୨୦୨୪ରେ ଲିଓନଠାରେ ଆୟୋଜିତ ବିଶ୍ୱ ଦକ୍ଷତା ପ୍ରତିଯୋଗିତାରେ ୧୩ତମ ସ୍ଥାନରୁ ଉଠି ଭାରତ ସାଂଘାଇ ୨୦୨୬ରେ ୧୦ମ ସ୍ଥାନକୁ ଆସିଛି
୪୮ତମ ବିଶ୍ୱ ଦକ୍ଷତା ପ୍ରତିଯୋଗିତାର ୬୩ଟି ଦକ୍ଷତା କ୍ଷେତ୍ରରେ ୭୦ ଜଣ ପ୍ରତିଯୋଗୀଙ୍କୁ ନେଇ ସବୁଠାରୁ ବଡ଼ ଭାରତୀୟ ଦଳ ସେମାନଙ୍କ ପ୍ରତିଭା ପ୍ରଦର୍ଶନ କରିଛନ୍ତି
ଯୁବ ଭାରତୀୟ ପ୍ରତିଯୋଗୀମାନେ ଉନ୍ନତ ପ୍ରଯୁକ୍ତିବିଦ୍ୟା, ଉତ୍ପାଦନ, ଇଞ୍ଜିନିୟରିଂ ଏବଂ ବିଶେଷଜ୍ଞ ସେବା କ୍ଷେତ୍ରରେ ଆନ୍ତର୍ଜାତିକ ସ୍ତରର ଦକ୍ଷତା ପ୍ରଦର୍ଶନ କରିଛନ୍ତି
ନୂଆଦିଲ୍ଲୀ: ଚୀନ୍ର ସାଂଘାଇଠାରେ ଶେଷ ହୋଇଛି ୪୮ତମ ବିଶ୍ୱ ଦକ୍ଷତା ପ୍ରତିଯୋଗିତା- ୨୦୨୬। ଏଥିରେ ଟିମ୍ ଇଣ୍ଡିଆ ୬ଟି ରୌପ୍ୟ ପଦକ ଏବଂ ୨୦ଟି ଉତ୍କର୍ଷ ମେଡାଲ ଜିତି ୧୦ମ ସ୍ଥାନ ହାସଲ କରିଛି। ୨୦୨୪ରେ ଲିଓନଠାରେ ଅନୁଷ୍ଠିତ ବିଶ୍ୱ ଦକ୍ଷତା ପ୍ରତିଯୋଗିତାରେ ଭାରତ ଚାରୋଟି ବ୍ରୋଞ୍ଜ ପଦକ ଏବଂ ୧୨ଟି ମେଡାଲ୍ ଫର୍ ଏକ୍ସଲେନ୍ସ ସହ ତ୍ରୟୋଦଶ ସ୍ଥାନ ଅଧିକାର କରିଥିଲା, ଯାହା ତୁଳନାରେ ଏହି ସଫଳତା ବିଶ୍ୱ ସ୍ତରରେ ଦେଶର ଦକ୍ଷ ଯୁବକମାନଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସାବ୍ୟସ୍ତ ହୋଇଛି।
ସାଂଘାଇଠାରେ ଅନୁଷ୍ଠିତ ବିଶ୍ୱ ଦକ୍ଷତା ପ୍ରତିଯୋଗୀତା ୬ଟି ରୌପ୍ୟ ପଦକ ଜିତିଥିବା ପ୍ରତିଯୋଗୀମାନେ ହେଲେ: ବେକରୀରେ ସ୍ମୃତି ନାମ୍ବିଆର; ଡେଣ୍ଟାଲ୍ ପ୍ରୋସ୍ଥେଟିକ୍ସରେ ମହମ୍ମଦ ସଲାମ; ଡିଜିଟାଲ୍ ଇଣ୍ଟରାକ୍ଟିଭ୍ ମିଡିଆ ଡିଜାଇନ୍ରେ କୋବିଦ ଅଜୟ ଗାଙ୍ଗ୍ରାଡେ; ଇଣ୍ଡଷ୍ଟ୍ରିଆଲ୍ ଡିଜାଇନ୍ ଟେକ୍ନୋଲୋଜିରେ ପାର୍ଥ ଭୋହରା; ଲଜିଷ୍ଟିକ୍ସ ଏଣ୍ଡ ଫ୍ରେଟ୍ ଫରୱାର୍ଡିଂରେ ମେହରୁନ୍ନିସା ବେଗମ୍; ଏବଂ ରିଟେଲ୍ ସେଲ୍ସରେ ସାନିଆ ଯୋଶୀ। ସେମାନଙ୍କର ଏହି ସଫଳତା ସୃଜନଶୀଳ, ବୈଷୟିକ ଏବଂ ସେବା କ୍ଷେତ୍ରର ଦକ୍ଷତାକୁ ଆଚ୍ଛାଦିତ କରେ, ଯାହା ବିଶ୍ୱ ସ୍ତରରେ ଭାରତୀୟ ପ୍ରତିଭାର ବ୍ୟାପକତାକୁ ଦର୍ଶାଉଛି।
ଭାରତ ବୈଷୟିକ, ଔଦ୍ୟୋଗିକ, ଡିଜିଟାଲ୍, ସୃଜନଶୀଳ ଏବଂ ସେବା ଦକ୍ଷତା କ୍ଷେତ୍ରରେ ୨୦ଟି ଉତ୍କର୍ଷ ମେଡାଲ ବା ମେଡାଲ୍ ଫର୍ ଏକ୍ସଲେନ୍ସ ମଧ୍ୟ ହାସଲ କରିଛି। ବେକରୀରେ ରୌପ୍ୟ ପଦକ ବିଜେତା ସ୍ମୃତି ନାମ୍ବିଆରଙ୍କୁ ଭାରତ ପାଇଁ ‘ବେଷ୍ଟ ଅଫ୍ ନେସନ୍’ ଭାବରେ ସମ୍ମାନିତ କରାଯାଇଥିଲା।
ସେପ୍ଟେମ୍ବର ୨୨ ରୁ ୨୭ ପର୍ଯ୍ୟନ୍ତ ଅନୁଷ୍ଠିତ ଏହି ଛଅ ଦିନିଆ ଆନ୍ତର୍ଜାତିକ ପ୍ରତିଯୋଗୀତାରେ ପ୍ରାୟ ୭୦ଟି ଦେଶର ୧,୪୦୦ରୁ ଅଧିକ ଯୁବ ପ୍ରତିଯୋଗୀ ଏକାଠି ହୋଇଥିଲେ। ଭାରତର ସର୍ବବୃହତ ୭୦ ଜଣିଆ ପ୍ରତିଯୋଗୀ ଦଳ ୬୩ଟି ଦକ୍ଷତା କ୍ଷେତ୍ରରେ ଭାଗ ନେଇଥିଲେ, ଯେଉଁଥିରେ ସୁବର୍ଣ୍ଣ ପ୍ରଯୁକ୍ତିବିଦ୍ୟା, ଉନ୍ନତ ଉତ୍ପାଦନ, ଇଞ୍ଜିନିୟରିଂ, ସୃଜନଶୀଳ ଶିଳ୍ପ ଏବଂ ବିଶେଷଜ୍ଞ ସେବା ଅନ୍ତର୍ଭୁକ୍ତ ରହିଛି।
୨୩ ରୁ ୨୬ ସେପ୍ଟେମ୍ବର ପର୍ଯ୍ୟନ୍ତ ୪ ଦିନର ପ୍ରତିଯୋଗିତା ପରେ, ୨୭ ସେପ୍ଟେମ୍ବରରେ ସାଂଘାଇଠାରେ ଅନୁଷ୍ଠିତ ଭବ୍ୟ ଉଦ୍ଯାପନୀ ସମାରୋହରେ ବିଜେତାମାନଙ୍କୁ ସମ୍ମାନୀତ କରାଯାଇଥିଲା। ଏହି ସମାରୋହରେ ଅସାଧାରଣ ବୈଷୟିକ ଦକ୍ଷତା, ନବସୃଜନ, ସୂକ୍ଷ୍ମତା ଏବଂ କାରିଗରୀକୁ ଉତ୍ସବ ଭାବେ ପାଳନ କରାଯାଇଥିଲା, ଯେଉଁଥିରେ ସାରା ବିଶ୍ୱରୁ ପ୍ରତିଯୋଗୀ, ଆନ୍ତର୍ଜାତୀୟ ପ୍ରତିନିଧି ଦଳ, ବିଶେଷଜ୍ଞ ଏବଂ ଶିଳ୍ପ ପ୍ରତିନିଧିମାନେ ଏକାଠି ହୋଇଥିଲେ।
ଟିମ୍ ଇଣ୍ଡିଆର ଏହି ପ୍ରଦର୍ଶନ ପାଇଁ ଶୁଭେଚ୍ଛା ଜଣାଇ ଭାରତ ସରକାରଙ୍କ କୌଶଳ ବିକାଶ ଏବଂ ଉଦ୍ୟମିତା ମନ୍ତ୍ରାଳୟର ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଏବଂ ଶିକ୍ଷା ରାଷ୍ଟ୍ରମନ୍ତ୍ରୀ ଶ୍ରୀ ଜୟନ୍ତ ଚୌଧୁରୀ କହିଛନ୍ତି: “ୱାର୍ଲ୍ଡସ୍କିଲ୍ସ ସାଂଘାଇ ୨୦୨୬ରେ ୬ଟି ରୌପ୍ୟ ପଦକ ଏବଂ ୨୦ଟି ମେଡାଲ୍ ଫର୍ ଏକ୍ସଲେନ୍ସ ସହ ଟିମ୍ ଇଣ୍ଡିଆର ଏହି ଆଶାତୀତ ପ୍ରଦର୍ଶନ ଆମର ବିଶ୍ୱସ୍ତରୀୟ ଦକ୍ଷତା ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ଆଗ୍ରଗତି। ଆମର ପୂର୍ବ ପ୍ରଦର୍ଶନକୁ ଅତିକ୍ରମ କରି, ଆମର ଯୁବ ପ୍ରତିଯୋଗୀମାନେ ଭାରତର ଦକ୍ଷ ପ୍ରତିଭାର ବୃଦ୍ଧି ପାଉଥିବା ଶକ୍ତି ଏବଂ ପ୍ରତିଯୋଗିତାମୂଳକତା ପ୍ରଦର୍ଶନ କରିଛନ୍ତି। ଏହି ସଫଳତାରେ ଯୋଗଦାନ ଦେଇଥିବା ପ୍ରତ୍ୟେକ ପ୍ରତିଯୋଗୀ, ବିଶେଷଜ୍ଞ, ପ୍ରଶିକ୍ଷକ ଏବଂ ଶିଳ୍ପ ସହଯୋଗୀଙ୍କୁ ମୁଁ ଅଭିନନ୍ଦନ ଜଣାଉଛି। ପଦକ ବ୍ୟତୀତ, ଆମକୁ ଯାହା ଗର୍ବିତ କରେ ତାହା ହେଉଛି ଆମର ଯୁବକମାନେ ବିଶ୍ୱ ମଞ୍ଚରେ ଯେଉଁ ଆତ୍ମବିଶ୍ୱାସ, ଦୃଢ଼ତା ଏବଂ ଶ୍ରେଷ୍ଠତା ସହିତ ଭାରତର ପ୍ରତିନିଧିତ୍ୱ କରିଛନ୍ତି। ସେମାନଙ୍କର ସଫଳତା ଭବିଷ୍ୟତ ପାଇଁ ପ୍ରସ୍ତୁତ ଦକ୍ଷତା ପରିବେଶ ଗଠନ କରିବା ଏବଂ ପ୍ରତ୍ୟେକ ଯୁବ ଭାରତୀୟଙ୍କୁ ବିଶ୍ୱର ଶ୍ରେଷ୍ଠଙ୍କ ସହ ପ୍ରତିଯୋଗିତା କରିବାର ସୁଯୋଗ ଦେବାର ଆମର ପ୍ରତିବଦ୍ଧତାକୁ ଦୃଢ଼ୀଭୂତ କରେ।”
ଭାରତର ଏହି ସଫଳତା ମାସ ମାସର କଠୋର ପ୍ରସ୍ତୁତି, ବିଶେଷ ପ୍ରଶିକ୍ଷଣ, ମାର୍ଗଦର୍ଶନ ଏବଂ ଆନ୍ତର୍ଜାତିକ ମାନଦଣ୍ଡଦ୍ୱାରା ସମର୍ଥିତ ଆମର ଯୁବ ପ୍ରତିଯୋଗୀମାନଙ୍କ ଉତ୍ସର୍ଗୀକୃତ ଭାବନାକୁ ଦର୍ଶାଉଛି। ଆନ୍ତର୍ଜାତିକ ସ୍ତରରେ ସ୍ଥିରୀକୃତ ୱାର୍ଲ୍ଡସ୍କିଲ୍ସ ମାନଦଣ୍ଡ ତୁଳନାରେ ଉଚ୍ଚ ସ୍ତରର ପେସାଦାର ଦକ୍ଷତା ପ୍ରଦର୍ଶନ କରୁଥିବା ପ୍ରତିଯୋଗୀମାନଙ୍କୁ ‘ମେଡାଲ୍ ଫର୍ ଏକ୍ସଲେନ୍ସ’ ବା ଉତ୍କର୍ଷ ମେଡାଲ ପ୍ରଦାନ କରାଯାଏ।
ଏହି ପ୍ରତିଯୋଗିତା ମାଧ୍ୟମରେ ମିଳିଥିବା ଆନ୍ତର୍ଜାତିକ ଅନୁଭୂତି ବିଷୟରେ ନିଜର ମତାମତ ସେୟାର କରି ୱାର୍ଲ୍ଡସ୍କିଲ୍ସ ଇଣ୍ଡିଆର ପ୍ରାଧିକୃତ ପ୍ରତିନିଧି ତଥା ଭାରତ ସରକାରଙ୍କ କୌଶଳ ବିକାଶ ଏବଂ ଉଦ୍ୟମିତା ମନ୍ତ୍ରାଳୟର ବରିଷ୍ଠ ଅର୍ଥନୈତିକ ପରାମର୍ଶଦାତା ଶ୍ରୀମତୀ ମନୀଷା ସେନ୍ସର୍ମା କହିଛନ୍ତି: “ୱାର୍ଲ୍ଡସ୍କିଲ୍ସ ଯେତିକି ପ୍ରତିଯୋଗିତା ବିଷୟରେ, ସେତିକି ଶିଖିବା ବିଷୟରେ ମଧ୍ୟ। ସାଂଘାଇ ଆମର ପ୍ରତିଯୋଗୀ ଏବଂ ବିଶେଷଜ୍ଞମାନଙ୍କୁ ବିକଶିତ ହେଉଥିବା ବିଶ୍ୱସ୍ତରୀୟ ବୃତ୍ତିଗତ ମାନଦଣ୍ଡ, ନୂତନ ପ୍ରଯୁକ୍ତିବିଦ୍ୟା ଏବଂ ଆନ୍ତର୍ଜାତୀୟ ସର୍ବୋତ୍ତମ ଅଭ୍ୟାସ ସହିତ ପରିଚିତ ହେବାର ମୂଲ୍ୟବାନ ସୁଯୋଗ ଦେଇଛି। ଆମର ବର୍ତ୍ତମାନର ଲକ୍ଷ୍ୟ ହେଉଛି ଏହି ଶିକ୍ଷାଗୁଡ଼ିକୁ ମଜବୁତ ପ୍ରଶିକ୍ଷଣ ପଦ୍ଧତି, ଉନ୍ନତ ମୂଲ୍ୟାଙ୍କନ ମାନଦଣ୍ଡ ଏବଂ ଗଭୀର ଶିଳ୍ପ ଭାଗିଦାରୀରେ ପରିଣତ କରିବା, ଯାହାଦ୍ୱାରା ଏହି ଅନୁଭୂତିର ଲାଭ ପ୍ରତିଯୋଗିତା ବାହାରେ ଭାରତର ବୃହତ୍ତର ଦକ୍ଷତା ପରିବେଶ ପର୍ଯ୍ୟନ୍ତ ବିସ୍ତୃତ ହୋଇପାରିବ।”
ଚଳିତ ବର୍ଷ ଭାରତର ଅଂଶଗ୍ରହଣରେ ଏକ ଗୁରୁତ୍ୱପୂର୍ଣ୍ଣ ବୈଶିଷ୍ଟ୍ୟ ଥିଲା ୧୧ଟି ନୂତନ ଏବଂ ଉଦୀୟମାନ ଦକ୍ଷତା ବର୍ଗରେ ଭାଗ ନେବା। ଏହି ବର୍ଗଗୁଡ଼ିକ ମଧ୍ୟରେ ଡେଣ୍ଟାଲ୍ ପ୍ରୋସ୍ଥେଟିକ୍ସ, ଡିଜିଟାଲ୍ ଇଣ୍ଟରାକ୍ଟିଭ୍ ମିଡିଆ ଡିଜାଇନ୍, ଇଣ୍ଟେଲିଜେଣ୍ଟ ସିକ୍ୟୁରିଟି ଟେକ୍ନୋଲୋଜି, ଲ୍ୟାଣ୍ଡସ୍କେପ୍ ଗାର୍ଡେନିଂ, ଅପ୍ଟୋଇଲେକ୍ଟ୍ରୋନିକ୍ ଟେକ୍ନୋଲୋଜି, ରିଟେଲ୍ ସେଲ୍ସ, ଅନମ୍ୟାନ୍ଡ ଏରିଆଲ୍ ସିଷ୍ଟମ୍ସ (ଡ୍ରୋନ୍), ଇଣ୍ଡଷ୍ଟ୍ରିଆଲ୍ ମେକାନିକ୍ସ, ସଫ୍ଟୱେର୍ ଟେଷ୍ଟିଂ, ହେଭି ଭେହିକିଲ୍ ଟେକ୍ନୋଲୋଜି ଏବଂ ଏୟାରକ୍ରାଫ୍ଟ ମେଣ୍ଟେନାନ୍ସ ଅନ୍ତର୍ଭୁକ୍ତ।
ଏହିସବୁ ବିଶେଷ ବର୍ଗରେ ଭାରତର ପ୍ରବେଶ, ଦେଶର ଦକ୍ଷତା ପରିବେଶର ବଦଳୁଥିବା ସ୍ୱରୂପକୁ ଦର୍ଶାଉଛି, ଯେଉଁଥିରେ ଭବିଷ୍ୟତ-ଆଧାରିତ ବୃତ୍ତି, ନୂତନ ପ୍ରଯୁକ୍ତିବିଦ୍ୟା ଏବଂ ଶିଳ୍ପ-ସଞ୍ଚାଳିତ ଦକ୍ଷତା ଉପରେ ଅଧିକ ଗୁରୁତ୍ୱ ଦିଆଯାଉଛି।
ବିଭିନ୍ନ ବୈଷୟିକ, ସୃଜନଶୀଳ ଏବଂ ସେବା-ଆଧାରିତ ବର୍ଗରେ ମହିଳାଙ୍କ ଭାଗିଦାରୀ ଅନ୍ୟ ଏକ ଗୁରୁତ୍ୱପୂର୍ଣ୍ଣ ଦିଗ ଥିଲା। କେମିକାଲ୍ ଲାବୋରେଟରୀ ଟେକ୍ନୋଲୋଜି, ଲଜିଷ୍ଟିକ୍ସ ଏଣ୍ଡ ଫ୍ରେଟ୍ ଫରୱାର୍ଡିଂ ରୁ ଆରମ୍ଭ କରି ଫ୍ୟାଶନ୍ ଟେକ୍ନୋଲୋଜି, ଭିଜୁଆଲ୍ ମରଚେଣ୍ଡାଇଜିଂ, ହେଲ୍ଥ ଏଣ୍ଡ ସୋସିଆଲ୍ କେୟାର, ହୋସପିଟାଲିଟି ଏବଂ ଅନ୍ୟାନ୍ୟ ବିଶେଷ ବୃତ୍ତି ପର୍ଯ୍ୟନ୍ତ ବିଭିନ୍ନ ଦକ୍ଷତା କ୍ଷେତ୍ରରେ ମହିଳା ପ୍ରତିଯୋଗୀମାନେ ଭାରତର ପ୍ରତିନିଧିତ୍ୱ କରିଥିଲେ, ଯାହା ବୃତ୍ତିଗତ ଶିକ୍ଷା ଏବଂ ଦକ୍ଷତା ବିକାଶରେ ମହିଳାମାନଙ୍କ ପାଇଁ ବୃଦ୍ଧି ପାଉଥିବା ସୁଯୋଗକୁ ଦର୍ଶାଉଛି।
ବିଶ୍ୱ ଦକ୍ଷତା ପ୍ରତିଯୋଗୀତା, ସାଂଘାଇ-୨୦୨୬ରେ ଭାରତର ଭାଗିଦାରୀକୁ କୌଶଳ ବିକାଶ ଏବଂ ଉଦ୍ୟମିତା ମନ୍ତ୍ରାଳୟର ତତ୍ତ୍ୱାବଧାନରେ ନ୍ୟାସନାଲ୍ ସ୍କିଲ୍ ଡେଭେଲପମେଣ୍ଟ କୋର୍ପୋରେସନ୍ ଦ୍ୱାରା ସଂଯୋଜିତ କରାଯାଇଥିଲା, ଯେଉଁଥିରେ ସେକ୍ଟର ସ୍କିଲ୍ କାଉନ୍ସିଲ୍, ଶିଳ୍ପ ସହଯୋଗୀ, ପ୍ରଶିକ୍ଷଣ ଅନୁଷ୍ଠାନ, ବୈଷୟିକ ବିଶେଷଜ୍ଞ ଏବଂ ଅନ୍ୟାନ୍ୟ ସଂସ୍ଥାଗୁଡ଼ିକର ସହଯୋଗ ରହିଥିଲା।
ଏହି ପ୍ରତିଯୋଗିତା ଭାରତୀୟ ପ୍ରତିଯୋଗୀ ଏବଂ ବିଶେଷଜ୍ଞମାନଙ୍କୁ ମୂଲ୍ୟବାନ ଆନ୍ତର୍ଜାତୀୟ ଅନୁଭୂତି ପ୍ରଦାନ କରିବା ସହ ବିଶ୍ୱସ୍ତରୀୟ ବୃତ୍ତିଗତ ମାନଦଣ୍ଡ, ଉଦୀୟମାନ ପ୍ରଯୁକ୍ତିବିଦ୍ୟା ଏବଂ ଆନ୍ତର୍ଜାତୀୟ ସର୍ବୋତ୍ତମ ଅଭ୍ୟାସ ବିଷୟରେ ଧାରଣା ଦେଇଛି, ଯାହା ଭାରତର ପ୍ରଶିକ୍ଷଣ ଏବଂ ମୂଲ୍ୟାଙ୍କନ ପରିବେଶକୁ ମଜବୁତ କରିବାରେ ଯୋଗଦାନ ଦେଇପାରିବ।
ବିଶ୍ୱ ଦକ୍ଷତା ପ୍ରତିଯୋଗିତା, ସାଂଘାଇ ୨୦୨୬ ଶେଷ ହେବା ସହ, ଟିମ୍ ଇଣ୍ଡିଆର ପ୍ରଦର୍ଶନ କେବଳ ଜିତିଥିବା ପଦକଗୁଡ଼ିକୁ ନୁହେଁ, ବରଂ ବିଶ୍ୱର ପ୍ରମୁଖ ଦକ୍ଷତା ମଞ୍ଚରେ ଦେଶର ପ୍ରତିନିଧିତ୍ୱ କରିଥିବା ୭୦ ଜଣ ଯୁବ ଭାରତୀୟଙ୍କ ନିଷ୍ଠା, ଦୃଢ଼ତା ଏବଂ ଆକାଂକ୍ଷାକୁ ମଧ୍ୟ ସମ୍ମାନିତ କରେ। ଏହି ସଫଳତାଗୁଡ଼ିକ ଏକ ଦକ୍ଷ, ଆତ୍ମବିଶ୍ୱାସୀ ଏବଂ ଭବିଷ୍ୟତ ପାଇଁ ପ୍ରସ୍ତୁତ କାର୍ଯ୍ୟବଳୀ ଗଠନ ପାଇଁ ଗୁଣାତ୍ମକ ଦକ୍ଷତା ବିକାଶ, ଶିଳ୍ପ ସହଯୋଗିତା ଏବଂ ବିଶ୍ୱସ୍ତରୀୟ ମାନଦଣ୍ଡରେ କ୍ରମାଗତ ନିବେଶର ଗୁରୁତ୍ୱକୁ ପୁନଃପ୍ରତିପାଦିତ କରେ।
ବିଶ୍ୱଦକ୍ଷତା ପ୍ରତିଯୋଗିତା ବିଷୟରେ: ଏହା ହେଉଛି ବିଶ୍ୱର ପ୍ରମୁଖ ଆନ୍ତର୍ଜାତିକ ଦକ୍ଷତା ପ୍ରତିଯୋଗିତା, ଯାହା ଅଂଶଗ୍ରହଣକାରୀ ଦେଶ ଏବଂ ଅଞ୍ଚଗୁଡ଼ିକର ଯୁବ ପେସାଦାରମାନଙ୍କୁ ବିଭିନ୍ନ ପ୍ରକାରର ବୃତ୍ତିଗତ ଏବଂ ବୈଷୟିକ ଦକ୍ଷତାରେ ଶ୍ରେଷ୍ଠତା ପ୍ରଦର୍ଶନ କରିବା ପାଇଁ ଏକାଠି କରେ। ପ୍ରତି ଦୁଇ ବର୍ଷରେ ଅନୁଷ୍ଠିତ ହେଉଥିବା ଏହି ପ୍ରତିଯୋଗିତା ଆନ୍ତର୍ଜାତୀୟ ମାନଦଣ୍ଡକୁ ପ୍ରୋତ୍ସାହିତ କରେ, ଜ୍ଞାନର ଆଦାନପ୍ରଦାନକୁ ସୁଗମ କରେ ଏବଂ ଯୁବପିଢ଼ିଙ୍କୁ ଦକ୍ଷତା-ଆଧାରିତ କ୍ୟାରିଅର୍ ଆପଣେଇବାକୁ ପ୍ରେରଣା ଦିଏ।
ଟିମ୍ ଇଣ୍ଡିଆର ପଦକ ଏବଂ ଉତ୍କର୍ଷ ମେଡାଲ୍ ବିଜେତାଙ୍କ ସମ୍ପୂର୍ଣ୍ଣ ତାଲିକା
ବେଷ୍ଟ ଅଫ୍ ନେସନ୍: ସ୍ମୃତି ନାମ୍ବିଆର — ବେକରୀ (ରୌପ୍ୟ ପଦକ)।
ରୌପ୍ୟ ପଦକ ବିଜେତାମାନେ:
କ୍ରମ ଦକ୍ଷତା ବର୍ଗ ପ୍ରତିଯୋଗୀ
୧ ବେକରୀ ସ୍ମୃତି ନାମ୍ବିଆର
୨ ଡେଣ୍ଟାଲ୍ ପ୍ରୋସ୍ଥେଟିକ୍ସ ମହମ୍ମଦ ସଲାମ
୩ ଡିଜିଟାଲ୍ ଇଣ୍ଟରାକ୍ଟିଭ୍ ମିଡିଆ ଡିଜାଇନ୍ କୋବିଦ ଅଜୟ ଗାଙ୍ଗ୍ରାଡେ
୪ ଇଣ୍ଡଷ୍ଟ୍ରିଆଲ୍ ଡିଜାଇନ୍ ଟେକ୍ନୋଲୋଜି ପାର୍ଥ ଭୋରା
୫ ଲଜିଷ୍ଟିକ୍ସ ଏଣ୍ଡ ଫ୍ରେଟ୍ ଫରୱାର୍ଡିଂ ମେହରୁନ୍ନିସା ବେଗମ୍
୬ ରିଟେଲ୍ ସେଲ୍ସ ସାନିଆ ଯୋଶୀ
ମେଡାଲ୍ ଫର୍ ଏକ୍ସଲେନ୍ସ ବିଜେତାମାନଙ୍କର ସମ୍ପୂର୍ଣ୍ଣ ତାଲିକା:
କ୍ରମ ଦକ୍ଷତା ବର୍ଗ ପ୍ରତିଯୋଗୀ
୧ ଇଣ୍ଟେଲିଜେଣ୍ଟ ସିକ୍ୟୁରିଟି ଟେକ୍ନୋଲୋଜି ରାଗୁଲ କାନ୍ଥାମ୍ମା ବାଲରାଜ
୨ ମେକାଟ୍ରୋନିକ୍ସ ଦୀପୁ ମୁଦିଗେରେପାଲ୍ୟା ଶ୍ରୀନିବାସ, ଜୟନ୍ତ କରିୟପ୍ପା
୩ ମୋବାଇଲ୍ ଆପ୍ଲିକେସନ୍ସ ଡେଭେଲପମେଣ୍ଟ ଅର୍ଜୁନ ସୁମତି ବିଜୟଭାସ୍କର
୪ ଇଲେକ୍ଟ୍ରିକାଲ୍ ଇନ୍ଷ୍ଟଲେସନ୍ସ ଧନୁଷ ମାଧୁଗିରି ଗୋବିନ୍ଦରାଜୁ
୫ ପ୍ଲାଷ୍ଟରିଂ ଏଣ୍ଡ ଡ୍ରାଇୱାଲ୍ ସିଷ୍ଟମ୍ସ ସୁରେନ୍ଥିରନ୍ ମଣି
୬ ପେଣ୍ଟିଂ ଏଣ୍ଡ ଡେକୋରେଟିଂ ମୁସ୍କାନ୍
୭ ଅଟୋନୋମସ୍ ମୋବାଇଲ୍ ରୋବୋଟିକ୍ସ ଆଦିତ୍ୟ ପ୍ରକାଶ, ଦେବାଶିଷ ପଣ୍ଡା
୮ କ୍ୟାବିନେଟ୍ମେକିଂ
ଯଶବନ୍ତ ଚାରି କେଶୋଜୁ
୯ ଜୁଏଲରୀ ଜୟ ଦାସ
୧୦ ବିୟୁଟି ଥେରାପି ତାହେସିନ୍ ସାବିର ସୁତାର
୧୧ ଫ୍ୟାଶନ୍ ଟେକ୍ନୋଲୋଜି ବିଧି ନୀରବକୁମାର ସୁତାର
୧୨ ଅଟୋମୋବାଇଲ୍ ଟେକ୍ନୋଲୋଜି ମହମ୍ମଦ ସେରାଜ
୧୩ କାର୍ ପେଣ୍ଟିଂ କୈଫ୍ ଖାନ୍
୧୪ ଆଇଟି ନେଟୱର୍କ ସିଷ୍ଟମ୍ସ ଆଡମିନିଷ୍ଟ୍ରେସନ୍ – ଖୁସରାଜ ନିମେଷ ରାଠୋଡ୍
୧୫ ଗ୍ରାଫିକ୍ ଡିଜାଇନ୍ ଟେକ୍ନୋଲୋଜି ରାଜୀବ ଲୋଚନ ଚାନ୍ଦ
୧୬ ହେଲ୍ଥ ଏଣ୍ଡ ସୋସିଆଲ୍ କେୟାର ବିଷ୍ଣୁପ୍ରିୟା ସୁନୀଲ
୧୭ ଇଣ୍ଡଷ୍ଟ୍ରୀ ୪.୦ ମଲ୍ଲିନାଥ, ସୁହାନ ମାସ୍କାରେନ୍ହାସ
୧୮ କେମିକାଲ୍ ଲାବୋରେଟରୀ ଟେକ୍ନୋଲୋଜି ସମ୍ପଦା ଦେଶାଇ
୧୯ ଆଡିଟିଭ୍ ମ୍ୟାନୁଫ୍ୟାକ୍ଚରିଂ ପବନ ଭଦ୍ରାବତୀ ସୁରେଶ
୨୦ ରୋବୋଟ୍ ସିଷ୍ଟମ୍ସ ଇଣ୍ଟିଗ୍ରେସନ୍ ଅଭିଷେକ ସୋମାନ୍ନା ଶିଗ୍ନାଲି, ବିନୟ ମୁତ୍ତାୟା ହିରେମଠ
