ରସିକିଆ ଗଣିତ ମାଷ୍ଟରଙ୍କ ପ୍ରେମରେ ଅଷ୍ଟମ ଶ୍ରେଣୀ ଛାତ୍ରୀ, ତା’ପରେ କ’ଣ ହେଲା ପୁରା ଘଟଣା ପଢ଼ନ୍ତୁ….

ସୁନ୍ଦରଗଡ଼ : ପୋଲିସ୍ ହାତରେ ଧରାପଡ଼ିଲେ ରସିକିଆ ଗଣିତ ମାଷ୍ଟର । ନାବାଳିକା ଛାତ୍ରୀକୁ ପ୍ରେମ ଜାଲରେ ଫସାଇ ଗଣିତ ମାଷ୍ଟର ଚମ୍ପଟ ମାରିଥିଲେ । ଶେଷରେ ତନାଘନା ପରେ ପୋଲିସ୍ ରସିକିଆ ଗଣିତ ମାଷ୍ଟରଙ୍କୁ ଗିରଫ କରିଛନ୍ତି । ସୁନ୍ଦରଗଡ଼ ଜିଲ୍ଲା କୁତ୍ରା ଥାନା ଅଞ୍ଚଳରେ ଏହି ଘଟଣା ଘଟିଛି । ସୂଚନା ଅନୁଯାୟୀ, ସମ୍ପୃକ୍ତ ଶିକ୍ଷକ କୁତ୍ରା ରାଞ୍ଚି ରୋଡ୍‌ରେ ଥିବା ଏକ ଘରୋଇ ଇଂଲିଶ ମିଡିୟମ ସ୍କୁଲରେ ଶିକ୍ଷକତା କରୁଥିଲେ । ଚଳିତ ମାସ ୫ ତାରିଖରେ ଶିକ୍ଷକ ଜଣକ ସେହି ସ୍କୁଲରେ ପଢୁଥିବା ଜଣେ ଅଷ୍ଟମ ଶ୍ରେଣୀ ଛାତ୍ରୀଙ୍କୁ ନେଇ ଫେରାର ହୋଇଯାଇଥିଲେ । ଛାତ୍ରୀଙ୍କ ନିଖୋଜ ପରେ ପରିବାର ଲୋକ ଏନେଇ ଥାନାରେ ଏତଲା ଦେଇଥିଲେ । ଏହାପରେ ପୋଲିସ୍ ଛାନ୍‌ଭିନ୍ ଆରମ୍ଭ କରିଥିଲା । ଶିକ୍ଷକ ଜଣକ ରାଜଗାଙ୍ଗପୁରରେ ରହୁଥିଲେ । ତେଣୁ ପୋଲିସ ରାଜଗାଙ୍ଗପୁରର ବିଭିନ୍ନ ସ୍ଥାନରେ ରାତି ଅଧିଆ ଛାନ୍‌ଭିନ୍ ଆରମ୍ଭ କରିଥିଲା । ମୋବାଇଲ ଟ୍ରେସିଂ ପରେ ସମ୍ପୃକ୍ତ ଶିକ୍ଷକଙ୍କ ସହଯୋଗୀଙ୍କ ସୁରାଗ ପାଇଥିଲା ପୋଲିସ । ସହଯୋଗୀକୁ ଥାନାକୁ ଆଣି ପଚରାଉଚରା ପରେ ଶିକ୍ଷକ ଓ ଛାତ୍ର ଜଣକ ବିହାରରେ ଶିୱାନ ଜିଲ୍ଲାର କରୁଆ ଅଞ୍ଚଳରେ ରହୁଥିବା ନେଇ ପୋଲିସ୍ ଜାଣିବାକୁ ପାଇଥିଲା । ଏହାପରେ କୁତ୍ରା ଥାନା ଓଓଉ ସୁଶାନ୍ତ ପରିଡ଼ାଙ୍କ ସମେତ ଏକ ଟିମ୍ ବିହାର ଶିୱାନ ଜିଲ୍ଲାର କରୁଆ ଗାଁରେ ଚଢଉ କରିଥିଲା । ସେଠାରୁ ଛାତ୍ରୀଙ୍କୁ ଉଦ୍ଧାର କରିବା ସହ ସମ୍ପୃକ୍ତ ଶିକ୍ଷକଙ୍କୁ ଗିରଫ କରିଛି ପୋଲିସ୍ । ଗଣିତ ମାଷ୍ଟରଙ୍କ ପାଖରୁ ପ୍ରିଣ୍ଟିଂ ମେସିନ, ବାଇକ, ସିନ୍ଦୂର, କାଚ ସହ କିଛି ଟଙ୍କା ଜବତ କରିଛି । ଏନେଇ ପ୍ରେସ୍‌ମିଟ୍‌ରେ ଏସ୍‌ଡିପିଓ ସୂଚନା ଦେଇଛନ୍ତି ।