ଭାରତ ଘରୋଇ ମାଟିରେ ଅଷ୍ଟ୍ରେଲିଆ ଓ ଇଂଲଣ୍ଡ ପରି ଦୁଇଟି ଶକ୍ତିଶାଳୀ ଦଳ ବିପକ୍ଷରେ ସିରିଜ୍ ଖେଳିବ । ଆସନ୍ତା ଅକ୍ଟୋବର-ନଭେମ୍ବରରେ ବିସିସିଆଇ ଦିନିକିଆ ବିଶ୍ୱକପ୍ ଆୟୋଜନ କରୁଥିବା ବେଳେ ଏହା ପୂର୍ବରୁ ଟିମ୍ ଇଣ୍ଡିଆ ଅଷ୍ଟ୍ରେଲିଆ ବିପକ୍ଷରେ ଏକ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବ । ସେହିପରି ଆସନ୍ତା ବର୍ଷ ଜାନୁଆରୀ ୨୫ରୁ ମାର୍ଚ୍ଚ ୧୧ ତାରିଖ ମଧ୍ୟରେ ଦଳ ଇଂଲଣ୍ଡ ବିପକ୍ଷରେ ଏକ ସମ୍ପୂର୍ଣ୍ଣ ସିରିଜ୍ ଖେଳିବାର କାର୍ଯ୍ୟକ୍ରମ ଚୂଡ଼ାନ୍ତ ହୋଇଛି । ଏହାଛଡ଼ା ଦଳ ଆଲୋଚ୍ୟ ସିଜନ୍ରେ ଆଫଗାନିସ୍ତାନ ବିପକ୍ଷରେ ମଧ୍ୟ ଏକ ଟି-୨୦ ସିରିଜ୍ ଖେଳିବାର କାର୍ଯ୍ୟକ୍ରମ ରହିଥିବା ବିସିସିଆଇ ପକ୍ଷରୁ ଜାରି ବିବୃତିରେ ସ୍ପଷ୍ଟ କରାଯାଇଛି । ଚଳିତ ସିଜନ୍ରେ ଟିମ୍ ଇଣ୍ଡିଆ ଦିନିକିଆ ବିଶ୍ୱକପ୍ ବ୍ୟତୀତ ୩ଟି ଦିନିକିଆ, ୫ଟି ଟେଷ୍ଟ୍ ଓ ୮ଟି ଟି-୨୦ ଖେଳିବ ।
ଅଷ୍ଟ୍ରେଲିଆ ବିପକ୍ଷରେ ଟିମ୍ ଇଣ୍ଡିଆର ଦିନିକିଆ ସିରିଜ୍ ଆସନ୍ତା ସେପ୍ଟେମ୍ବର ୨୨ରୁ ଆରମ୍ଭ ହୋଇ ୨୭ ତାରିଖରେ ଶେଷ ହେବ । ସିରିଜ୍ର ପ୍ରଥମ ମ୍ୟାଚ୍ଟି ମୋହାଲିଠାରେ ଖେଳାଯିବା ପରେ ପରବର୍ତ୍ତୀ ଦୁଇଟି ମ୍ୟାଚ୍ ଇନ୍ଦୋର ଓ ରାଜକୋଟଠାରେ ଖେଳାଯିବାକୁ ନିଷ୍ପତ୍ତି ହୋଇଛି । ଏହାପରେ ଅକ୍ଟୋବର ୫ରୁ ଅହମ୍ମଦାବାଦଠାରେ ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡ ଓ ନ୍ୟୁଜିଲାଣ୍ଡ୍ ମ୍ୟାଚ୍ରୁ ଆରମ୍ଭ ହେବାକୁ ଥିବା ଦିନିକିଆ ବିଶ୍ୱକପ୍ରେ ଦଳ ଅଂଶଗ୍ରହଣ କରିବ । ଏହି ବିଶ୍ୱକପ୍ରେ ଅକ୍ଟୋବର ୮ ତାରିଖରେ ଟିମ୍ ଇଣ୍ଡିଆ ଅଷ୍ଟ୍ରେଲିଆ ବିପକ୍ଷରେ ତା’ର ପ୍ରଥମ ମ୍ୟାଚ୍ ଖେଳିବ । ବିଶ୍ୱକପ୍ ଶେଷ ହେବା ପରେ ନଭେମ୍ବର ୨୩ରୁ ଡିସେମ୍ବର ୩ ତାରିଖ ମଧ୍ୟରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଏକ ଟି-୨୦ ସିରିଜ୍ ଖେଳାଯିବ, ଯେଉଁଥିରେ ଦୁଇ ଦଳ ୫ଟି ମ୍ୟାଚ୍ ଖେଳିବେ । ଏହି ସିରିଜ୍ ମାଧ୍ୟମରେ ଟିମ୍ ଇଣ୍ଡିଆ ଆସନ୍ତା ବର୍ଷ ୱେଷ୍ଟ୍ଇଣ୍ଡିଜ୍ ଓ ଆମେରିକାରେ ମିଳିତ ଭାବେ ଆୟୋଜିତ ହେବାକୁ ଥିବା ଟି-୨୦ ବିଶ୍ୱକପ୍ ସକାଶେ ପ୍ରସ୍ତୁତି ଆରମ୍ଭ କରିବ ।
ସେହିପରି ଟିମ୍ ଇଣ୍ଡିଆର ୨୦୨୪ ବର୍ଷ ଆଫଗାନିସ୍ତାନ ବିପକ୍ଷ ଟି-୨୦ ସିରିଜ୍ରୁ ଆରମ୍ଭ ହେବ । ପ୍ରଥମ ଥର ପାଇଁ ସୀମିତ ଓଭର୍ ସିରିଜ୍ ଖେଳିବା ସକାଶେ ଭାରତ ଆଗମନ କରିବାକୁ ଥିବା ଆଫଗାନିସ୍ତାନ ମୋହାଲି, ଇନ୍ଦୋର୍ ଓ ବେଙ୍ଗାଲୁରୁଠାରେ ଜାନୁଆରୀ ୧୧ରୁ ୧୭ ତାରିଖ ମଧ୍ୟରେ ଉକ୍ତ ସିରିଜ୍ର ମ୍ୟାଚ୍ଗୁଡ଼ିକ ଖେଳିବ । ଏହାପରେ ଟିମ୍ ଇଣ୍ଡିଆ ଟେଷ୍ଟ୍ ଫର୍ମାଟ୍କୁ ଓହ୍ଲାଇବ । ଦଳ ଜାନୁଆରୀ ୨୫ରୁ ଇଂଲଣ୍ଡ ବିପକ୍ଷରେ ଟେଷ୍ଟ୍ ସିରିଜ୍ ଖେଳିବ, ଯେଉଁଥିରେ ମୋଟ ୫ଟି ମ୍ୟାଚ୍ ଖେଳାଯିବ । ଏହି ମ୍ୟାଚ୍ଗୁଡ଼ିକ ହାଇଦ୍ରାବାଦ, ବିଶାଖାପାଟଣା, ରାଜକୋଟ, ରାଞ୍ଚି ଓ ଧର୍ମଶାଳାରେ ଆୟୋଜିତ ହେବ ବୋଲି ବିସିସିଆଇ ସୂଚନା ଦେଇଛି । ଉକ୍ତ ସିରିଜ୍ର ଦ୍ୱିତୀୟ ମ୍ୟାଚ୍ଟି ଫେବୃଆରୀ ୨ରୁ, ତୃତୀୟ ମ୍ୟାଚ୍ଟି ୧୫ରୁ, ଚତୁର୍ଥ ମ୍ୟାଚ୍ଟି ୨୩ରୁ ଓ ପଞ୍ଚମ ତଥା ଅନ୍ତିମ ଟେଷ୍ଟ୍ଟି ମାର୍ଚ୍ଚ ୭ ତାରିଖଠାରୁ ଆରମ୍ଭ ହେବ ।
