ନୂଆଦିଲ୍ଲୀ: ଇଂଲଣ୍ଡର ପୂର୍ବତନ କ୍ରିକେଟର ରବିନ ସ୍ମିଥଙ୍କ ୬୨ ବର୍ଷ ବୟସରେ ପରଲୋକ। ସ୍ମିଥ ୧୯୮୮ ରୁ ୧୯୯୬ ପର୍ଯ୍ୟନ୍ତ ଇଂଲଣ୍ଡ ପାଇଁ ୬୨ ଟେଷ୍ଟ ମ୍ୟାଚ୍ ଏବଂ ୭୧ ଦିନିକିଆ ଖେଳିଥିଲେ। ସେ ୧୯୯୨ ବିଶ୍ୱକପରେ ରନର୍ସଅପ୍ ଦଳ (ଇଂଲଣ୍ଡ)ର ଅଂଶ ଥିଲେ। ତାଙ୍କ ପରିବାର ସଦସ୍ୟମାନେ ତାଙ୍କ ମୃତ୍ୟୁକୁ ନିଶ୍ଚିତ କରିଛନ୍ତି। ଏହି ଦୁଃଖଦ ଖବର ପାଇଁ କ୍ରିକେଟ ଜଗତ ଶୋକ ପ୍ରକାଶ କରିଛି। ରବିନ୍ ସ୍ମିଥ୍ ଇଂଲଣ୍ଡ ପାଇଁ ୬୨ଟି ଟେଷ୍ଟ ମ୍ୟାଚ୍ ଖେଳିଥିଲେ। ଏହି ସମୟ ମଧ୍ୟରେ ସେ ୪୩.୬୭ ହାରରେ ୪,୨୩୬ ରନ କରିଥିଲେ, ଯେଉଁଥିରେ ନଅଟି ଶତକ ସାମିଲ ଥିଲା। ଏହି ଶତକ ମଧ୍ୟରୁ ତିନୋଟି ୱେଷ୍ଟଇଣ୍ଡିଜ୍ ବିପକ୍ଷରେ ଆସିଥିଲା। ତାଙ୍କର ସର୍ବାଧିକ ଟେଷ୍ଟ ସ୍କୋର ୧୭୫ ଥିଲା, ଯାହା ସେ ୧୯୯୪ ମସିହାରେ ୱେଷ୍ଟଇଣ୍ଡିଜ୍ ବିପକ୍ଷରେ କରିଥିଲେ। ସ୍ମିଥ୍ ହାମ୍ପଶାୟାରର ପ୍ରତିନିଧିତ୍ୱ କରି କାଉଣ୍ଟି କ୍ରିକେଟ ମଧ୍ୟ ଖେଳିଥିଲେ।
୨୦୦୪ ମସିହାରେ, ସ୍ମିଥ୍ ସମସ୍ତ ପ୍ରକାରର କ୍ରିକେଟରୁ ଅବସର ନେଇଥିଲେ ଏବଂ ସେବେଠାରୁ ତାଙ୍କର ମାନସିକ ସ୍ୱାସ୍ଥ୍ୟ ଖରାପ ହେବାରେ ଲାଗିଥିଲା। ୧୯୯୩ ମସିହାରେ ଅଷ୍ଟ୍ରେଲିଆ ବିପକ୍ଷରେ ସ୍ମିଥ୍ ଏକ ଐତିହାସିକ ଇନିଂସ ଖେଳିଥିଲେ। ସେ ଏକ ଦିନିକିଆରେ ଅପରାଜିତ ୧୬୭ ରନ କରିଥିଲେ, ଯାହା ଏହି ଫର୍ମାଟରେ ଇଂଲଣ୍ଡ ବ୍ୟାଟ୍ସମ୍ୟାନଙ୍କ ଦ୍ୱାରା ସର୍ବାଧିକ ବ୍ୟକ୍ତିଗତ ସ୍କୋର। ସ୍ମିଥ୍ ଙ୍କ ରେକର୍ଡ ୨୩ ବର୍ଷ ପାଇଁ ସ୍ଥିର ଥିଲା। ୨୦୧୬ ମସିହାରେ ଆଲେକ୍ସ ହେଲ୍ସ ପାକିସ୍ତାନ ବିପକ୍ଷରେ ୧୭୧ ରନ କରି ଏହି ରେକର୍ଡ ଭାଙ୍ଗିଥିଲେ। ଏକ ଦିବସୀୟ ମ୍ୟାଚରେ, ସେ ୭୧ ମ୍ୟାଚର ୭୦ ଇନିଂସରେ ୩୯.୦୧ ହାରରେ ୨୪୧୯ ରନ କରିଥିଲେ। ରବିନ୍ ସ୍ମିଥ୍ ଙ୍କ ପରିବାର ପକ୍ଷରୁ ଜାରି ଏକ ବିବୃତ୍ତିରେ ସୋମବାର ଦିନ ଦକ୍ଷିଣ ପର୍ଥସ୍ଥିତ ତାଙ୍କ ଆପାର୍ଟମେଣ୍ଟରେ ସ୍ମିଥ୍ ଙ୍କ ମୃତ୍ୟୁ ଘଟିଥିବା କଥା ନିଶ୍ଚିତ କରାଯାଇଛି। ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ (ଇସିବି) ଅଧ୍ୟକ୍ଷ ରିଚାର୍ଡ ଥମ୍ପସନ୍ ସ୍ମିଥ୍ ଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି। ହାମ୍ପଶାୟାର କ୍ରିକେଟ୍ କ୍ଲବ୍ ମଧ୍ୟ ସ୍ମିଥଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
