ବାହାଘର ନା’ରେ ପ୍ରତାରଣା, ଥାନାର ଦ୍ୱାରସ୍ଥ ହେଲେ ବର

ଲକ୍ଷ୍ନୌ: ଉତ୍ତର ପ୍ରଦେଶର ଇଟାୱାରେ ହୋଇଥିବା ଏକ ବାହାଘର ଏବେ ଚର୍ଚ୍ଚାର ବିଷୟ ହୋଇଛି । ଜଣେ ୨୦ ବର୍ଷର ଯୁବତୀଙ୍କ ଫଟୋକୁ ଦେଖାଇ ୪୫ ବର୍ଷୀୟ ମହିଳାଙ୍କ ସହ ବାହାଘର ହେବାକୁ ଯାଉଥିଲା । ପ୍ରଥମେ ଯୁବତୀଙ୍କ ଫଟୋ ଦେଖି ଯୁବକ ଜଣକ ବାହାଘର ପାଇଁ ରାଜି ହୋଇଥିଲେ । ହେଲେ ତାଙ୍କ ସହ ପ୍ରତାରଣା କରାଯାଇଥିବା ଜାଣିବା ପରେ ସିଧା ପହଞ୍ଚିଛନ୍ତି ଥନାରେ । ସୂଚନା ଅନୁଯାୟୀ, ଶତ୍ରୁଘ୍ନ ସିଂହ ନାମକ ଜଣେ ଯୁବକ ବାହାଘର ପାଇଁ କନ୍ୟା ଖୋଜୁଥିଲେ । ହେଲେ ସେ ଏମିତି ଠକାମିରେ ପଡ଼ିବେ ବୋଲି ଜାଣି ନ ଥିଲେ । ଦଲାଲମାନେ ତାଙ୍କୁ ଜଣେ ୨୦ ବର୍ଷୀୟ ଯୁବତୀଙ୍କ ଫଟୋ ଦେଖାଇ ଥିଲେ । ଏହି ବାହାଘର ପାଇଁ ଦଲାଲମାନେ ତାଙ୍କଠାରୁ ୩୫ ହଜାର ଟଙ୍କା ବି ନେଇ ଯାଇଥିଲେ । ହେଲେ ବିବାହ ଦିନ ଯୁବକ ଜଣକ ଯେତେବେଳେ ମନ୍ଦିରରେ ପହଞ୍ଚିଲେ, ତାଙ୍କୁ ଖବର ମିଳିଲା କି ବିବାହ ଜଣେ ୪୫ ବର୍ଷୀୟ ମହିଳାଙ୍କ ସହ ହେବାକୁ ଯାଉଛି । ସେତିକି ନୁହେଁ, ମହିଳାଜଣକ ୨ ସନ୍ତାନର ମା’ ବୋଲି ମଧ୍ୟ କୁହାଯାଉଛି ।
ଏପରି ଠକାମିରେ ଶତ୍ରୁଘ୍ନ ରାଗି ଯାଇଥିଲେ । ବିବାହ କରିବା ପାଇଁ ମନା କରିବା ସହ ନିଜ ମା’ଙ୍କ ସହ ଥନାରେ ଯାଇଁ ପହଞ୍ଚିଥିଲେ । ପରିସ୍ଥିତି ଖରାପ ହେବା ଦେଖି ସଂପୃକ୍ତ ଦଲାଲ ଶତ୍ରୁଘ୍ନ ଏବଂ ତାଙ୍କ ପରିବାର ଲୋକଙ୍କୁ ଧମକଚମକ ବି ଦେଇଥିଲେ । ଏପରିକି ତାଙ୍କୁ ବାଡେଇବା ପାଇ ବାଡ଼ି ଧରି ଗୋଡାଇଲେ । କୌଣସି ପ୍ରକାରେ ଜୀବନ ବଞ୍ଚାଇ ଶତ୍ରୁଘ୍ନ ଥାନାରେ ପହଞ୍ଚି ଯାଇଥିଲେ । ଆଉ ତାଙ୍କ ସହ ହୋଇଥିବା ଠକାମି ବିଷୟରେ ଜଣାଇଥିଲେ । ଶତ୍ରୁଘ୍ନଙ୍କ କହିବା ଅନୁଯାୟୀ, ଗାଁର ୨ ଜଣ ଦଲାଲ ତାଙ୍କଠାରୁ ୩୫ ହଜାର ଟଙ୍କା ଠକି ନେଇ ଯାଇଛନ୍ତି । ବାହାଘର ପାଇଁ ତାଙ୍କୁ ନୀଳକଣ୍ଠ ମନ୍ଦିରରେ ଜଣେ ଯୁବତୀଙ୍କୁ ଦେଖାଇଥିଲେ ଯାହା ବୟସ ପାଖାପାଖି ୨୦ ବର୍ଷ ହେବ । ଶତ୍ରୁଘ୍ନ ଯୁବତୀଙ୍କ ହାତରେ ଏକ ହଜାର ଟଙ୍କା ଦେବା ସହ ମୁହଁ ଦେଖା ଉପହାର ଭାବେ ଏକ ମିଠା ପ୍ୟାକେଟ ମଧ୍ୟ ଦେଇଥିଲେ । ଝିଅ ଦେଖିବା ପାଇଁ ଶତ୍ରୁଘ୍ନଙ୍କ ସହ ତାଙ୍କ ମାଉସୀ ଆସିଥିଲେ । ବାହାଘର ଠିକ୍ ହୋଇଗଲା । ତାରିଖ ଧାର୍ଯ୍ୟ ହେଲା । କାଳୀ ବାହନ ମନ୍ଦିରରେ ବିବାହ ପାଇଁ ସମସ୍ତ ବ୍ୟବସ୍ଥା କରାଗଲା । ବିବାହ ଆରମ୍ଭ ହୋଇଯାଇଥିଲା । ହଠାତ୍ ତାଙ୍କ ମା’ ଜାଣିବାକୁ ପାଇଲେ, ଯେଉଁ ଯୁବତୀଙ୍କୁ ଦେଖାଇଥିଲେ ତାଙ୍କର ସହ ବାହାଘର ହେଉନି । ଏପରକି ବିବାହ କରୁଥିବା ମହିଳାଙ୍କ ପାଖରେ ତାଙ୍କର ସନ୍ତାନ ମଧ୍ୟ ବସିଥିଲେ । ଶତ୍ରୁଘ୍ନଙ୍କ ମା’ ଇନ୍ଦିରା ଦେବୀଙ୍କ କହିବା ଅନୁଯାୟୀ, ମୋ ପୁଅର ବିବାହ ଜବରଦସ୍ତ ଜଣେ ବୟସ୍କ ମହିଳା ଯିଏ କି ୨ ସନ୍ତାନାର ମା’ ତାଙ୍କ ସହ କରାଇବାକୁ ଯାଉଥିଲେ । ଆମେ ମନା କରିବାରୁ ଠେଙ୍ଗା-ବାଡି ଧରି ମାରିବାକୁ ଗୋଡାଇ ମାରି ଦେବାକୁ ଧମକ ଦେଇଥିଲେ ।