ଲକ୍ଷ୍ନୌ: ଉତ୍ତରପ୍ରଦେଶ ଗାଜିଆବାଦରେ ମହିଳାଙ୍କୁ ହତ୍ୟା କରି ଗିରଫ ହେଲେ ବାପ ପୁଅ । ଅଭିଯୁକ୍ତ ବ୍ୟକ୍ତି ଜଣକ ମୃତ ମହିଳାଙ୍କ ସହିତ ଅନୈତିକ ସମ୍ବନ୍ଧ ରଖିଥିବା ନେଇ ମଧ୍ୟ ସୂଚନା ମିଳିଛି । ମହିଳାଙ୍କୁ ହତ୍ୟା କରିବା ପରେ ସେମାନେ ଏହାକୁ ଦୁର୍ଘଟଣାର ରୂପ ଦେବାକୁ ଉଦ୍ୟମ କରିଥିଲେ । ଟ୍ରାକ୍ଟର ତଳେ ଚାପି ହୋଇ ମହିଳାଙ୍କ ମୃତ୍ୟୁ ହୋଇଥିବା ନେଇ ଦର୍ଶାଇଥିଲେ । ମାତ୍ର ଶେଷରେ ତାଙ୍କର ଅପରାଧ ସାମନାକୁ ଆସିଛି । ପୋଲିସ ବାପ ପୁଅଙ୍କୁ ଗିରଫ କରିଛି । ଏହି ଘଟଣାଟି ଗାଜିଆବାଦର ସିଭିଲ ଲାଇନ ଥାନା ଅଞ୍ଚଳରେ ଘଟିଛି । ଅଭିଯୁକ୍ତ ଦ୍ୱୟ ହେଉଛନ୍ତି ଚରଣ ସିଂ ଓ ୨୪ ବର୍ଷୀୟ ପୁଅ ରୋହିତ । ଗତ ଜାନୁଆରୀ ୧୭ ତାରିଖରେ ଜଣେ ଗୁରୁତର ଅବସ୍ଥାରେ ରାସ୍ତାରେ ପଡ଼ିଥିବା ମହିଳାଙ୍କ ସମ୍ପର୍କରେ ପୋଲିସ ଖବର ପାଇଥିଲା । ଏହାପରେ ତାଙ୍କୁ ଉଦ୍ଧାର କରାଯାଇ ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଥିଲା ।
ଏହାପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହାପରେ ଜଣେ ଯୁବକ ପୋଲିସ ନିକଟକୁ ଆସି ଏହା ଏକ ଦୁର୍ଘଟଣା ଓ ସେ ଦୁର୍ଘଟଣା ବେଳେ ଉପସ୍ଥିତ ଥିବା ନେଇ କହିଥିଲା । ମହିଳା ଜଣକ ଏକ ଟ୍ରାକ୍ଟର ଦ୍ୱାରା ଧକ୍କା ଖାଇବା ପରେ ମୃତ୍ୟୁବରଣ କରିଥିବା ପୋଲିସକୁ ସେ କହିଥିଲା । ପ୍ରାଥମିକ ତଦନ୍ତ ସମୟରେ ମଧ୍ୟ ପୋଲିସ ଏହା ବିଶ୍ୱାସ କରିନେଇଥିଲା ଯେ ମହିଳାଙ୍କ ମୃତ୍ୟୁ ଦୁର୍ଘଟଣା ଜନିତ । ମାତ୍ର ମହିଳାଙ୍କ ମୃତଦେହ ବ୍ୟବଚ୍ଛେଦ ପରେ ଏହା ଏକ ହତ୍ୟାକାଣ୍ଡ ବୋଲି ଜଣାପଡ଼ିଥିଲା । ଏନେଇ ଡିସିପି ନିପୁନ ଅଗ୍ରୱାଲ କହିଛନ୍ତି, “ବ୍ୟବଚ୍ଛେଦ ରିପୋର୍ଟରୁ ଜଣାପଡ଼ିଛି ଯେ ମହିଳାଙ୍କୁ ହତ୍ୟା କରାଯାଇଛି । ଏହାପରେ ତାଙ୍କ ଶରୀରକୁ କ୍ଷତାକ୍ତ କରାଯାଇଥିଲା । ଯାହାଦ୍ୱାରା ଏହା ଏକ ଦୁର୍ଘଟଣା ବୋଲି ଜଣାପଡ଼ିବ ।
