ଟିଟିଲାଗଡ଼ : ଟିଟିଲାଗଡ଼ ପୌର ପରିଷଦର ୨ ନମ୍ବର ୱାର୍ଡର ୪ ନମ୍ବର ବୁଥରେ ଏକ ଦମ୍ପତି ଲକ୍ଷ୍ମଣ ବାଗ ଏବଂ ତାଙ୍କ ଧର୍ମପତ୍ନୀ ଭୋଟ ଦାନ କରିବାକୁ ଆସିଥିବା ବେଳେ ତୁମ ଭୋଟ ଅନ୍ୟ ଜଣେ ଦେଇଛି ବୋଲି ବୁଥରେ ନିୟୋଜିତ ନିର୍ବାଚନ ଅଧିକାରୀ ଏହା କହି ଫେରାଇଥିବା ନେଇ ଅଭିଯୋଗ ହୋଇଛି । ଏହାକୁ ନେଇ ବୁଥରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା । ବିଜେପି ପୌର ଅଧ୍ୟକ୍ଷ ପ୍ରାର୍ଥୀନୀ ମମତା ଜୈନଙ୍କ ସ୍ୱାମୀ ନବୀନ ଜୈନ, ବଲାଙ୍ଗୀର ସାଂସଦଙ୍କ ପ୍ରତିନିଧି ଗୁଲାବ ସୋନି, ଦଳର ଜିଲା ସାଧାରଣ ସମ୍ପାଦକ ମୁକେଶ ଜୈନଙ୍କ ସମେତ ବହୁ ବିଜେପି ନେତା ଉକ୍ତ ବୁଥକୁ ଯାଇ ଭୋଟ ଦାନରେ ଅନିୟମିତତା ଚାଲିଥିବା ଅଭିଯୋଗ କରିଥିଲେ ।
ଖବର ପାଇ ଭାରପ୍ରାପ୍ତ ମାଜିଷ୍ଟ୍ରେଟ କର୍ଣ ମଲ୍ଲିକ, ଟିଟିଲାଗଡ଼ ଅତିରିକ୍ତ ଜିଲା ଆରକ୍ଷୀ ଅଧିକ୍ଷକ ସୁରେନ୍ଦ୍ର ନାଥ ଶତପଥି, ଥାନା ଅଧିକାରୀ ରଞ୍ଜନ ବରିହା, ମୁରିବାହାଲ ଥାନା ଅଧିକାରୀ ଜ୍ୟୋତିରାଣୀ ଦାଶ ପହଞ୍ଚି ଶାନ୍ତି ଶୃଙ୍ଖଳା ରକ୍ଷା କରିଥିଲେ । ପରେ ବିଜେପି ନେତାଙ୍କ ଦାବିରେ ନିର୍ବାଚନ ଅଧିକାରୀ ଉକ୍ତ ଦମ୍ପତିଙ୍କୁ ଟେଣ୍ଡର ଭୋଟ ପାଇଁ ଅନୁମତି ଦେଇଥିବା ବୁଥରେ ନିୟୋଜିତ ନିର୍ବାଚନ ଅଧିକାରୀ ପ୍ରଦୀପ୍ତ ରଥ କହିଛନ୍ତି । ଭାରପ୍ରାପ୍ତ ମାଜିଷ୍ଟ୍ରେଟ କର୍ଣ ମଲ୍ଲିକ ଦମ୍ପତିଙ୍କୁ ଅନ୍ୟ ହିସାବରେ ଭୋଟ ଦେବା ସୁଯୋଗ ଦିଆଗଲା ବୋଲି କହିଛନ୍ତି । ପୌରାଞ୍ଚଳର ଅନେକ ୱାର୍ଡରେ ମିଥ୍ୟା ଭୋଟ ହୋଇଥିବା, ଅନେକ ଭୋଟର ମତଦାନ କେନ୍ଦ୍ରକୁ ପହଞ୍ଚିବା ପୂର୍ବରୁ ସେମାନଙ୍କ ଭୋଟ ଦିଆ ସରିଥିଲା ବୋଲି ଅଭିଯୋଗ କରିଛନ୍ତି । ଏନେଇ ତଦନ୍ତ ହେଲେ ଅନେକ ରହସ୍ୟ ସାମ୍ନାକୁ ଆସିବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।
