ଭୁବନେଶ୍ୱର: ରାଜ୍ୟକୁ ଟଳିଛି ବଡ ବର୍ଷା ଭୟ । ହେଲେ ବଢିଛି ବନ୍ୟା ଭୟ । ତିନିଦିନ ଧରି ଲଗାଣ ବର୍ଷା ଫଳରେ ରାଜ୍ୟର ବିଭିନ୍ନ ନଦୀରେ ବନ୍ୟାଜଳ ପ୍ରବେଶ କରିଛି । ଫଳରେ ବନ୍ୟା ପରିସ୍ଥିତି ସଙ୍ଗୀନ ହୋଇଛି । ତଳିଆ ଅଞ୍ଚଳ ବର୍ଷା ଜଳରେ ବୁଡି ରହିଥିବାବେଳେ ଏପଟେ ଫୁଲୁଛି ନଦୀ । ତେବେ ବର୍ତ୍ତମାନ ରାଜ୍ୟକୁ ପ୍ରବଳ ବର୍ଷା ଭୟ ନ ଥିବା ସୂଚନା ଦେଇଛି ଆଞ୍ଚଳିକ ପାଣିପାଗ ବିଭାଗ ।
ପାଣିପାଗ ବିଭାଗ ସୂଚନା ଅନୁଯାୟୀ, ଉପକୂଳରେ ବର୍ଷା କମିଥିଲେ ହେଁ ପଶ୍ଚିମ ଓଡ଼ିଶାରେ ବର୍ଷା ଜାରି ରହିଛି । ମଙ୍ଗଳବାର ବୌଦ୍ଧରେ ସର୍ବାଧିକ ୩୯୦.୬ ମିମି ବର୍ଷା ହୋଇଥିବା ରେକର୍ଡ କରାଯାଇଥିଲା । ବୌଦ୍ଧରେ ପ୍ରବଳ ବର୍ଷା ଯୋଗୁ ସଙ୍ଗୀନ ସ୍ଥିତି ଦେଖା ଦେଇଛି । ମହାନଦୀ ଫୁଲୁଥିବାରୁ ହରଭଙ୍ଗା ବ୍ଲକର ୨୦ରୁ ଅଧିକ ଗାଁକୁ ଯୋଗାଯୋଗ ବିଚ୍ଛିନ୍ନ ହୋଇଛି । ସେହିପରି ଜଗନ୍ନାଥ ସଡକରେ ୫ ଫୁଟର ବନ୍ୟପାଣି ଲହଡା ମାରୁଛି । ଅନେକ ପଞ୍ଚାୟତ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି ।
ଲଗାଣ ବର୍ଷା ଯୋଗୁଁ ସାରା ରାଜରେ ସାଂଘାତିକ ସ୍ଥିତି ସୃଷ୍ଟି ହୋଇଛି । ଅନଗୁଳ ଆଠମଲ୍ଲିକ ମୁଖ୍ୟ ରାସ୍ତା ଝରଝରି ଘାଟିରୁ ଖସୁଛି ମାଟି ଅତଡ଼ା । ଆଠମଲ୍ଲିକ ପାହାଡ଼ିଆ ରାସ୍ତାର ୪ଟି ସ୍ଥାନରେ ମାଟି ଅତଡ଼ା ଖସି ରାସ୍ତା ସମ୍ପୂଣ୍ଣ ଅବରୋଧ ହୋଇପଡ଼ିଥିଲା । ପ୍ରଶାସନ ପକ୍ଷରୁ ଜେସିବି ମେସିନ୍ ଦ୍ୱାରା ପଥର ଓ ମାଟି ସଫା କରାଯାଇଛି ।
