ଗଣେଶ ଚତୁର୍ଥୀରେ ଜନ୍ମ ନେଲା ହାତୀ ଶାବକ

କେନ୍ଦୁଝର: ପବିତ୍ର ଗଣେଶ ଚତୁର୍ଥୀରେ କେନ୍ଦୁଝର ଜିଲ୍ଲାରୁ ଆସିଛି ଏକ ଶୁଭ ଖବର। ଜିଲ୍ଲାରେ ଗଣେଶ ଚତୁର୍ଥୀ ଅବସରରେ ଜନ୍ମ ନେଇଛି ଏକ ହାତୀ ଶାବକ । ଚମ୍ପୁଆ ରେଞ୍ଜ ବାଲିବନ୍ଧ ସେକ୍ସନ୍ ରେ ଥିବା ୨୧ ଟିକିଆ ହାତୀପଲରୁ ଏକ ହାତୀଛୁଆ ଜନ୍ମ ନେଇଥିବାରୁ ସେଠାରେ ମୋଟ୍ ହାତୀ ସଂଖ୍ୟା ଏବେ ୨୨ରେ ପହଞ୍ଚିଛି । ଏହି ସୂଚନା ଦେଇଛନ୍ତି କେନ୍ଦୁଝର ଡିଏଫ୍‌ଓ। ହାତୀଛୁଆ ଏବେ ସୁସ୍ଥ ଥିବା ବେଳେ, ହାତୀପଲଙ୍କ ସହିତ ଚଳପ୍ରଚଳ କରିବା ସହ, ମା ଠାରୁ କ୍ଷୀରପାନ କରୁଥିବା ସୂଚନା ଦେଇଛନ୍ତି ଡିଏଫ୍‌ଓ।ହାତୀପଲ ପ୍ରତି ବନ ବିଭାଗର ସ୍ଥାନୀୟ କର୍ମଚାରୀ ନଜର ରଖିଥିବା ବେଳେ, ମା ଏବଂ ଛୁଆହାତୀ କିପରି ସୁରକ୍ଷିତ ଏବଂ ଭଲରେ ରହିବେ ସେଥିପ୍ରତି ସଜାଗ ଅଛନ୍ତି । ପବିତ୍ର ଗଣେଶ ଚତୁର୍ଥୀ ଅବସରରେ ହାତୀ ଶାବକ ଜନ୍ମ ହେବା ଜିଲ୍ଲାବାସୀଙ୍କୁ ଖୁସି ଆଣିଦେବା ସହ ଜିଲ୍ଲାରେ ଏହା ହାତୀ ସଂରକ୍ଷଣର କ୍ଷେତ୍ରରେ ଏକ ସକାରାତ୍ମକ ସଂକେତ ବୋଲି ସୂଚନା ମିଳିଛି ।