ଆଇଏସ୍‌ଏଲ୍‌-୭: ରେଡ୍ କାର୍ଡ ସତ୍ତ୍ୱେ ମ୍ୟାଚ୍ ଡ୍ର’ ରଖିଲା ଜେଏଫ୍‌ସି

ଗୋଆ : ଚଳିତ ଆଇଏସ୍‌ଏଲ୍‌-୭ରେ ସୋମବାର ସ୍ଥାନୀୟ ଜିଏମସି ଷ୍ଟାଡିୟମ୍ ବାମ୍ବୋଲିମ୍‌ଠାରେ ଜାମସେଦପୁର ଏଫ୍‌ସି (ଜେଏଫ୍‌ସି) ୧୦ ଜଣ ଖେଳାଳିଙ୍କ ସହ ଖେଳିଥିବା ସତ୍ତ୍ୱେ ମୁମ୍ବାଇ ସିଟି ଏଫ୍‌ସି ସହ ପଏଣ୍ଟ୍ ଭାଗ କରିଛି । ନବମ ମିନିଟ୍‌ରେ ଦଳ ପକ୍ଷରୁ ନେରିଜସ୍ ଭାଲସ୍କିସ୍ ପ୍ରଥମ ଗୋଲ୍ ଦେବା ପରେ ମୁମ୍ବାଇ ସିଟି ପକ୍ଷରୁ ପଞ୍ଚଦଶ ମିନିଟ୍‌ରେ ବାର୍ଥୋଲୋମିଓ ଓଗବେଚେ ସ୍ଥିତି ବରାବର କରିଥିଲେ । ତେବେ ୨୮ତମ ମିନିଟ୍‌ରେ ଆଲଟୋର୍ ମୋନୋରୟଙ୍କୁ ରେଫରୀ ଫାଉଲ୍ କାରଣରୁ ରେଡ୍ କାର୍ଡ ଦେଖାଇବା ଫଳରେ ମୁମ୍ବାଇକୁ ବିଜୟ ପାଇଁ ସୁଯୋଗ ମିଳିଥିଲା । କିନ୍ତୁ ଦଳ ଏହାର ଫାଇଦା ନେଇନପାରିବାରୁ ଏହା ସଂସ୍କରଣରେ ପ୍ରଥମ ଥର ପାଇଁ ପଏଣ୍ଟ୍ ଭାଗ କରିଛି । ଦଳ ୧୩ ପଏଣ୍ଟ୍ ସହ ଶୀର୍ଷରେ କାଏମ ରହିଥିବା ବେଳେ ୭ ପଏଣ୍ଟ୍ ସହ ଜେଏଫ୍‌ସି ଷଷ୍ଠରେ ରହିଛି ।