ଟ୍ରକ୍‌କୁ ଧକ୍କା ଦେଲା ବାଇକ୍‌: ୨ ମୃତ

ଆନ୍ଧ୍ରପ୍ରଦେଶ: ଆନ୍ଧ୍ରପ୍ରଦେଶରେ ମର୍ମନ୍ତୁଦ ସଡକ ଦୁର୍ଘଟଣା । ଏହି ଦୁର୍ଘଟଣାରେ ଦୁଇ ଜଣଙ୍କ ମୃତ୍ୟୁ ଘଟିଛି । ମୃତକଙ୍କ ପରିଚୟ ଏପର୍ଯ୍ୟନ୍ତ ମିଳିପାରିନାହିଁ । ସୂଚନାରୁ ପ୍ରକାଶ, ବୁଧୁବାର ବିଳମ୍ବିତ ରାତିରେ ଏକ ବାଇକ୍ ଏକ ଟ୍ରକ୍ ସହ ଧକ୍କା ହୋଇଥିଲା । ଏହି ଦୁର୍ଘଟଣାଟି ଆନ୍ଧ୍ରପ୍ରଦେଶର ବାପତଲା ଜିଲ୍ଲା ମୁଖ୍ୟାଳୟର କ୍ଲକ୍ ଟାୱାର ଜଙ୍କସନ୍‌ରେ ଘଟିଛି । ବାଇକ୍‌ଟି ଲରି ସହିତ ଧକ୍କା ହେବା ପୂର୍ବରୁ ଦ୍ରୁତ ଗତିରେ ଆସୁଥିଲା । ଫଳରେ ଧକ୍କା ଏତେ ଜୋର୍ ଥିଲା ଯେ ବାଇକ୍‌ଟି ଗୁରୁତର ଭାବରେ କ୍ଷତିଗ୍ରସ୍ତ ହୋଇଥିଲା ଏବଂ ଉଭୟ ଆରୋହୀ ରାସ୍ତା ଉପରେ କଚାଡି ହୋଇ ପଡିଥିଲେ । ବାଇକ୍‌ରେ ଯାଉଥିବା ଉଭୟ ଯୁବକ ହେଲମେଟ୍ ପିନ୍ଧି ନଥିଲେ, ଯାହା ଫଳରେ ଘଟଣାସ୍ଥଳରେ ଉଭୟଙ୍କ ମୃତ୍ୟୁ ଘଟିଥିଲା । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ହେପାଜତକୁ ନେଇ ତଦନ୍ତ ଆରମ୍ଭ କରିଛି ।