କ୍ରିକେଟ ଷ୍ଟମ୍ପରେ କବାଡି ଖେଳାଳୀଙ୍କୁ ପିଟିପିଟି ହତ୍ୟା କଲେ ଦୁର୍ବୃତ୍ତ

ମୁମ୍ବାଇ: କ୍ରିକେଟ ଷ୍ଟମ୍ପରେ କବାଡି ଖେଳାଳୀଙ୍କୁ ପିଟିପିଟି ହତ୍ୟା କରିଲେ ଦୁର୍ବୃତ୍ତ । ଏଭଳି ଅଭାବନୀୟ ଘଟଣା ଘଟିଛି ମୁମ୍ବାଇ ଧରାୱିରେ । ମୃତ କବାଡି ଖେଳାଳୀ ଜଣକ ହେଲେ ବିମଲରାଜ ନାଦର । ଏହି ଘଟଣାରେ ପୋଲିସ ୩ ଅଭିଯୁକ୍ତଙ୍କୁ ଗିରଫ କରି ସେମାନଙ୍କ ବିରୋଧରେ ହତ୍ୟା ମାମଲା ରୁଜୁ କରିଛି । ବିମଲରାଜ ନାଦର ନାମକ ଜଣେ କବାଡି ଖେଳାଳୀଙ୍କୁ ଶୁକ୍ରବାର ରାତିରେ କିଛି ଦୁର୍ବୃତ୍ତ ଏକୁଟିଆ ପାଇ କ୍ରିକେଟ ଷ୍ଟମ୍ପରେ ପିଟି ପିଟି ଅତି ନିର୍ମମ ଭାବରେ ହତ୍ୟା କରିଛନ୍ତି । ଏହି ଘଟଣାରେ ସମ୍ପୃକ୍ତ ମୁଖ୍ୟ ଅଭିଯୁକ୍ତ ମଲେସ ଚିତକାଣ୍ଡିଙ୍କୁ ଗିରଫ କରିବା ସହିତ ଅନ୍ୟ ଦୁଇ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା ଜାରି ରଖିଛି ଧରାୱି ପୋଲିସ । ପୋଲିସ ଅଭିଯୁକ୍ତଙ୍କୁ ଜେରା କରି ସେମାନଙ୍କ ବିରୋଧରେ ଏକ ହତ୍ୟା ମାମଲା ରୁଜୁ କରିଛି । ବିମଲରାଜ ନାଦର ମୁମ୍ବାଇ ଧରାୱି କାମରାଜ ନଗରରେ ଜଣେ ଆଗ ଧାଡିର କବାଡି ଖେଳାଳୀ । ତେବେ ତାଙ୍କୁ ଏଭଳି ନିର୍ମମ ଭାବେ ହତ୍ୟା ପରେ ରାସ୍ତାକୁ ଓହ୍ଲାଇଛନ୍ତି ସ୍ଥାନୀୟ ବାସିନ୍ଦା । ବିମଲରାଜ ନାଦରଙ୍କୁ ନ୍ୟାୟ ଦାବୀରେ “ଜଷ୍ଟିସ ଫର ବିମଲ” ଲେଖି ରାସ୍ତାରେ ବିକ୍ଷୋଭ ପ୍ରଦର୍ଶନ କରିଛନ୍ତି ପ୍ରଶଂସକ । ତେବେ ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାସୁଝା କରିଥିଲା ।