ନୂଆଦିଲ୍ଲୀ: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଦେହାନ୍ତ ହୋଇଛି। ବିମାନ ଦୁର୍ଘଟଣାରେ ତାଙ୍କର ଦେହାନ୍ତ ହୋଇଥିବା ସୂଚନା ମିଳିଛି। ବାରାମତୀ ବିମାନବନ୍ଦରରେ ଅବତରଣ କରିବା ସମୟରେ ଖସି ପଡିଥିଲା ବିମାନ। ଜିଲ୍ଲା ପରିଷଦ ନିର୍ବାଚନ ପାଇଁ ବାରାମତୀରେ ପ୍ରଚାର ସଭା ଆୟୋଜନ କରାଯାଇଥିଲା। କିନ୍ତୁ, ବାରାମତୀ ବିମାନବନ୍ଦରର ରନୱେରେ ବିମାନଟି ଅବତରଣ କରୁଥିବା ସମୟରେ ହଠାତ୍ ଯାନ୍ତ୍ରିକ ତ୍ରୁଟି ଦେଖାଦେଲା। ଏହା ଯୋଗୁଁ ପାଇଲଟ୍ ନିୟନ୍ତ୍ରଣ ହରାଇଥିଲେ ଏବଂ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା ।
ସୂଚନା ଥାଉକି, ଅଜିତ ପାୱାରଙ୍କ ଜନ୍ମ ୨ ଜୁଲାଇ, ୧୯୯୫ ମସିହାରେ ହୋଇଥିଲା । ସେ ଅହମଦନଗରର ଦେଓଲାଲି ପ୍ରଭରାରେ ତାଙ୍କର ସ୍କୁଲ ଶିକ୍ଷା ସମାପ୍ତ କରିଥିଲେ । ସ୍କୁଲ ଶିକ୍ଷା ପରେ ସେ କଲେଜରେ ପଢିଥିଲେ କିନ୍ତୁ ପିତାଙ୍କ ମୃତ୍ୟୁ ପରେ ପରିବାରକୁ ସାହାଯ୍ୟ କରିବା ପାଇଁ ସେ କଲେଜ ଛାଡିଥିଲେ । ସେ ସୁନେତ୍ର ପାୱାରଙ୍କୁ ବିବାହ କରିଛନ୍ତି, ଯାହାଙ୍କ ସହିତ ତାଙ୍କର ଦୁଇ ପୁଅ, ଜୟ ଏବଂ ପାର୍ଥ ପାୱାର ଅଛନ୍ତି। 1982 ମସିହାରେ, ଅଜିତ ପାୱାର ଏକ ସମବାୟ ଚିନି କାରଖାନାର ବୋର୍ଡକୁ ନିର୍ବାଚିତ ହେବା ପରେ ତାଙ୍କର ରାଜନୈତିକ କ୍ୟାରିଅର ଆରମ୍ଭ କରିଥିଲେ।
ଅଜିତ ପାୱାର ଲଗାତାର ଭାବରେ ମହାରାଷ୍ଟ୍ରର ସବୁଠାରୁ ଦୀର୍ଘ ସମୟ ଧରି ଉପମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ସେ ବିଭିନ୍ନ ସରକାରରେ ଛଅ ଥର ପାଇଁ ଏହି ପଦବୀରେ ରହିଥିଲେ। ସେ ପୃଥ୍ୱୀରାଜ ଚୌହାନ, ଦେବେନ୍ଦ୍ର ଫଡନଭିସ୍ , ଉଦ୍ଧବ ଠାକରେ ଏବଂ ଏକନାଥ ସିନ୍ଦେଙ୍କ କ୍ୟାବିନେଟରେ ଉପମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ୧୯୯୧ ମସିହାରେ ସେ ପୁଣେ ଜିଲ୍ଲା କେନ୍ଦ୍ରୀୟ ସମବାୟ ବ୍ୟାଙ୍କର ଅଧ୍ୟକ୍ଷ ଭାବରେ ନିର୍ବାଚିତ ହୋଇଥିଲେ। ୧୯୯୧ ମସିହାରେ ସେ ପ୍ରଥମ ଥର ପାଇଁ ବାରାମତୀ ସଂସଦୀୟ କ୍ଷେତ୍ରରୁ ଲୋକସଭାକୁ ନିର୍ବାଚିତ ହୋଇଥିଲେ ଏବଂ ପରେ ତାଙ୍କ କାକା ଶରଦ ପାୱାରଙ୍କ ପାଇଁ ଏହି ଆସନଟି ଖାଲି କରିଥିଲେ। ସେ ବାରାମତୀ ବିଧାନସଭା କ୍ଷେତ୍ରରୁ ସାତ ଥର ମହାରାଷ୍ଟ୍ର ବିଧାନସଭାକୁ ନିର୍ବାଚିତ ହୋଇଥିଲେ। ସେ ପ୍ରଥମେ ୧୯୯୧ ମସିହାରେ ଉପନିର୍ବାଚନରେ ଏବଂ ପରବର୍ତ୍ତୀ ସମୟରେ ୧୯୯୫, ୧୯୯୯, ୨୦୦୪, ୨୦୦୯ ଏବଂ ୨୦୧୪ରେ ବିଜୟୀ ହୋଇଥିଲେ।ନଭେମ୍ବର ୨୦୧୯ରେ, ସେ ଏନସିପିରେ ବିଭାଜନ ସୃଷ୍ଟି କରିଥିଲେ ଏବଂ ଭାରତୀୟ ଜନତା ପାର୍ଟିର ନେତୃତ୍ୱାଧୀନ ସରକାରରେ ଯୋଗ ଦେଇଥିଲେ ଏବଂ ଉପମୁଖ୍ୟମନ୍ତ୍ରୀ ହୋଇଥିଲେ। ଫେବୃଆରୀ ୨୦୨୪ରେ, ନିର୍ବାଚନ କମିଶନ ଅଜିତ ପାୱାରଙ୍କ ନେତୃତ୍ୱାଧୀନ ଗୋଷ୍ଠୀକୁ ଦଳର ନାମ ଏବଂ ଚିହ୍ନ ପ୍ରଦାନ କରିଥିଲେ।
