କର୍ଣ୍ଣାଟକ: କର୍ଣ୍ଣାଟକର ଚିତ୍ରଦୁର୍ଗରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ବ୍ୟକ୍ତି ପୋଲିସ ଷ୍ଟେସନ ବାହାରେ ବିଷ ପିଇ ଦେଇଛନ୍ତି। ସୂଚନା ଅନୁଯାୟୀ, ପୋଲିସ ତାଙ୍କ ଝିଅର ପ୍ରେମିକଙ୍କ ବିରୋଧରେ ପୋକ୍ସୋ ମାମଲା ରୁଜୁ କରିବାରେ ବିଳମ୍ବ କରିବାରୁ ବ୍ୟକ୍ତି ଜଣକ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ସୋମବାର ହୋଲାଲକେରେ ତାଲୁକର ଜଣେ ବ୍ୟକ୍ତି ହୋଲାଲକେରେ ପୋଲିସ ଷ୍ଟେସନ ସମ୍ମୁଖରେ ବିଷ ପିଇ ଦେଇଥିଲେ ଏବଂ ପରେ ତାଙ୍କର ମୃତ୍ୟୁ ହୋଇଥିଲା। ବାପା ଅଭିଯୋଗ କରିଥିଲେ ଯେ ତାଙ୍କ ଝିଅ ନିଖୋଜ ହୋଇଯାଇଛି। ସେ ଏକ ସପ୍ତାହ ପୂର୍ବରୁ ଆନ୍ତଃଜାତି ପ୍ରେମ ବିବାହ କରିଥିବା ଅଭିଯୋଗ ହୋଇଛି।ପୋଲିସ କହିଛି ଯେ ଝିଅଟି ବୟସ୍କା ଥିଲା, ସ୍କୁଲ ରେକର୍ଡ ଅନୁଯାୟୀ ତା ବୟସ ୧୯ ବର୍ଷ। ଏହି ମାମଲାରେ ପୋଲିସ ସ୍ପଷ୍ଟ କରିଛି ଯେ ଝିଅଟିର ସ୍କୁଲ ଡକ୍ୟୁମେଣ୍ଟ ଏବଂ ଆଧାର କାର୍ଡରେ ତା ବୟସ ୧୮ ବର୍ଷରୁ ଅଧିକ ଦର୍ଶାଯାଇଥିଲା।
ପରେ ପରିବାର ଏକ ଜନ୍ମ ପ୍ରମାଣପତ୍ର ଦାଖଲ କରିଥିଲେ, ଯେଉଁଥିରେ ଦର୍ଶାଯାଇଥିଲା ଯେ ତା ବୟସ ୧୮ ବର୍ଷରୁ ଦୁଇ ମାସ କମ୍ ଥିଲା। ଏହି ସମ୍ପୂର୍ଣ୍ଣ ଘଟଣା ସମ୍ପର୍କରେ ପୋଲିସ କହିଛି- “ଆମେ ବିରୋଧାଭାସୀ କାଗଜପତ୍ର ଯାଞ୍ଚ କରିବା ଏବଂ ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ କରିବା ପୂର୍ବରୁ, ବ୍ୟକ୍ତି ଜଣକ ଏହି ପଦକ୍ଷେପ ନେଇଥିଲେ।” ଏଫଆଇଆର ଦାଖଲ କରିବାରେ ବିଳମ୍ବ ଏବଂ ବ୍ୟକ୍ତିଙ୍କ ମୃତ୍ୟୁ ହୋଲାଲକେରେ ପୋଲିସ ଷ୍ଟେସନ ବାହାରେ ଏକ ବିରାଟ ଉତ୍ତେଜନା ସୃଷ୍ଟି କରିଥିଲା। ପରିବାର ସଦସ୍ୟମାନେ ପୋଲିସ ଷ୍ଟେସନର ପ୍ରବେଶ ଦ୍ୱାରରେ ମୃତଦେହ ରଖି ପ୍ରତିବାଦ କରିଥିଲେ। ମୃତକଙ୍କ ପରିବାର ସଦସ୍ୟ ପୋଲିସ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରି ଅବହେଳା ଏବଂ ବିଳମ୍ବ ଯୋଗୁଁ ବ୍ୟକ୍ତିଙ୍କ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି। ଏହି ସମ୍ପୂର୍ଣ୍ଣ ଘଟଣାର ତଦନ୍ତ ଆରମ୍ଭ ହୋଇଛି।
