କଳାହାଣ୍ଡି : କଳାହାଣ୍ଡି ଜ଼ିଲ୍ଲା ଓ ଛତିଶଗଡ,ରେ ମାଓବାଦୀ ମାନେ,ଦିନ ଥିଲା ହାତରେ ବନ୍ଧୁକ ଧରି ଜଙ୍ଗଲ ଜଙ୍ଗଲ ଘୁରି ବୁଲୁଥିଲେ । ମାଓବାଦ ଦ୍ୱାରା ସମାଜରେ ପରିବର୍ତ୍ତନ ସମ୍ଭବ ବୋଲି ବନ୍ଧୁକ ଧରି ରାଷ୍ଟ୍ର ବିରୁଦ୍ଧରେ ଲଢେଇ ଲଢିବାକୁ ବାହାରି ପଡିଥିଲେ । ତେବେ ସଂଘର୍ଷର ଦିନ ବିତିବା ସହିତ ମନରେ ଯେଉଁ ଅନୁଭବ ଆସିଲା, ବନ୍ଧୁକ ଛାଡି ମୁଖ୍ୟସ୍ରୋତରେ ସାମିଲ ହେବାକୁ ବାଧ୍ୟ ହେଲେ ହାର୍ଡକୋର ନକ୍ସଲ ଭାବେ ପରିଚିତ ରାମଦାସ । ଛତିଶଗଡ ଅଞ୍ଚଳର ଯୁବକ ରାମଦାସ ଗତ ୨୦୦୯ରେ ସାମିଲ ହୋଇଥିଲେ ନକ୍ସଲ ସଂଗଠନରେ । ଛତିଶଗଡ ତଥା ଓଡିଶାର ସୀମାନ୍ତ ଅଞ୍ଚଳରେ ମାଓବାହିନୀରେ ଅନେକ ଅପରେସନରେ ସେ ସକ୍ରିୟ ଭାବେ ସାମିଲ ହେଉଥିଲେ । ତେବେ ସଂଗଠନର ମୁଖ୍ୟମାନେ ମାଓବାଦର ଆଦର୍ଶ ଭୁଲି ତାଙ୍କ ପରି ଯୁବକ ଯୁବତୀମାନଙ୍କୁ ସାମ୍ନାରେ ରଖି ବିଭିନ୍ନ ଅନୈତିକ କାର୍ଯ୍ୟରେ ଲିପ୍ତ ରହିବା ରାମଦାସ ଭଳି ଯୁବକମାନଙ୍କୁ ଭାରି ବାଧୁଥିଲା ।
ତେବେ ଅନ୍ୟ କୌଣସି ଉପାୟ ନପାଇ ସେ ସାତବର୍ଷ ରହିବା ପରେ ୨୦୧୬ ମସିହାରେ ସଂଗଠନରେ ଜଣେ ଯୁବତୀ କଲମଦେଇ ମାଝୀ ସାମିଲ ହେବା ପରେ ରାମଦାସଙ୍କ ମନ ତାଙ୍କ ଆଡକୁ ଢଳିଥିଲା । ତେବେ ନୂଆ କରି ସଂଗଠନରେ ସାମିଲ ହୋଇଥିବା କଲମଦେଇ ସଂଗଠନର କାର୍ଯ୍ୟକଳାପ ଜାଣୁଜାଣୁ ତିନିବର୍ଷ ବିତିସାରିଥିବାବେଳେ ଦୁହିଁଙ୍କ ଭିତରେ ମନ ଦିଆନିଆ ହୋଇ ସାରିଥିଲା । ଶେଷରେ ସଂଗଠନର ମୁଖ୍ୟମାନଙ୍କ ଅନୈତିକ କାରବାର ଓ ହିଂସାତ୍ମକ କାର୍ଯ୍ୟକଳାପ ବିରୁଦ୍ଧରେ ରାମଦାସ ଓ କଲମଦେଇ ବିଦ୍ରୋହ ଘୋଷଣା କରିବା ସହିତ କଳାହାଣ୍ଡି ଏସ୍ପିଙ୍କଠାରେ ଆତ୍ମସମର୍ପଣ କରିଥିଲେ । ଆତ୍ମସପର୍ମଣ କରିବା ପରେ ପୁଲିସ ସେମାନଙ୍କ ପ୍ରତି କୋହଳ ମନୋଭାବ ପୋଷଣ କରିବା ସହିତ ନକ୍ସଲଙ୍କ ଆତ୍ମସମର୍ପଣ ଯୋଜନାରେ ଲାଭ ଦେବାକୁ ସୁଯୋଗ ଦେଇଥିଲା ।
ଏହି ସମୟରେ ହିଁ ଉଭୟଙ୍କ ମଧ୍ୟରେ ପ୍ରେମ ସଂପର୍କ ଥିବା ଜଣାପଡିବା ପରେ କଳାହାଣ୍ଡି ଏସ୍ପି ଡ. ଶ୍ରବଣ ବିବେକ ଏମ୍ ଦୁହିଁଙ୍କୁ ବିବାହ କରାଇଦେବାକୁ ନିଷ୍ପତ୍ତି ନେଇଥିଲେ । ଏହାପରେ ବିଭାଗୀୟ କର୍ତ୍ତୃପକ୍ଷଙ୍କ ସହିତ ଆଲୋଚନା ପରେ କଳାହାଣ୍ଡି ପୁଲିସ ପକ୍ଷରୁ ଆଜି ରାମଦାସ ଓ କଲମଦେଇଙ୍କ ବିବାହ କରାଇଦେଇଥିଲେ । ଏଥିରେ ଦକ୍ଷିଣାଞ୍ଚଳ ଡିଆଇଜିଙ୍କ ସମେତ କଳାହାଣ୍ଡି ଏସ୍ପି ଏବଂ ଜିଲ୍ଲାସ୍ତରୀୟ ପୁଲିସ ବିଭାଗର ସମସ୍ତ ଅଧିକାରୀ ଏଥିରେ ସାମିଲ ହୋଇଥିଲେ । ଉଭୟଙ୍କ ପରିବାର ମଧ୍ୟ ଉପସ୍ଥିତ ରହି ନବବିବାହିତ ଦମ୍ପତିଙ୍କୁ ଆଶୀର୍ବାଦ ଦେଇଥିଲେ । ଏହି ଅବସରରେ କଳାହାଣ୍ଡି ଏସ୍ପି ନକ୍ସଲମାନଙ୍କୁ ବନ୍ଧୁକ ଛାଡି ମୁଖ୍ୟସ୍ରୋତରେ ସାମିଲ ହେବା ସହିତ ସରକାରଙ୍କ ଆତ୍ମସମର୍ପଣ ଯୋଜନାର ଲାଭ ପାଇବାକୁ ଆହ୍ୱାନ ଦେଇଥିଲେ ।
