ପୁଣି ପ୍ରାଣ ହରାଇଲା ଆଉ ଗୋଟିଏ ଚିତା

ଭୋପାଳ: ପୁଣି ପ୍ରାଣ ହରାଇଲା ଆଉ ଗୋଟିଏ ଚିତା । ମଧ୍ୟପ୍ରଦେଶ କୁନୋ ଜାତୀୟ ଉଦ୍ୟାନରେ ଛଡ଼ାଯାଇଥିବା ଆଫ୍ରିକୀୟ ଚିତା ଗୁଡ଼ିକ ମଧ୍ୟରୁ ଗତ ମାସରେ ଗୋଟିଏ ଚିତା ଆଖି ବୁଜିଥିବା ବେଳେ, ଆଜି ଆଉ ଏକ ଚିତାର ମୃତ୍ୟୁ ଘଟିଥିବା ସୂଚନା ମିଳିଛି । ତା’ ନାଁ ଉଦୟ । ଏହାକୁ ଦ୍ୱିତୀୟ ପର୍ଯ୍ୟାୟରେ ଦକ୍ଷିଣ ଆଫ୍ରିକାରୁ ଅଣାଯାଇଥିଲା । ଉଦୟର କେମିତି ମୃତ୍ୟୁ ଘଟିଲା, ତାହା ସ୍ପଷ୍ଟ ହୋଇନାହିଁ । ଚିତା ପ୍ରୋଜେକ୍ଟ ଅଧୀନରେ ୨ଟି ପର୍ଯ୍ୟାୟରେ ନାମିବ୍ୟା ଓ ଦକ୍ଷିଣ ଆଫ୍ରିକାରୁ ୨୦ଟି ଚିତା ଅଣାଯାଇ କୁନୋରେ ଛଡ଼ାଯାଇଥିଲା । ପ୍ରଥମ ପର୍ଯ୍ୟାୟରେ ୮ଟି ଓ ଦ୍ୱିତୀୟ ପର୍ଯ୍ୟାୟରେ ୧୨ଟି ଚିତା ଆସିଥିଲା । ତେବେ ମାର୍ଚ୍ଚ ୨୭ରେ କିଡନୀ ସଂକ୍ରମଣ ଯୋଗୁଁ ନାମିବ୍ୟାରୁ ଆସିଥିବା ଶାଶାର ମୃତ୍ୟୁ ଘଟିଥିଲା । ଆଜି ଉଦୟର ମଧ୍ୟ ମୃତ୍ୟୁ ହେବା ପରେ ଏବେ କୁନୋ ଜାତୀୟ ଉଦ୍ୟାନରେ ଆଉ ୧୮ଟି ଚିତା ଅଛନ୍ତି ।