ନୂଆଦିଲ୍ଲୀ : ଆରଏସଏସକୁ ନେଇ ଆମେରିକାରେ ଉଠିଲା ବଡ଼ ବିବାଦ । ଆରଏସଏସ ମୁଖ୍ୟ ମୋହନ ଭାଗବତଙ୍କ ଆମେରିକା ଗସ୍ତ ପୂର୍ବରୁ ସଂଘ ବିରୋଧରେ ଆସିଛି ଏଭଳି ଦାବି । ଆମେରିକାର ଧାର୍ମିକ ସ୍ୱାଧୀନତା ଉପରେ କାର୍ଯ୍ୟ କରୁଥିବା ୟୁଏସସିଆଇଆରଏଫ୍ର କିଛି ଅଧିକାରୀ ଆରଏସଏସ ଉପରେ ପ୍ରତିବନ୍ଧକ ଲଗାଇବା ସହ ଏହାର ନେତାମାନଙ୍କୁ ଉଚ୍ଚସ୍ତରୀୟ କୂଟନୈତିକ ବୈଠକରୁ ଦୂରେଇ ରଖିବାକୁ ଦାବି କରିଛନ୍ତି ।ୟୁଏସସିଆଇଆରଏଫ୍ର ଅଧ୍ୟକ୍ଷ ଆସିଫ୍ ମହମୁଦ ଆରଏସଏସକୁ ଏକ ପ୍ରମୁଖ ସଂଗଠନ ଭାବେ ଉଲ୍ଲେଖ କରିଛନ୍ତି । ତାଙ୍କ ଅଭିଯୋଗ ହେଉଛି, ଆରଏସଏସ ସହ ଜଡ଼ିତ କିଛି ସହଯୋଗୀ ସଂଗଠନ ଭାରତର ଧାର୍ମିକ ସଂଖ୍ୟାଲଘୁଙ୍କ ବିରୋଧରେ ଆକ୍ରମଣରେ ସାମିଲ ରହିଛନ୍ତି । ଏହା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆରଏସଏସର ସଦସ୍ୟ ବୋଲି ମଧ୍ୟ ସେ ଉଲ୍ଲେଖ କରିଛନ୍ତି ।
ୟୁଏସସିଆରଏଫ୍ର କମିସନର ଜିନ୍ ମିଲ୍ସ ମଧ୍ୟ ଆରଏସଏସ ନେତାଙ୍କ ସହ ଉଚ୍ଚସ୍ତରୀୟ ବୈଠକ କିମ୍ବା କୂଟନୈତିକ ସୌଜନ୍ୟ ନ କରିବାକୁ ଆମେରିକା ସରକାରଙ୍କୁ କହିଛନ୍ତି । ଧାର୍ମିକ ସ୍ୱାଧୀନତା ଉଲ୍ଲଂଘନ ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ କଟକଣା ଲଗାଇବାକୁ ମଧ୍ୟ ସେ ଦାବି କରିଛନ୍ତି । ତେବେ ଏହି ବିବାଦ ମୋହନ ଭାଗବତଙ୍କ ଆଗାମୀ ଆମେରିକା ଗସ୍ତ ପୂର୍ବରୁ ତୀବ୍ର ହୋଇଛି । ଅଗଷ୍ଟ ୨୯ରେ ନ୍ୟୁୟର୍କରେ ଆମେରିକୀୟ ହିନ୍ଦୁ ସମୁଦାୟ ପକ୍ଷରୁ ଆୟୋଜିତ ଏକ ବିଶ୍ୱସ୍ତରୀୟ ଏକତା ସମାରୋହରେ ଭାଗବତ ଯୋଗଦେବାର କାର୍ଯ୍ୟକ୍ରମ ରହିଛି ।
ସେପଟେ ମାନବାଧିକାର ସଂଗଠନ ‘ହିନ୍ଦୁସ୍ ଫର୍ ହ୍ୟୁମାନ୍ ରାଇଟ୍ସ’ ମଧ୍ୟ ଭାଗବତଙ୍କ ଗସ୍ତକୁ ବିରୋଧ କରିଛି। ଆରଏସଏସକୁ ଧାର୍ମିକ ସଂଖ୍ୟାଲଘୁଙ୍କ ବିରୋଧରେ ହିଂସା ଅଭିଯୋଗରୁ ଅଲଗା କରାଯାଇପାରିବ ନାହିଁ ବୋଲି ସଂଗଠନ ଦାବି କରିଛି । ତେବେ ଆମେରିକାର ଏହି ଦାବି ଓ ଅଭିଯୋଗ ନେଇ ଭାରତ କିମ୍ବା ଆରଏସଏସ ପକ୍ଷରୁ କୌଣସି ପ୍ରତିକ୍ରିୟା ଏଠାରେ ଉଲ୍ଲେଖ ହୋଇନାହିଁ। ଭାଗବତଙ୍କ ଗସ୍ତ ପୂର୍ବରୁ ଏହି ବିବାଦ ଆମେରିକା-ଭାରତ ସମ୍ପର୍କରେ ନୂଆ ଚର୍ଚ୍ଚାକୁ ଜନ୍ମ ଦେଇଛି ।
