16.1 C
Bhubaneswar
Tuesday, January 7, 2025
Homeଦେଶ ବିଦେଶରାସ୍ତାକଡରେ ଛିଡା ହୋଇଥିବା ବସ୍‌କୁ ଧକ୍କା ଦେଲା ଟ୍ରକ, ୧୧ ମୃତ

ରାସ୍ତାକଡରେ ଛିଡା ହୋଇଥିବା ବସ୍‌କୁ ଧକ୍କା ଦେଲା ଟ୍ରକ, ୧୧ ମୃତ

ଜୟପୁର : ରାଜସ୍ଥାନ ଭରତପୁର ଜିଲ୍ଲାରେ ଭୟଙ୍କର ସଡକ ଦୁର୍ଘଟଣା । ରାସ୍ତାକଡରେ ଛିଡା ହୋଇଥିବା ଯାତ୍ରୀବାହୀ ବସ୍କୁ ଧକ୍କା ଦେଲା ଟ୍ରକ । ଦୁର୍ଘଟଣାରେ ଚାଲିଗଲା ୧୧ ଜୀବନ । ଆଜି ଜୟପୁର-ଆଗ୍ରା ଜାତୀୟ ରାଜପଥର ହନ୍ତରା ଗ୍ରାମ ନିକଟରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ଏଥିରେ ୧୨ ଜଣ ଯାତ୍ରୀ ଗୁରୁତର ଆହତ ହୋଇଛନ୍ତି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ଆରବିଏମ ଜିଲ୍ଲା ହସ୍ପିଟାଲରେ ଭର୍ତ୍ତି କରିଛି । ସୂଚନା ଅନୁଯାୟୀ, ଯାତ୍ରୀବାହୀ ବସ୍ଟି ଗୁଜୁରାଟରୁ ଉତ୍ତର ପ୍ରଦେଶର ମଥୁରା ଅଭିମୁଖେ ଯାଉଥିଲା । ଏଥିରେ ୨୦ରୁ ଅଧିକ ଯାତ୍ରୀ ଥିଲେ । ସକାଳ ପ୍ରାୟ ୪ଟା ବେଳେ ବସର ଟାୟାର ଫାଟି ଯିବାରୁ ଏହା ଜୟପୁର-ଆଗ୍ରା ଜାତୀୟ ରାଜପଥ କଡରେ ଛିଡା ହୋଇଥିଲା । ଏତିକି ବେଳେ ଜୟପୁର ଆଡୁ ଦ୍ରୁତଗତିରେ ଆସୁଥିବା ଏକ ଟ୍ରକ ବସ୍କୁ ପଛ ପଟୁ ଜୋରରେ ଧକ୍କା ଦେଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ବସ୍ ୩୦ ମିଟର ଯାଏଁ ଘୋଷାଡି ହୋଇଯାଇଥିଲା ।

ଏହି ମର୍ମନ୍ତୁଦ ଦୁର୍ଘଟଣାରେ ୧୧ ଜଣ ଯାତ୍ରୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ୧୨ ଜଣ ଗୁରୁତର ଆହତ ହୋଇଛନ୍ତି । ମୃତକଙ୍କ ମଧ୍ୟରେ ୬ ଜଣ ମହିଳା ଓ ୫ ଜଣ ପୁରୁଷ ଥିବା ଜଣାପଡିଛି । ସେମାନେ ଅନ୍ନୁ, ନନ୍ଦରାମ, ଲଲ୍ଲୁ, ଭରତ, ଲାଲ ଭାଇ, ଅମ୍ବାବେନ, କମ୍ମୁବେନ, ରାମୁବେନ, ମଧୁବେନ, ଅଞ୍ଜୁବେନ ଓ ମଧୁବେନ ବୋଲି ପରିଚୟ ମିଳିଛି । ଭରତପୁର ଏସପି ମ୍ରିଦୁଲ କଚୱା କହିଛନ୍ତି ଯେ, ଦୁର୍ଘଟଣାଗ୍ରସ୍ତ ବସ୍ ଗୁଜୁରାଟ ଭାବନଗରରୁ ଯାତ୍ରୀଙ୍କୁ ନେଇ ମଥୁରା ବୃନ୍ଦାବନ ଯାଉଥିଲା । ଆଜି ସକାଳ ପ୍ରାୟ ୪ଟା ବେଳେ ଜୟପୁର-ଆଗ୍ରା ଜାତୀୟ ରାଜପଥର ହନ୍ତରା ନିକଟରେ ବସ୍ ଟାୟାର ଫାଟି ଯାଇଥିଲା । ଫଳରେ ଡ୍ରାଇଭର ଗାଡିକୁ ରାସ୍ତାକଡରେ ଛିଡା କରି ମରାମତି କାମ କରୁଥିଲେ । ଏହି ସମୟରେ କିଛି ଯାତ୍ରୀ ବସ୍ ଭିତରେ ବସି ଥିବାବେଳେ ଆଉ କିଛି ବାହାରକୁ ଆସି ଛିଡା ହୋଇଥିଲେ । ଠିକ୍ ଏତିକି ବେଳେ ଦ୍ରୁତଗତିରେ ଆସୁଥିବା ଏକ ଟ୍ରକ ପଛ ପଟୁ ବସକୁ ଧକ୍କା ଦେଇଥିଲା । ଦୁର୍ଘଟଣା ସମ୍ପର୍କରେ ଖବର ପାଇବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛି । ଆହତମାନଙ୍କୁ ଉଦ୍ଧାର କରାଯାଇ ଆମ୍ବୁଲାନ୍ସ ଯୋଗେ ହସ୍ପିଟାଲରେ ଭର୍ତ୍ତି କରାଯାଇଛି । ପୋଲିସ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।

LEAVE A REPLY

Please enter your comment!
Please enter your name here

5,005FansLike
2,475FollowersFollow
12,700SubscribersSubscribe

Most Popular

HOT NEWS

Breaking