ନୂଆଦିଲ୍ଲୀ: ଛାତ୍ର ସଂଗଠନଗୁଡିକ ପକ୍ଷରୁ ବିଧାନସଭା ଘେରାଉ ଡାକରା ଦିଆଯାଇଥିବା ବେଳେ ସୋମବାର ରାଞ୍ଚିର ସୁରକ୍ଷା ବ୍ୟବସ୍ଥାକୁ ଅତି କଡାକଡି କରାଯାଇଛିା ପ୍ରଦର୍ଶନକାରୀମାନଙ୍କୁ ବିଧାନସଭା ଯାଏଁ ପହଞ୍ଚିବାକୁ ନଦେବା ପାଇଁ ପ୍ରଶାସନ ପୂରା ଅଞ୍ଚଳକୁ ଏକ ଅଭେଦ୍ୟ ଜିଲ୍ଲାରେ ପରିଣତ କରିଛି । ସୁରକ୍ଷା ଦୃଷ୍ଟିରୁ ବିଧାନସଭାକୁ ଯାଉଥିବା ସମସ୍ତ ମୁଖ୍ୟ ରାସ୍ତାରେ ଛଅଟି ସ୍ଥାନରେ ଷ୍ଟିଲ ବ୍ୟାରିକେଡ ନିର୍ମାଣ କରାଯାଇଛି । କେବଳ ସେତିକି ନୁହେଁ, ସମସ୍ତ ମୁଖ୍ୟ ବ୍ୟାରିକେଡରେ କଣ୍ଟା ତାର ଲଗାଯାଇ ପ୍ରଦର୍ଶନକାରୀଙ୍କୁ ରୋକିବା ପାଇଁ ବ୍ୟାପକ ବ୍ୟବସ୍ଥା କରାଯାଇଛି । ଆଜି ସକାଳ ୭ଟାରୁ ହିଁ ବିପୁଳ ସଂଖ୍ୟାରେ ପୁଲିସ ବାହିନୀ ମୁତୟନ କରାଯାଇ ଗତିବିଧି ଉପରେ କଡା ନଜର ରଖାଯାଇଛି । ପୁଲିସ ପଦଯାତ୍ରୀ ଏବଂ ଯାନବାହାନ ଉଭୟଙ୍କ ଉପରେ ତୀକ୍ଷ୍ଣ ନଜର ରଖିଥିବା ବେଳେ ବ୍ୟାରିକେଡ ଯୋଗୁଁ ସାଧାରଣ ଯାତାୟତ ବାଧାପ୍ରାପ୍ତ ହେବାର ସମ୍ଭାବନା ରହିଛି । ଭିଡ ପରିସ୍ଥିତିକୁ ଦୃଷ୍ଟିରେ ରଖି ପୋଲିସ ପକ୍ଷରୁ ବହୁସ୍ତରୀୟ ସୁରକ୍ଷାବଳୟ ପ୍ରସ୍ତୁତ କରାଯାଇଛି । ଛାତ୍ର ସଂଗଠନଗୁଡିକର ଏହି ପ୍ରତିବାଦ ମୁଖ୍ୟତଃ ୧୪ ତମ ଜେପିଏସସି ପ୍ରିଲିମିନାରୀ ପରୀକ୍ଷାକୁ ନେଇ କେନ୍ଦ୍ରିତ । ପରୀକ୍ଷାରେ ବ୍ୟାପକ ଅନିୟମିତତା ଏବଂ ପ୍ରଶ୍ନପତ୍ର ଲିକ ହୋଇଥିବା ଛାତ୍ରମାନେ ଅଭିଯୋଗ କରିଛନ୍ତି । ଏହି କାରଣରୁ ପରୀକ୍ଷାର ସ୍ୱଚ୍ଛତା ଉପରେ ପ୍ରଶ୍ନ ଉଠାଇ ଆନ୍ଦୋଳନକାରୀମାନେ ଏହାକୁ ତୁରନ୍ତ ବାତିଲ କରିବାକୁ ଦାବି କରୁଛନ୍ତି । ଘଟଣାର ଏକ ନିରପେକ୍ଷ ତଦନ୍ତ କରିବା ସହ ଛାତ୍ରଛାତ୍ରୀଙ୍କ ଭବିଷ୍ୟତକୁ ଦୃଷ୍ଟିରେ ରଖି ପୁଣି ଥରେ ପରୀକ୍ଷା କରିବାକୁ ସେମାନେ ଜିଦ ଧରିଛନ୍ତି । ଏହି ଆନ୍ଦୋଳନକୁ ଦୃଷ୍ଟିରେ ରଖି ପୋଲିସ ପ୍ରଶାସନ ଯେକୌଣସି ପରିସ୍ଥିତିର ମୁକାବିଲା ପାଇଁ ସମ୍ପୁର୍ଣ୍ଣ ପ୍ରସ୍ତୁତ ରହିଛି ।
