ଭୁବନେଶ୍ୱର : ବିଜୁ ଜନତା ଦଳର ମୁଖ୍ୟାଳୟ ଶଙ୍ଖଭଵନ ଠାରେ ଆଜି ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦଳର ଜାତୀୟ ମୁଖପାତ୍ର ଡ଼ଃ ଅମର ପଟ୍ଟନାୟକ ସାମ୍ବାଦିକ ମାନଙ୍କୁ ସମ୍ବୋଧନ କରି ବିଜେଡିର ନିର୍ବାଚନୀ ଇସ୍ତାହାରରେ କୋଡିଏ ନମ୍ବର ଗ୍ୟାରେଣ୍ଟିରେ ଓଡ଼ିଆ ଭାଷା, ସଂସ୍କୃତି, ଐତିହ୍ୟର କିଭଳି ଭାବେ ସୁରକ୍ଷିତ ରହିବା ସଂଗେ ସଂଗେ ଏହାର ପ୍ରଚାର ପ୍ରସାର ପାଇଁ ନବୀନ ସରକାର ସମର୍ପିତ ଅଛନ୍ତି ବୋଲି କହିଥିଲେ l ବିଜୁ ଜନତା ଦଳର ଘୋଷଣା ପତ୍ରରେ କୁହାଯାଇଛି, ଭାଷା ହିଁ ଭବିଷ୍ୟତ l ୧୯୩୬ ମସିହାରେ ଭାଷାଭିତିକ ରାଜ୍ୟ ଭାବେ ଜନ୍ମ ହୋଇଥିଲା ଓଡିଶା, ୨୦୩୬ ମସିହାରେ ଓଡିଶା ଦେଶର ଶ୍ରେଷ୍ଠ ରାଜ୍ୟର ମାନ୍ୟତା ହାସଲର ଲକ୍ଷ୍ୟ ନେଇ ଓଡିଶା ଆଗକୁ ବଢ଼ୁଛି ଏବଂ ଏହି ସମୟ ବେଳକୁ ଓଡ଼ିଆ ଭାଷା, ସଂସ୍କୃତି ଓ ଐତିହ୍ୟ କ୍ଷେତ୍ରରର ଏକ ସ୍ୱତନ୍ତ୍ର ପରିଚୟ ହାସଲର ଲକ୍ଷ୍ୟ ରହିଛି l ୨୦୦୦ ମସିହାରେ ମୁଖ୍ୟମନ୍ତ୍ରୀ ଦାୟିତ୍ୱ ଗ୍ରହଣ କରିଥିଲେ l ୨୦ ଫେବୃଆରୀ ୨୦୧୪ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ୟମରେ ଓଡ଼ିଆ ଭାଷାକୁ ଶାସ୍ତ୍ରୀୟ ମାନ୍ୟତା ମିଳିଥିଲା l ଓଡ଼ିଆ ଭାଷା ସଂସ୍କୃତି ଓ ଐତିହ୍ୟକୁ ବ୍ୟାପକ କରିବା ଲକ୍ଷ୍ୟରେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ୨୬ ଡିସେମ୍ବର ୨୦୧୭ରେ ପୁରୀ ଠାରେ ପ୍ରଥମ ଐତିହ୍ୟ କ୍ୟାବିନେଟ ବସିଥିଲା l ଏହି କ୍ୟାବିନେଟରେ ଓଡ଼ିଆ ଭାଷା ସଂସ୍କୃତି ବିଭାଗ ଖୋଲିବା ଓ ଏକ ବିଶ୍ୱ ସ୍ତରୀୟ ଓଡ଼ିଆ ଭାଷା ସମ୍ମିଳନୀ ଆୟୋଜନ କରିବା ପାଇଁ ନିଷ୍ପତି ନିଆଯାଇଥିଲା l ପରବର୍ତ୍ତୀ ସମୟରେ ଭାଷା ସଂସ୍କୃତି ବିଭାଗ ଖୋଲା ଯାଇଥିଲା ଓ ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀ ମଧ୍ୟ ଆୟୋଜନ କରାଯାଇଥିଲା l ୭ ଜୁନ ୨୦୨୦ରେ ବନ୍ଦେ ଉତ୍କଳ ଜନନୀକୁ ରାଜ୍ୟ ସଂଗୀତ ମାନ୍ୟତା ମିଳିଲା l ସେହିପରି ରାଜ୍ୟର ପ୍ରଥମ ଓଡ଼ିଆ ବିଶ୍ୱବିଦ୍ୟାଳୟ ସତ୍ୟବାଦୀ ଠାରେ ପ୍ରତିଷ୍ଠା କରା ଯାଇଛି l ପୂଜ୍ୟପୂଜା ପରମ୍ପରାକୁ ସମ୍ମାନ ଦେଇ ଓଡ଼ିଶାର ୧୩୫ଟି ବରପୁତ୍ରଙ୍କ ପ୍ରତିମୂର୍ତ୍ତି ବିଭିନ୍ନ ସ୍ଥାନରେ ପ୍ରତିଷ୍ଠା କରା ଯାଇଛି l ଓଡ଼ିଶାର ଆଗ ଧାଡ଼ିର ବରପୁତ୍ର ମାନଙ୍କ ଯଥା ନେତାଜୀ ସୁବାଷ ବୋଷ, ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ, ପଣ୍ଡିତ ରଘୁନାଥ ମୁର୍ମୁ ଇତ୍ୟାଦିଙ୍କ ଜନ୍ମପୀଠକୁ ସ୍ମାରକୀ ଭାବେ ଗଢା ଯାଇଛି l
ଅପର ପକ୍ଷରେ ଓଡିଶୀ ସଂଗୀତର ଶାସ୍ତ୍ରୀୟ ମାନ୍ୟତା ପାଇଁ ବାରମ୍ବାର ଦାବି କରାଯାଉଥିଲେ ମଧ୍ୟ କେନ୍ଦ୍ର ସରକାର ଏହାକୁ ଅଣଦେଖା କରୁଛି l ଓଡ଼ିଆ ଭାଷାକୁ ଶାସ୍ତ୍ରୀୟ ମାନ୍ୟତା ମିଳିବା ଦଶ ବର୍ଷ ବିତି ଯାଇଥିଲେ ମଧ୍ୟ କେନ୍ଦ୍ର ସରକାରଙ୍କ ତରଫରୁ ଟଙ୍କାଟିଏ ଅନୁଦାନ ମିଳି ନାହିଁ l ବିଜେଡି ତାର ଘୋଷଣା ପତ୍ରରେ ଓଡ଼ିଆ ଭାଷାର ପ୍ରଚାର ପ୍ରସାର ପାଇଁ ୧୦୦ କୋଟି ଟଙ୍କା ବ୍ୟୟର ପ୍ରତିଶୃତି ଦେଇଛି, ଯାହା ଆସନ୍ତା ଦଶ ବର୍ଷରେ ଖର୍ଚ୍ଚ ହେବ l ଓଡ଼ିଶା ସଂସ୍କୃତିର ପ୍ରତୀକ କଳାକାର ମାନଙ୍କୁ ପ୍ରୋତ୍ସାହନ ସ୍ୱରୂପ ପ୍ରାୟ ୪୫୧୦୨ କଳାକାରକୁ ମୁଖ୍ୟମନ୍ତ୍ରୀ କଳାକାର ସହାୟତା ରାଶି ପ୍ରଦାନ କରାଯାଉଛି. ଏହାକୁ ଆଉ 80 ହଜାର କଳାକାରଙ୍କୁ ଦିଆଯିବ l ରାଜ୍ୟର ବିଭିନ୍ନ କ୍ଷେତ୍ରରେ ସଫଳତା ହାସଲ କରିଥିବା ବ୍ୟକ୍ତି ମାନଙ୍କୁ କଳିଙ୍ଗ ଶ୍ରୀ ଓ କଳିଙ୍ଗ ଭୂଷଣ ସମ୍ମାନରେ ସମ୍ମାନିତ କରାଯିବ ବୋଲି ଘୋଷଣା ପତ୍ରରେ କୁହା ଯାଇଛି l ଐତିହ୍ୟର ସୁରକ୍ଷା ପାଇଁ ଆସନ୍ତା ଦଶ ବର୍ଷରେ ୧୦୦୦ କୋଟି ଟଙ୍କା ଖର୍ଚ୍ଚ କରାଯାଇ ଓଡ଼ିଶାର ଐତିହକୁ ସୁରକ୍ଷିତ କରିବାର ଯୋଜନା ରହିଛି l ସତ୍ୟବାଦିରେ ପ୍ରତିଷ୍ଠା ହୋଇଥିବା ଓଡ଼ିଆ ବିଶ୍ୱ ବିଦ୍ୟାଳୟକୁ ଏକ ନମ୍ବର ଭାଷା ବିଶ୍ୱ ବିଦ୍ୟାଳୟ ଭାବେ ଗଢି ତୋଳିବା ଲାଗି ପ୍ରତିଶ୍ରୁତି ଦିଆ ଯାଇଛି l ସଂସ୍କୃତି କେନ୍ଦ୍ର ଭାବେ ଥିବା ଭାଗବତ ଟୁଙ୍ଗି ଗୁଡିକୁ ଅଧିକ କ୍ରିୟାଶୀଳ କରିବା ଲକ୍ଷ୍ୟରେ ଏହାର ଅନୁଦାନକୁ ଦ୍ବିଗୁଣିତ କରାଯିବ l ପଶ୍ଚିମ ଓଡିଶା ଭାଷାର ବିକାଶ ପାଇଁ ସମ୍ବଲପୁର ବିଶ୍ୱ ବିଦ୍ୟାଳୟରେ ଏକ ଉତ୍କର୍ଷ କେନ୍ଦ୍ର ଖୋଲିବା ପାଇଁ ପଚିଶ କୋଟି ଟଙ୍କା ବ୍ୟୟ ବରାଦର ପ୍ରତିଶ୍ରୁତି ଦିଆ ଯାଇଛି l ସେହିପରି, ୧୫୦୦ ହାଇସ୍କୁଲରେ ଓଡ଼ିଆ ଶିକ୍ଷକ ନିଯୁକ୍ତି ଦିଆଯିବ ଓ ୧୯ ଜନଜାତି ଭାଷା ଶବ୍ଦକୋଷ କରାଯାଇଛି l ଏହାକୁ ଆହୁରି କ୍ରିୟାଶୀଳ କରାଯିବ l
୧୮୧୭ ମସିହା ପାଇକ ବିଦ୍ରୋହକୁ ପ୍ରଥମ ସ୍ୱାଧୀନତା ସଂଗ୍ରାମର ମାନ୍ୟତା ପାଇଁ ୨୦୧୭ରୁ ଉଦ୍ୟମ ଚାଲିଛି l ତତ୍କାଳୀନ ରାଷ୍ଟ୍ରପତି ପ୍ରଣବ ମୁଖର୍ଜିଙ୍କୁ ମୁଖ୍ୟମନ୍ତ୍ରୀ ଜଣାଇଥିଲେ l ୨୩ ଅକ୍ଟୋବର ୨୦୧୭ ରେ ତତ୍କାଳୀନ କେନ୍ଦ୍ର HRD ମନ୍ତ୍ରୀ ପ୍ରକାଶ ଜାଭାଡେକର ପୁସ୍ତକରେ ପାଇକ ବିଦ୍ରୋହକୁ ପ୍ରଥମ ସ୍ୱାଧୀନତା ସଂଗ୍ରାମ ନେଇ ପଢାଇବାକୁ କହିଥିଲେ l ତେବେ ଆମେ ଭାବିଲୁ ଏହା ସବୁ ବହିରେ ଲେଖା ଯିବ l ଆମେ ଖୁସି ଥିଲୁ ହେଲେ ସଂସଦର ଉତ୍ତରରେ ପାଇକ ବିଦ୍ରୋହକୁ ପ୍ରଥମ ସ୍ୱାଧୀନତା ସଂଗ୍ରାମ କହି ହେବନି ବୋଲି କହିଲେ l କେବଳ କେଶ ଷ୍ଟଡି ଭାବେ ଅଷ୍ଟମ ଶ୍ରେଣୀ ପିଲା ପଢିବେ l ଯଦି ଭାରତ ବର୍ଷରେ ପ୍ରଥମ ସଂଗ୍ରାମ ହୋଇଥିଲା, ତାହା ପାଇକଙ୍କ ପାଇଁ ଯାହା ବ୍ରିଟିଶକୁ ଝଟକା ଦେଇଥିଲା l ହେଲେ କେନ୍ଦ୍ରର ଓଡ଼ିଆ ଅସ୍ମିତା ପାଇଁ କଣ ଅଛି ହୃଦୟରେ, ତାହା ଜଣା ପଡୁଛି l କେନ୍ଦ୍ର ସରକାରଙ୍କ ପାଖରେ ଓଡ଼ିଆ ଅସ୍ମିତାର ପ୍ରୀତି ନାହିଁ l ଆମେ ଏହାକୁ ବିରୋଧ କରୁଛୁ ବିଜୁ ପଟ୍ଟନାୟକଙ୍କୁ ଭାରତ ରତ୍ନ ଦିଆଯାଇ ନାହିଁ l ସେହି ଜଣେ ଯାହାର ଯୋଗ୍ୟତା ଅଛି ହେଲେ ଏଯାଏ ଅଣଦେଖା କରାଯାଇଛି l ସଂସଦରେ ଏ କଥା ଉଠାଇଛୁ l ଦୁଃଖର କଥା, ଯେଉଁମାନେ ଓଡ଼ିଆ ଅସ୍ମିତା କଥା କହୁଛନ୍ତି, ସେମାନେ ବିଜୁ ବାବୁଙ୍କୁ ସ୍ୱୀକୃତି ଦେଉ ନାହାନ୍ତି l
