ଆଜି ଦିଲ୍ଲୀ ଘେରିବେ ଚାଷୀ

ନୂଆଦିଲ୍ଲୀ : ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍‌ଏସ୍‌ପି) ଗ୍ୟାରେଣ୍ଟି ଆଇନ ନେଇ ସରକାରଙ୍କ ସହ ଚତୁର୍ଥ ପର୍ଯ୍ୟାୟ ଆଲୋଚନା ବିଫଳ ହେବା ପରେ ବଡ଼ ଧରଣର ଆନ୍ଦୋଳନ ପାଇଁ ଚାଷୀ ସଂଗଠନଗୁଡ଼ିକ ପ୍ରସ୍ତୁତି ଆରମ୍ଭ କରିଦେଇଛନ୍ତି। ବୁଧବାରଠାରୁ ପୁଣି ‘ଦିଲ୍ଲୀ ଚଲୋ’ ଅଭିଯାନକୁ ଜୋରଦାର କରିବା ପାଇଁ ଚାଷୀ ସଂଗଠନଗୁଡ଼ିକ ନିଷ୍ପତ୍ତି ନେଇ ଶମ୍ଭୁ ସୀମାରେ ସମବେତ ହେଉଛନ୍ତି। ଟ୍ରାଫିକ ଚଳାଚଳକୁ ନିୟନ୍ତ୍ରଣ କରିବା ପାଇଁ ରାଜପୁରା ଓ ଏହାର ଆଖପାଖ ଅଞ୍ଚଳରେ ବ୍ୟାପକ ପୁଲିସ ମୁତୟନ କରାଯାଇଛି। ଶମ୍ଭୁରେ ଡ୍ୟୁଟିରେ ଥିବା ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି, କୃଷକ ସଂଗଠନଗୁଡ଼ିକ ସେମାନଙ୍କ ନିଷ୍ପତ୍ତିର ପୁନର୍ବିଚାର କରିବା ଅସମ୍ଭବ ମନେ ହେଉଛି କାରଣ ସେମାନେ ବୁଧବାର ଦିଲ୍ଲୀ ଅଭିମୁଖେ ଯାତ୍ରା କରିବାକୁ ଘୋଷଣା କରିସାରିଛନ୍ତି। ସୋମବାର ଦିନସାରା ବିଚାରବିମର୍ଶ ଓ ଆଲୋଚନା ପରେ କୃଷକ ସଂଗଠନଗୁଡ଼ିକ ଏମ୍‌ଏସ୍‌ପିରେ କପା ଓ ମକା ବ୍ୟତୀତ ତିନି ପ୍ରକାର ଡାଲି କିଣିବା ପାଇଁ କେନ୍ଦ୍ରର ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ। ଫେବ୍ରୁଆରି ୨୧ ତାରିଖ ପୂର୍ବାହ୍ଣ ୧୧ଟାରେ ‘ଦିଲ୍ଲୀ ଚଲୋ’ ପଦଯାତ୍ରା ଆରମ୍ଭ ହେବ ବୋଲି କୃଷକ ନେତାମାନେ ଘୋଷଣା କରିଛନ୍ତି। ‘ସରକାର ଏହି ପ୍ରସଙ୍ଗରେ ବିଳମ୍ବ କରୁଛନ୍ତି ଏବଂ ଯଦି ସେମାନେ ସମସ୍ତ ୨୩ଟି ଫସଲର ଏମ୍‌ଏସ୍‌ପି ବିଷୟରେ ଲିଖିତ ଭାବେ ପ୍ରତିଶ୍ରୁତି ନ ଦିଅନ୍ତି, ତେବେ ପ୍ରତିବାଦ କରିବା ଛଡ଼ା ଆମ ପାଖରେ ଅନ୍ୟ କୌଣସି ବିକଳ୍ପ ନାହିଁ।