ମୟୂରଭଞ୍ଜ- ବାରିପଦା ସହରରେ ଆଇନ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ପଛରେ ନିଶା ମୁଖ୍ୟ କାରଣ ପାଳଟିଥିବା ଅଭିଯୋଗ ହୋଇଆସୁଛି। ଯୋଉଥିପାଇଁ ଦିନକୁଦିନ ଚୋରୀ, ରାହାଯାନୀ, ଛୀନତାଇ ଭଳି ଘଟଣା ବୃଦ୍ଧି ପାଇବାରେ ଲାଗିଛି। ତେବେ ଆଜି ବାରିପଦା ଟାଉନ ପୋଲିସକୁ ମିଳିଛି ବଡ ସଫଳତା। ୪୦ଲକ୍ଷରୁ ଉର୍ଦ୍ଧ୍ବ ଟଙ୍କାର ଧଳାଜହର ଜବତ ସହ ଜଣକୁ ଗିରଫ କରିଛି ଟାଉନ ଥାନା ପୋଲିସ। ଗିରଫ ଯୁବକ ହେଲେ ବାରିପଦା ଟାଉନ ଥାନା ଅନ୍ତର୍ଗତ ୱାର୍ଡ ନଂ ୨୭ ରବର ଗଛ ଗଳି ଅଞ୍ଚଳର ବୈଦ୍ୟନାଥ ପାଲଙ୍କ ପୁଅ ଗୋବିନ୍ଦ ପାଲ ଓରଫ ବଣି। ତେବେ ଗୋବିନ୍ଦଙ୍କ ନିକଟରୁ ୪୧୭ଗ୍ରାମ ଓଜନର ଧଳାଜହର ଜବତ କରିଛି ଟାଉନ ପୋଲିସ। ବିଶେଷ ସୂତ୍ରରୁ ଖବରପାଇ ବାରିପଦା ପୋଲିସର ଏକ ସ୍ୱତନ୍ତ୍ରଦଳ ଅଭିଯୁକ୍ତ ବଣି ଘରେ ଥିବା ବେଳେ ପୋଲିସ ଅତର୍କିତ ଭାବେ ଚଢ଼ାଉ କରି ବ୍ରାଉନସୁଗର ଜବତ କରିବାରେ ସକ୍ଷମ ହୋଇଛି। ଯାହାର ଆନୁମାନିକ ବଜାରମୂଲ୍ୟ ୪୦ ଲକ୍ଷଟଙ୍କାରୁ ଉର୍ଦ୍ଧ୍ବ ହେବ ବୋଲି ଜଣାପଡିଛି। ତେବେ ଏହା ଏକ ଅନ୍ତଃରାଜ୍ୟ ରାକେଟ କାମ କରୁଥିବା ସୂଚନା ଦେଇଛନ୍ତି ବାରିପଦା ଟାଉନ ଥାନା ପୋଲିସ ଅଧିକାରୀ ବିରେନ୍ଦ୍ର କୁମାର ସେନାପତି।
