ପାକିସ୍ତାନରେ ଆତ୍ମଘାତୀ ବିସ୍ଫୋରଣ: ୩ ମୃତ, ୨୦ ଆହତ

ଇସଲାମବାଦ: ପାକିସ୍ତାନରେ ଭୟଙ୍କର ଆତ୍ମଘାତୀ ବିସ୍ଫୋରଣ । ସେନା ଗାଡ଼ିକୁ ଧକ୍କା ଦେଲା ବିସ୍ଫୋରକ ଭର୍ତ୍ତି ଯାନ । ଏଥିରେ ପ୍ରାୟ ୩ ସୁରକ୍ଷାକର୍ମୀଙ୍କ ମୃତ୍ୟୁ ହୋଇଥିବା ବେଳେ ୨୦ ଜଣ ଆହତ ହୋଇଛନ୍ତି । ଶନିବାର ପାକିସ୍ତାନର ଉତ୍ତର ପଶ୍ଚିମ ଅଞ୍ଚଳରେ ଏହି ଭୟଙ୍କର ଆତ୍ମଘାତୀ ବିସ୍ଫୋରଣ ହୋଇଛି । ଉତ୍ତର ପାକିସ୍ତାନର ୱାଜିରିସ୍ତାନର ଆଦିବାସୀ ଜିଲ୍ଲାରେ ପେଟ୍ରୋଲିୟମ କମ୍ପାନୀର କର୍ମଚାରୀଙ୍କୁ ନେଇ ଯାଉଥିବା ସୁରକ୍ଷାକର୍ମୀଙ୍କ ଗାଡିକୁ ଏକ ବିସ୍ଫୋରକ ଭର୍ତ୍ତି ତିନି ଚକିଆ ଗାଡି ଧକ୍କା ଦେଇଥିଲା । ବିସ୍ଫୋରଣ ଘଟିବା ଯୋଗୁଁ ତିନି ଜଣ ସୁରକ୍ଷାକର୍ମୀଙ୍କ ମୃତ୍ୟୁ ହୋଇଥିବାବେଳେ ୨୦ ଜଣ କର୍ମଚାରୀ ଆହତ ହୋଇଛନ୍ତି । ଡ୍ୟୁଟି ସରିବା ପରେ ପେଟ୍ରୋଲିୟମ କର୍ମଚାରୀମାନେ କଡ଼ା ସୁରକ୍ଷା ମଧ୍ୟରେ ନିଜ କ୍ୟାମ୍ପ୍କୁ ଫେରୁଥିଲେ । ଏହି ସମୟରେ ବିସ୍ଫୋରଣକାରୀ ଏକ ବୋମା ଭର୍ତ୍ତି ଗାଡି଼କୁ ସେନା ଗାଡ଼ି ସହ ଧକ୍କା କରାଇଥିଲା । ଖବର ପାଇ ଘଟଣାସ୍ଥଳରେ ସୁରକ୍ଷାକର୍ମୀ ପହଞ୍ଚି ମୃତାହତଙ୍କୁ ଉଦ୍ଧାର କରିଥିଲେ । ସମସ୍ତ ଆହତଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି । ବର୍ତ୍ତମାନ ସୁଦ୍ଧା ବିସ୍ଫୋରଣକାରୀ ଧରାପଡ଼ି ନଥିବାବେଳେ ପୋଲିସ ଘଟଣାର ତଦନ୍ତ କରୁଛି ।