ନୂଆଦିଲ୍ଲୀ: ମୁଖ୍ୟ ନିର୍ବାଚନ ଆୟୋଗ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଶୁକ୍ରବାର ଗାନ୍ଧୀ ଜୟନ୍ତୀ ଅବସରରେ ଦିଲ୍ଲୀର ଜନ୍ତର ମନ୍ତରଠାରେ ଆୟୋଜିତ ପ୍ରତିବାଦ ସଭା ଭୟଙ୍କର ରୂପ ନେଇଛି । ସ୍ୱତନ୍ତ୍ର ସଘନ ସଂଶୋଧନ ମାଧ୍ୟମରେ ଭୋଟର ତାଲିକାରୁ ବ୍ୟାପକ ନାମ କାଟିବା ଏବଂ ନିର୍ବାଚନ ଆୟୋଗଙ୍କ କାର୍ଯ୍ୟଶୈଳୀକୁ ବିରୋଧ କରି ଆମ ଆଦମୀ ପାର୍ଟି ଓ ବିଭିନ୍ନ ଛାତ୍ର ସଂଗଠନ ପକ୍ଷରୁ ଏହି ବିକ୍ଷୋଭ ପ୍ରଦର୍ଶନ କରାଯାଇଥିଲା । ଅଶୋକା ରୋଡ ଦେଇ ଆନ୍ଦୋଳନ ସ୍ଥଳକୁ ଯିବାକୁ ଚେଷ୍ଟା କରୁଥିବା ସମୟରେ ଆପ ନେତା ସୌରଭ ଭରଦ୍ୱାଜ ଙ୍କ ସମେତ ଅନେକ ବିକ୍ଷୋଭକାରୀଙ୍କୁ ପୋଲିସ ଅଟକ ରଖିଛି । ଶାନ୍ତିଶୃଙ୍ଖଳା ରକ୍ଷା ପାଇଁ ନୂଆଦିଲ୍ଲୀ ଜିଲ୍ଲାରେ ଭାରତୀୟ ନାଗରିକ ସୁରକ୍ଷା ସଂହିତା ବିଏନଏସର ୧୬୩ ଧାରା ଲାଗୁ କରାଯାଇ ବେଆଇନ ଜନସମାଗମ ଉପରେ କଟକଣା ଜାରି କରାଯାଇଛି ।
ଅନ୍ୟପକ୍ଷରେ, ”କୋକ୍ରୋଚ୍ ଜନତା ପାର୍ଟି” (ସିଜେପି)ର ସଂସ୍ଥାପକ ଅଭିଜିତ୍ ଦିପକେ ମୁମ୍ବାଇର ଶିବାଜୀ ପାର୍କଠାରେ ଏହି ମାମଲାରେ ”ଜେଲ୍ ଭରୋ ଆନ୍ଦୋଳନ”ର ଆହ୍ୱାନ ଦେଇଥିଲେ, ମାତ୍ର ବମ୍ବେ ହାଇକୋର୍ଟଙ୍କ ୨୦୧୩ ଆଦେଶ ଏବଂ ସାଇଲେନ୍ସ ଜୋନ୍ ଦର୍ଶାଇ ମୁମ୍ବାଇ ପୁଲିସ ସେଠାରେ ସଭା ପାଇଁ ଅନୁମତି ନାହିଁ ବୋଲି ସ୍ପଷ୍ଟ କରିଛି।ଏହି ସମଗ୍ର ବିବାଦର ସୂତ୍ରପାତ ସେତେବେଳେ ହୋଇଥିଲା, ଯେତେବେଳେ ଏକ ସମ୍ବାଦପତ୍ର ରିପୋର୍ଟରୁ ପ୍ରକାଶ ପାଇଥିଲା ଯେ ନିର୍ବାଚନ କମିଶନର ସୁଖବୀର ସିଂହ ସାନ୍ଧୁ ଏବଂ ବିବେକ ଯୋଶୀ ଗତ ୧୦ ମାସ ମଧ୍ୟରେ ଆୟୋଗଙ୍କ ଅତିକମରେ ୧୪ଟି ନିଷ୍ପତ୍ତିକୁ ନେଇ ଆପତ୍ତି ଉଠାଇଥିଲେ, ଯାହା ସେମାନଙ୍କ ଅଜାଣତରେ ନିଆଯାଇଥିଲା। ତେବେ ଏହି ଅଭିଯୋଗକୁ ନାକଚ କରି ନିର୍ବାଚନ ଆୟୋଗ କହିଛନ୍ତି ଯେ, ଏସଆଇଆର୍ ସମେତ ଆୟୋଗର ସମସ୍ତ ନିଷ୍ପତ୍ତି ତିନିଜଣିଆ କମିଟିର ସର୍ବସମ୍ମତି କ୍ରମେ ନିଆଯାଇଛି।
