ନୂଆଦିଲ୍ଲୀ: ପ୍ରଶ୍ନକାଳ ଆରମ୍ଭରୁ ଲୋକସଭା, ରାଜ୍ୟସଭାରେ ବିରୋଧୀଙ୍କ ହଟ୍ଟଗୋଳ । ବିରୋଧୀ ସଦସ୍ୟଙ୍କ ଦ୍ୱାରା ଅପରେସନ ସିନ୍ଦୂର ଉପରେ ଆଲୋଚନା ସମେତ ବିଭିନ୍ନ ପ୍ରସଙ୍ଗ ଉପରେ ନାରାବାଜି ମଧ୍ୟରେ ଲୋକସଭାକୁ ଅପରାହ୍ନ ୨ଟା ଯାଏଁ ଲୋକସଭା ବାଚସ୍ପତି ଓମବିର୍ଲା ମୁଲତବୀ କରିଛନ୍ତି । ପୂର୍ବରୁ ୧୨ଟାରେ ଗୃହ ଚାଲିବା ବେଳେ କଂଗ୍ରେସ, ଏସପି, ଡିଏମକେ ଅନ୍ୟାନ୍ୟ ବିରୋଧୀ ସଦସ୍ୟମାନେ ସେମାନଙ୍କର ସ୍ଲୋଗାନ ଦେଇ ଗୃହର ମଧ୍ୟଭାଗକୁ ଆସି ହଟ୍ଟଗୋଳ କରିଥିଲେ । ବାଚସ୍ପତି ବିରୋଧୀଙ୍କ ନିଜ ସ୍ଥାନକୁ ଯିବାକୁ ଏବଂ ପ୍ରଶ୍ନ କାଳରେ ଯୋଗ ଦେବାକୁ ବାରମ୍ବାର ଅନୁରୋଧ କରିବା ସତ୍ତ୍ୱେ ସେମାନେ ଜିଦରେ ଅଟଳ ରହି ବିକ୍ଷୋଭ ପ୍ରଦର୍ଶନ କରିଥିଲେ । ପ୍ରତିରକ୍ଷା ମନ୍ତ୍ରୀ ତଥା ଲୋକସଭାରେ ଉପନେତା ରାଜନାଥ ସିଂହ ମଧ୍ୟ କହିଛନ୍ତି ଯେ ସରକାର ଯେକୌଣସି ବିଷୟ ପ୍ରସ୍ତାବିତ ହେଲେ ସେ ବିଷୟରେ ଆଲୋଚନା ପାଇଁ ସମ୍ପୂର୍ଣ୍ଣ ପ୍ରସ୍ତୁତ। ତଥାପି ବିରୋଧୀ ସଦସ୍ୟମାନେ ସେମାନଙ୍କର ନାରାବାଜି ଜାରି ରଖିଲେ ଯାହା ଫଳରେ ଗୃହକୁ ଅପରାହ୍ନ ୨ଟା ପର୍ଯ୍ୟନ୍ତ ମୁଲତବୀ ରଖାଯାଇଥିଲା।
ପୂର୍ବରୁ, ଯେତେବେଳେ ଲୋକସଭା ସକାଳ ୧୧ଟାରେ ବସିଥିଲା, ସେତେବେଳେ ଏହା ଏହାର ଆଠ ଜଣ ପୂର୍ବତନ ସଦସ୍ୟଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲା। ସଦନ ପହଲଗାମ ଆତଙ୍କବାଦୀ ଆକ୍ରମଣ ଏବଂ ଏୟାର ଇଣ୍ଡିଆ AI-171 ବିମାନ ଦୁର୍ଘଟଣାର ପୀଡିତମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲା। ବିଭିନ୍ନ ରାଜ୍ୟରେ ପ୍ରାକୃତିକ ବିପର୍ଯ୍ୟୟରେ ଜୀବନ ଏବଂ ସମ୍ପତ୍ତି କ୍ଷୟକ୍ଷତି ଉପରେ ମଧ୍ୟ ଶୋକ ପ୍ରକାଶ କରିଥିଲା। ଲୋକସଭା ବାଚସ୍ପତି ଓମ୍ ବିର୍ଲା ISRO ଏବଂ ଗ୍ରୁପ୍ କ୍ୟାପ୍ଟେନ୍ ଶୁଭାଂଶୁ ଶୁକ୍ଳାଙ୍କୁ ଅନ୍ତର୍ଜାତୀୟ ମହାକାଶ ଷ୍ଟେସନକୁ ସଫଳ ଯାତ୍ରା ପାଇଁ ଅଭିନନ୍ଦନ ଜଣାଇଥିଲେ। ସେ କହିଛନ୍ତି ଯେ, ଏହି ସଫଳତା ଉପରେ ସଦନରେ ଏକ ବିସ୍ତୃତ ଆଲୋଚନା କରାଯିବ।
