ମରୁଡି ସମ୍ପର୍କରେ ମୁଖ୍ୟ ସଚିବ ଓ କୃଷି ନିର୍ଦ୍ଦେଶକଙ୍କ ଟିପ୍ପଣୀ ଚାଷୀଙ୍କ ପ୍ରତି ଉପହାସ
ଅର୍ଦ୍ଧାଧିକ ଜିଲ୍ଲା ଗଜା ମରୁଡି ଓ ଚାଷଜମି ଫାଟି ଆଁ କଲାଣି
ଚାଷୀଙ୍କ ପାଖରେ ବିହନ ନାହିଁ କି କେନାଲର ପାଣି ନାହିଁ
୫-ଟି ସଚିବ ଜିଲ୍ଲା ଗସ୍ତବେଳେ ଘୋଷଣା ସର୍ବସ୍ୱ ନହୋଇ ମରୁଡିର ବାସ୍ତବ ସ୍ଥିତିକୁ ପରଖନ୍ତୁ
ତୁରନ୍ତ କ୍ଷୟକ୍ଷତିର ସର୍ଭେ କରନ୍ତୁ ରାଜ୍ୟ ସରକାର
ଭୁବନେଶ୍ୱର : ରାଜ୍ୟରେ ମରୁଡିର ସ୍ଥିତି ଆସନ୍ନ । ଶ୍ରାବଣ ମାସର ଅଧା ସମୟ ହେଲାଣି ଚାଷୀକୂଳ ବର୍ଷାକୁ ଅନାଇ ବସିଛି । ଜୁନ ମାସର ୧୪ତାରିଖ ବେଳକୁ ଓଡିଶାକୁ ମୌସୁମୀର ଆଗମନ ହୋଇଥାଏ । ତେଣୁ ଚାଷୀ ମୌସୁମୀର ଆଗମନ ପୂର୍ବରୁ ଧାନବୁଣି ଥାଏ ଏବଂ ଧାନତଳି ପକାଇଥାଏ । ମାତ୍ର ଏବର୍ଷ ମୌସୁମୀ ଆଗମନର ବିଳମ୍ବ ଏବଂ ସ୍ପଳ୍ପ ବର୍ଷା କାରଣରୁ ବୁଣାଯାଇଥିବା ଧାନ ଗଜାମରୁଡି ହେବା ସହ ଅଦ୍ୟାବଧି ଧାନତଳି ପକାଯାଇପାରିଲା ନାହିଁ । ଏବେ ବି ରାଜ୍ୟର ୧୮ଜିଲ୍ଲା କଳାହାଣ୍ଡି, ନବରଙ୍ଗପୁର, ରାୟଗଡା, ମୟୂରଭଞ୍ଜ, କନ୍ଧମାଳ, ଗଞ୍ଜାମ, ପୁରୀ, ଖୋର୍ଦ୍ଧା, କେନ୍ଦ୍ରାପଡା, ବାଲେଶ୍ୱର, ଯାଜପୁର, ସୁବର୍ଣ୍ଣପୁର, ଜଗତସିଂହପୁର, ଭଦ୍ରକ, କଟକ, ନୟାଗଡ, କୋରାପୁଟ ଓ ବଲାଙ୍ଗୀର ଜିଲ୍ଲାରେ ସ୍ୱଭାବିକ ବର୍ଷାଠାରୁ ଯଥେଷ୍ଟ କମ୍ ବର୍ଷା ହୋଇଛି ଯାହା ପାଣିପାଗ ବିଭାଗର ତଥ୍ୟ କହୁଛି । ଏହାବାଦ୍ ଅନ୍ୟ ୧୨ଟି ଜିଲ୍ଲାର ସ୍ଥିତି ମଧ୍ୟ ଚିନ୍ତାଜନକ । ଏହିସବୁ ଜିଲ୍ଲାରେ ବର୍ତମାନ ଧାନ ବେଉଷଣ ଏବଂ ରୁଆପୋତା ହେବାକଥା କିନ୍ତୁ ଧାନ ଜମିରୁ ଗଛ ଉଦ୍ଧଉନାହିଁ, ଗଜା ହେଉନାହିଁ ଏବଂ ଜମି ସବୁ ଫାଟି ଆଁ କଲାଣି । ମାତ୍ର ମୁଖ୍ୟସଚିବ ଓ କୃଷିନିର୍ଦ୍ଦେଶକ ଶୀତତାପ ନିୟନ୍ତ୍ରିତ କଠୋରୀରେ ବସି ଆକଳନ କରି ରାଜ୍ୟରେ ମରୁଡିର ସ୍ଥିତି ଉତ୍ପନ ହୋଇନାହିଁ ଏବଂ ଠିକଣା ସମୟରେ ଜଳସେଚନ ଏବଂ ସ୍ୱଳ୍ପକାଳୀନ ବିହନ ଯୋଗାଇ ଦିଆଯିବ କହିବା ଚାଷୀଙ୍କ ପ୍ରତି ଅତ୍ୟନ୍ତ କ୍ରୁର ଉପହାସ ଏବଂ କଟାକ୍ଷ ସଦୃଶ ବୋଲି କୃଷକମୋର୍ଚ୍ଚା ରାଜ୍ୟ ଉପସଭାପତି ଶ୍ରୀ ଶ୍ରୀରଞ୍ଜନ ମଙ୍ଗରାଜ ଏକ ପ୍ରେସ ବାର୍ତାରେ କହିଛନ୍ତି ।
ଯଦି ଆସନ୍ତା ସପ୍ତାହେ ମଧ୍ୟରେ ବର୍ଷା ନହୁଏ ତେବେ ସମଗ୍ର ରାଜ୍ୟ ମରୁଡି କବଳିତ ହେବ । ରାଜ୍ୟରେ କୃଷି କର୍ମଚାରୀ ବିଶେଷକରି କ୍ଷେତ୍ରାଧିକାରୀମାନଙ୍କ ସଂଖ୍ୟା ବେଳକୁ ବେଳ କମିଯାଇ କର୍ମଚାରୀ ମରୁଡି ହେଲାଣି । ଏତିକିବେଳେ କେନ୍ଦ୍ର ସରକାରଙ୍କ ନିୟମ ମୁତାବକ ଚାଷ କ୍ଷତିର ଡିଜିଟାଲ ସର୍ବେକ୍ଷଣ ପାଇଁ ରାଜ୍ୟ ସରକାର କର୍ମଚାରୀମାନଙ୍କୁ ରାଜଧାନୀରେ ପ୍ରଶିକ୍ଷଣ ଦେଉଛନ୍ତି । ତୁରନ୍ତ ସେମାନଙ୍କୁ କ୍ଷେତ୍ରକୁ ପଠାଇ ଗଜାମରୁଡି ସ୍ଥିତିର ସମୀକ୍ଷା ଏବଂ ସର୍ଭେ କରନ୍ତୁ । ରାଜ୍ୟ ସରକାର ତୁରନ୍ତ କେନାଲମାନଙ୍କରେ ପାଣି ଛାଡନ୍ତୁ, ଅଚଳ ହୋଇ ପଡିଥିବା ଉଠା ଜଳସେଚନ ପଏଂଟକୁ ସଚଳ କରାଇବା ସହ ପର୍ଯ୍ୟାପ୍ତ ପରିମାଣରେ ବିହନ ଚାଷୀଙ୍କୁ ଯୋଗାଇ ଦିଅନ୍ତୁ ବୋଲି ଶ୍ରୀ ମଙ୍ଗରାଜ ଦାବି କରିଛନ୍ତି ।
ରାଜ୍ୟ ସରକାରଙ୍କର ସମବାୟ ମନ୍ତ୍ରୀ ମଇ ମାସ ୨୧ତାରିଖ ଦିନ ଘୋଷଣା କରିଥିଲେ ଯେ, ଆସନ୍ତା ୩ବର୍ଷ ପାଇଁ ଚାଷୀଙ୍କ ଶସ୍ୟବୀମା ସରକାର ଭରଣ କରିବେ । କିନ୍ତୁ ଏଭଳି କୌଣସି ନିର୍ଦ୍ଦେଶନାମା ସମବାୟ ବ୍ୟାଙ୍କ ଓ ସମବାୟ ସମିତିକୁ ନଆସିବା କାରଣରୁ ରାଜ୍ୟ ସରକାରଙ୍କ ଘୋଷଣା ଚାଷୀଙ୍କୁ ଏବଂ ବ୍ୟାଙ୍କ କର୍ମଚାରୀଙ୍କୁ ଦ୍ୱନ୍ଦ୍ୱରେ ପକାଇଛି । ସମବାୟ ସମିତି ଓ ବ୍ୟାଙ୍କମାନେ ଏହି ଘୋଷଣାକୁ ଲକ୍ଷ୍ୟ କରି ଚାଷୀଙ୍କୁ କୃଷି ଋଣ ଦେଲାବେଳେ ବୀମା ବାବଦ ଅର୍ଥ ଆଦାୟ କରୁନାହାନ୍ତି । ଫଳରେ ମରୁଡିଜନିତ ବୀମା କ୍ଷତିପୂରଣ ଚାଷୀ କିପରି ପାଇବ ବୋଲି ପ୍ରଶ୍ନବାଚୀ ସୃଷ୍ଟି କରୁଛି ତୁରନ୍ତ ରାଜ୍ୟ ସରକାର ଏହାର ସ୍ପଷ୍ଟତା ଓ ଲିଖିତ ନିର୍ଦ୍ଦେଶନାମା ବ୍ୟାଙ୍କ ଓ ସମବାୟ ସମିତିମାନଙ୍କୁ ଜାରି କରନ୍ତୁ ବୋଲି ଶ୍ରୀ ମଙ୍ଗରାଜ ଦାବି କରିଛନ୍ତି ।
ଘୋଷଣା ସର୍ବସ୍ୱ ରାଜ୍ୟ ସରକାର ଚାଷୀଙ୍କୁ ଆଉ ଦିନରେ ଲଣ୍ଠନ ନଦେଖାଇ ନିର୍ବାଚନ ବେଳେ ଦେଇଥିବା ୩୫ପ୍ରତିଶତ ଜମିକୁ ଜଳସେଚିତ କରିବାର ପ୍ରତିଶ୍ରୁତି କୁଆଡେ ଗଲା? ମହାନଦୀରେ ଛତିଶଗଡ ବ୍ୟାରେଜ ନିର୍ମାଣ କଲାବେଳେ, “ଯେତେ ବ୍ୟାରେଜ ହେଲେ ବି ଓଡ଼ିଶାର କିଛି କ୍ଷତି ହେବ ନାହିଁ” କହୁଥିବା ରାଜ୍ୟ ସରକାର ଏବେ ମହାନଦୀକୁ ନେଇ କୁମ୍ଭୀର କାନ୍ଦଣା କାନ୍ଦିବା ହାସ୍ୟାସ୍ପଦ ଘଟଣା । ରାଜ୍ୟରେ ଆସନ୍ନ ମରୁଡି ଜଳ ଜଳ ଦିଶୁଥିବାବେଳେ ୫-ଟି ସଚିବ ଜିଲ୍ଲା ଗସ୍ତ କରି ସେସମ୍ପର୍କରେ ନୀରବ ରହିବା ଚାଷୀଙ୍କ ମନରେ ଆଶଙ୍କା ସୃଷ୍ଟି କରୁଛି । ୫-ଟି ସଚିବ ଜିଲ୍ଲା ଗସ୍ତବେଳେ ଘୋଷଣା ସର୍ବସ୍ୱ ନହୋଇ ମରୁଡିର ବାସ୍ତବ ସ୍ଥିତିକୁ ପରଖନ୍ତୁ ବୋଲି ଶ୍ରୀ ମଙ୍ଗରାଜ କହିଛନ୍ତି ।
