ନୂଆଦିଲ୍ଲୀ : ପ୍ରତିବର୍ଷ ଡେଙ୍ଗୁ ଦ୍ୱାରା ଦେଶରେ ବହୁତ କ୍ଷତି ଘଟିଥାଏ। ବର୍ଷା ପରେ ଡେଙ୍ଗୁ ଦେଶର ଅନେକ ଅଞ୍ଚଳରେ ବ୍ୟାପିଥାଏ, ଯାହା ପ୍ରତିବର୍ଷ ହଜାର ହଜାର ଲୋକଙ୍କ ମୃତ୍ୟୁର କାରଣ ପାଲଟେ। କିନ୍ତୁ ଏବେ ଏହି ମହାମାରୀକୁ ରୋକିବା ପାଇଁ ସରକାର ଏକ ଟିକାକୁ ଅନୁମୋଦନ କରିଛନ୍ତି। ଔଷଧ ନିୟାମକ ସଂସ୍ଥା, କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (CDSCO), ଜାପାନୀ ଟିକା, QDENGAକୁ ଅନୁମୋଦନ କରିଛି। ଏହା ଜାପାନୀ ଔଷଧ କମ୍ପାନୀ ଟକେଡା ଫାର୍ମାସିଟିକାଲ ଦ୍ୱାରା ବିକଶିତ ହୋଇଛି । ଏହି ଟିକା ଟେଟ୍ରାଭାଲେଣ୍ଟ ଲାଇଭ ଆଟେନୁଏଟେଡ ପ୍ରଯୁକ୍ତିବିଦ୍ୟା ବ୍ୟବହାର କରେ। ଯାହାର ଅର୍ଥ ହେଉଛି ଏହା ଡେଙ୍ଗୁ ଭାଇରସର ସମସ୍ତ ୪ଟି ସେରୋଟାଇପ ବିରୋଧରେ ସୁରକ୍ଷା ପ୍ରଦାନ କରିପାରିବ।
ଜାପାନୀ କମ୍ପାନୀ ଅନୁଯାୟୀ, ଏହି ଟିକା ସେମାନଙ୍କୁ ମଧ୍ୟ ଦିଆଯାଇପାରିବ ଯେଉଁମାନଙ୍କୁ ପୂର୍ବରୁ ଡେଙ୍ଗୁ ହୋଇସାରିଛି। ତଥାପି ଯେଉଁମାନଙ୍କୁ ଏପର୍ଯ୍ୟନ୍ତ ଡେଙ୍ଗୁ ହୋଇନାହିଁ ସେମାନେ ମଧ୍ୟ ଏହାକୁ ନେଇପାରିବେ। ଏହି ଟିକା ଦେବା ପୂର୍ବରୁ ଡେଙ୍ଗୁ ପରୀକ୍ଷାର କୌଣସି ଆବଶ୍ୟକତା ନାହିଁ। କମ୍ପାନୀ କହିଛି ଯେ, ଏହି ଅନୁମୋଦନ ଏପରି ଏକ ସମୟରେ ଆସିଛି ଯେତେବେଳେ ଗତ ଦୁଇ ଦଶନ୍ଧି ମଧ୍ୟରେ ଭାରତରେ ଡେଙ୍ଗୁ ମାମଲା ୧୧ ଗୁଣ ବୃଦ୍ଧି ପାଇଛି। ଏହି ଟିକା ବିକଶିତ କରିବା ପାଇଁ ଜାପାନୀ କମ୍ପାନୀ ଟକେଡା ଫାର୍ମାସିଟିକାଲ ୨୦୨୪ରେ ଭାରତୀୟ ଟିକା କମ୍ପାନୀ ବାୟୋଲୋଜିକାଲ E ସହିତ ସହଭାଗୀ ହୋଇଥିଲା। ଏହି ଚୁକ୍ତି ଅନୁଯାୟୀ, ବାୟୋଲୋଜିକାଲ E ବାର୍ଷିକ ୫୦ ନିୟୁତ ଡୋଜ ଉତ୍ପାଦନ କରିବାର କ୍ଷମତା ବିକଶିତ କରିବ। ଏହା ଟାକେଡାକୁ ଦଶନ୍ଧି ଶେଷ ସୁଦ୍ଧା ବିଶ୍ୱବ୍ୟାପୀ ବାର୍ଷିକ ୧୦୦ ନିୟୁତ ଡୋଜ ଉତ୍ପାଦନ କରିବାର ଲକ୍ଷ୍ୟ ହାସଲରେ ସାହାଯ୍ୟ କରିବ।
