ବେଙ୍ଗାଲୁରୁ: ନିଜ ପରିବାରର ମାନ ସମ୍ମାନ, ପ୍ରତିଷ୍ଠା ତଥା ଆଭିଜାତ୍ୟକୁ ରକ୍ଷା କରିବା ପାଇଁ ଜଣେ ଭଉଣୀ ନିଜ ମା’ ପେଟର ଭାଇକୁ ହତ୍ୟା କରିଛି । ରିପୋର୍ଟ ଅନୁସାରେ ୨୩ ବର୍ଷୀୟ ମଲ୍ଲିକାର୍ଜୁନ୍ କର୍ଣ୍ଣାଟକର ଚିତ୍ରଦୁର୍ଗ ଜିଲ୍ଲାର ହୋଲାଲକେରେ ତାଲୁକର ଡୁମି ଗାଁର ସ୍ଥାୟୀ ବାସିନ୍ଦା ଥିଲେ । ସେ ନିଜ ବାପାମାଆଙ୍କ ସହ ଏଠାରେ ରହୁଥିଲେ । ଯେତେବେଳେ କି ତାଙ୍କ ଭଉଣୀ ନିଶା ବିବାହ କରିସାରିଥିଲେ । ମଲ୍ଲିକାର୍ଜୁନ୍ ବେଙ୍ଗାଲୁରୁର ଏକ ଘରୋଇ ସଂସ୍ଥାରେ କାମ କରୁଥିଲେ ଏବଂ ପ୍ରାୟତଃ ତାଙ୍କ ପରିବାରକୁ ଦେଖାକରିବାକୁ ଆସୁଥିଲେ । ତେବେ ଗତ ୨୩ ଜୁଲାଇରେ, ଜଣେ ବନ୍ଧୁଙ୍କ କାରରେ ତାଙ୍କ ଗାଁକୁ ଯାଉଥିବା ସମୟରେ, ଗାଡ଼ିଟି ଏକ ସ୍ଥିର ଟ୍ରକ୍ ସହିତ ଧକ୍କା ହୋଇଥିଲା, ଯାହା ଫଳରେ ମଲ୍ଲିକାର୍ଜୁନ ଗୁରୁତର ଆହତ ହୋଇଥିଲେ । ଦୁର୍ଘଟଣାରେ ତାଙ୍କ ବନ୍ଧୁମାନେ ମଧ୍ୟ ଆହତ ହୋଇଥିଲେ । ସମସ୍ତ ଆହତଙ୍କୁ ପ୍ରଥମେ ଚିତ୍ରଦୁର୍ଗର ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା । ଅଧିକ ଚିକିତ୍ସା ପାଇଁ, ମଲ୍ଲିକାର୍ଜୁନଙ୍କୁ ଦାଭାନାଗେରେର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା, ଯେଉଁଠାରେ ଡାକ୍ତରମାନେ ଅସ୍ତ୍ରୋପଚାର ପୂର୍ବରୁ ନିୟମିତ ରକ୍ତ ପରୀକ୍ଷା ସମୟରେ ସେ ଏଚ୍ଆଇଭି (ଏଡ୍ସ) ପଜିଟିଭ୍ ବୋଲି ଜାଣିପାରିଥିଲେ ।
ଡାକ୍ତରମାନେ ଏସମ୍ପର୍କରେ ମଲ୍ଲିକାର୍ଜୁନ୍ଙ୍କ ସମ୍ପର୍କୀୟ ଭାବେ ହସ୍ପିଟାଲରେ ଉପସ୍ଥିତ ଥିବା ନିଶା ଏବଂ ତାଙ୍କ ସ୍ୱାମୀ ମଞ୍ଜୁନାଥଙ୍କୁ ଜଣାଇଥିଲେ । ଅନ୍ୟପଟେ ମଲ୍ଲିକାର୍ଜୁନଙ୍କ ଠାରେ ଅନିୟନ୍ତ୍ରିତ ରକ୍ତସ୍ରାବ ଯୋଗୁଁ ତାଙ୍କୁ ଅନ୍ୟ ଏକ ହସ୍ପିଟାଲକୁ ସ୍ଥାନାନ୍ତର କରିବାକୁ ମଧ୍ୟ ଡାକ୍ତରମାନେ ପରାମର୍ଶ ଦେଇଥିଲେ । ଗତ ୨୫ ତାରିଖରେ ଭଉଣୀ ନିଶା ଏବଂ ଭିଣୋଇ ମଞ୍ଜୁନାଥ ମଲ୍ଲିକାର୍ଜୁନଙ୍କୁ ସେମାନଙ୍କ ସହ ବେଙ୍ଗାଲୁରୁର ଏକ ହସ୍ପିଟାଲକୁ ନେଇଯାଇଥିଲେ । ଏସମ୍ପର୍କରେ ନିଶା ନିଜ ବାପା ନାଗରାଜପ୍ପା ଓ ମା’କୁ ମଧ୍ୟ ଜଣାଇଥିଲେ । କିନ୍ତୁ କିଛି ଘଣ୍ଟାର ବ୍ୟବଧାନ ପରେ ସେମାନେ ମଲ୍ଲିକାର୍ଜୁନ୍ଙ୍କ ମୃତଦେହ ଧରି ଫେରିଆସିଥିଲେ ଏବଂ କହିଥିଲେ ଯେ ରାସ୍ତାରେ ମଲ୍ଲିକାର୍ଜୁନ୍ଙ୍କ ମୃତ୍ୟୁ ହୋଇଯାଇଛି । ଏହାକୁ ନେଇ ନାଗରାଜପ୍ପାଙ୍କ ସନ୍ଦେହ ବଢ଼ିବାରୁ ସେ ଝିଅ ନିଶାକୁ ସତ କହିବାକୁ ବାଧ୍ୟ କରିଥିଲେ । ପରେ ନିଶା ସବୁ ସତ କହିଥିଲେ । ପରିବାରର ସମ୍ମାନ ବଞ୍ଚାଇବା ପାଇଁ ସେ ଏବଂ ତାଙ୍କ ସ୍ୱାମୀ ମିଳିତ ଭାବେ ମଲ୍ଲିକାର୍ଜୁନ୍ଙ୍କ ଗଳାକାଟି ହତ୍ୟା କରିଥିଲେ । ମଲ୍ଲିକାର୍ଜୁନ ଏଚ୍ଆଇଭି ଏଡ୍ସ ସଂକ୍ରମିତ ହେବାଜନିତ ଖବର ପରିବାର ପାଇଁ ଲଜ୍ଜା ଆଣିବ । ନାଗରାଜପ୍ପା ସବୁ ଶୁଣିସାରିବା ପରେ ହୋଲାଲକେରେ ପୁଲିସ୍ ଷ୍ଟେସନରେ ଝିଅ ନିଶା ଏବଂ ଜ୍ୱାଇଁ ମଞ୍ଜୁନାଥଙ୍କ ବିରୁଦ୍ଧରେ ଅଭିଯୋଗ ଦାଖଲ କରିଥିଲେ । ପୁଲିସ ଏକ ମାମଲା ରୁଜୁ କରି ଅଧିକ ତଦନ୍ତ ଆରମ୍ଭ କରିଥିବା ବେଳେ ନିଶାଙ୍କୁ ଗିରଫ କରିଛି । ଅନ୍ୟପକ୍ଷେ ମଞ୍ଜୁନାଥ ଫେରାର ହୋଇଯାଇଛନ୍ତି ।
