ନୂଆଦିଲ୍ଲୀ: କିମ୍ବଦନ୍ତୀ କ୍ରିକେଟର ଏବଂ ପୂର୍ବତନ ଭାରତୀୟ ଅଧିନାୟକ ସୁନୀଲ ଗାଭାସ୍କର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଏବଂ ରଣଜୀ ଟ୍ରଫି ଭଳି ଘରୋଇ ଟୁର୍ଣ୍ଣାମେଣ୍ଟ ମଧ୍ୟରେ ବଢ଼ୁଥିବା ପାର୍ଥକ୍ୟ ଉପରେ ଗଭୀର ଚିନ୍ତା ପ୍ରକାଶ କରିଛନ୍ତି। ଘରୋଇ କ୍ରିକେଟରେ ସାଂରଚନିକ ସଂସ୍କାର ପାଇଁ ଆହ୍ୱାନ କରିବାକୁ ଯାଇ ଗାଭାସ୍କର ଯଦିଓ ଆଇପିଏଲର ପ୍ରଶଂସା କରିଛନ୍ତି, କିନ୍ତୁ ଆଇପିଏଲରେ ଖେଳୁଥିବା ଖେଳାଳି ଏବଂ ଭାରତରେ ଘରୋଇ କ୍ରିକେଟରେ ଖେଳୁଥିବା ଖେଳାଳିଙ୍କ ମଧ୍ୟରେ ବଢ଼ୁଥିବା ପାର୍ଥକ୍ୟ ସମ୍ପର୍କରେ ମଧ୍ୟ ଗୁରୁତ୍ୱାରୋପ କରିଛନ୍ତି।
ଗାଭାସ୍କର କହିଛନ୍ତି, ଯେତେବେଳେ ଖେଳାଳିଙ୍କ ସ୍ୱୀକୃତି ଏବଂ ଆର୍ôଥକ ପୁରସ୍କାର କଥା ଆସେ ସେତେବେଳେ ଏହାକୁ ଅତ୍ୟନ୍ତ ଗୁରୁତ୍ୱର ସହ ଚିନ୍ତା କରାଯିବା ଉଚିତ୍। ଗାଭାସ୍କର ଭାରତୀୟ କ୍ରିକେଟ୍ ଉପରେ ଆଇପିଏଲ୍ର ଅସ୍ୱୀକାରଯୋଗ୍ୟ ପ୍ରଭାବକୁ ସ୍ୱୀକାର କରିଛନ୍ତି ଏବଂ ଜସପ୍ରିତ ବୁମରାହ, ହାର୍ଦ୍ଦିକ ପାଣ୍ଡ୍ୟା, କେଏଲ ରାହୁଲ, ମହମ୍ମଦ ସିରାଜ ଏବଂ ଯଶସ୍ୱୀ ଜୟସୱାଲଙ୍କ ଭଳି ପ୍ରତିଭାକୁ ପୋଷଣ କରିବାର ଶ୍ରେୟ ଦେଇଛନ୍ତି। ସେ ଗୁରୁତ୍ୱାରୋପ କରିଥିଲେ ଯେ ଏହି ଲିଗ୍ ଅନେକ କମ୍ ଜଣାଶୁଣା ଖେଳାଳିଙ୍କୁ ଜାତୀୟ ଏବଂ ବିଶ୍ୱସ୍ତରରେ ଖ୍ୟାତି ଆଣିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଏହାସତ୍ତ୍ୱେ ଘରୋଇ ସର୍କିଟ ଏବଂ ଆଇପିଏଲରେ ପ୍ରଦର୍ଶନକୁ ପୃଥକ୍ ଭାବେ ସମ୍ମାନିତ କରାଯାଉଥିବା କଥାକୁ ମଧ୍ୟ ସେ ଦର୍ଶାଇଥିଲେ। ବିଶ୍ୱ କ୍ରିକେଟ୍ ଇତିହାସରେ ଲିଟିଲ୍ ମାଷ୍ଟର ଭାବେ ଜଣାଶୁଣା ଗାଭାସ୍କରଙ୍କ କହିବାନୁସାରେ “ଆଇପିଏଲରେ ପ୍ରଦର୍ଶନ ଜଣେ ଅଜଣା ଖେଳାଳିଙ୍କୁ ଉଚ୍ଚ ସମ୍ମାନ ଦୌଡ଼ରେ ପ୍ରବେଶ କରାଇପାରେ।
ଏହା ରଣଜୀ ଟ୍ରଫିର ସମ୍ପୂର୍ଣ୍ଣ ବିପରୀତ, ଯେଉଁଠାରେ ଶ୍ରେଷ୍ଠ ପ୍ରଦର୍ଶନ ମଧ୍ୟ ଲାଇମଲାଇଟରେ ସ୍ଥାନ ପାଇବା ପାଇଁ ସଂଘର୍ଷ କରିଥାଏ। ସେ ଆଇପିଏଲ୍ରେ ରାଜସ୍ଥାନ ଦଳ ପାଇଁ ଖେଳୁଥିବା ୧୪ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କ ଉଦାହରଣ ଦେଇଛନ୍ତି। ବୈଭବଙ୍କୁ ରାଜସ୍ଥାନ ରୟାଲ୍ସ ୧.୧ କୋଟି ଟଙ୍କାରେ ଚୁକ୍ତିବଦ୍ଧ କରିଛି। ଗାଭାସ୍କର ଦର୍ଶାଇଥିଲେ ଯେ ଭାରତର ପାରମ୍ପରିକ ଘରୋଇ ଟୁର୍ଣ୍ଣାମେଣ୍ଟରେ ନିରନ୍ତର ଭଲ ପ୍ରଦର୍ଶନ କରୁଥିବା ଖେଳାଳିଙ୍କୁ ଏପରି ସୁଯୋଗ ବହୁତ କମ୍ ମିଳିଥାଏ। ସେ ଆର୍ôଥକ ଅସନ୍ତୁଳନ ଉପରେ ଆଲୋକପାତ କରି କହିଛନ୍ତି ଯେ ରଣଜୀ, ବିଜୟ ହଜାରେ କିମ୍ବା ସୟଦ ମୁସ୍ତାକ ଅଲି ସିଜନରେ ଭଲ ପ୍ରଦର୍ଶନ କରୁଥିବା ଖେଳାଳିମାନେ ମଧ୍ୟ ପ୍ରାୟତଃ ଜଣେ ଅଣକ୍ୟାପ୍ ଆଇପିଏଲ ଖେଳାଳିଙ୍କ ମୂଳ ମୂଲ୍ୟ – ୩୦ ଲକ୍ଷ ଟଙ୍କା ସହିତ ସମାନ ଭାବେ ମଧ୍ୟ ପାରିଶ୍ରମିକ ପାଇନଥାନ୍ତି।
ଗାଭାସ୍କର ଘରୋଇ କ୍ଷେତ୍ରରେ କଠିନ ପରିଶ୍ରମ କରୁଥିବା ଲୋକଙ୍କ ପାଇଁ ପରିସ୍ଥିତିକୁ “ପଙ୍ଗୁ’ ବୋଲି ବର୍ଣ୍ଣନା କରିଥିଲେ। ସମାଧାନ ସ୍ୱରୂପ, ଗାଭାସ୍କର ପରାମର୍ଶ ଦେଇ କହିଛନ୍ତି ଯେ, ରାଜ୍ୟ କ୍ରିକେଟ୍ ସଂଘଗୁଡ଼ିକ ଘରୋଇ ଖେଳାଳିଙ୍କ ପାଇଁ ସେମାନଙ୍କର ସମର୍ଥନ ତଥା ସେମାନଙ୍କ ପାରିଶ୍ରମିକ ବୃଦ୍ଧି ଉପରେ ବିଚାର କରିବା ଉଚିତ। “ଯଦି ମୁମ୍ବାଇ ଭଳି ଅନ୍ୟ ସଂଘଗୁଡ଼ିକ ମଧ୍ୟ ବିସିସିଆଇ ତା’ର ରଣଜୀ ଖେଳାଳିମାନଙ୍କୁ ଦେଉଥିବା ଦରମା ସହିତ ଦେୟ ଦିଅନ୍ତି, ତେବେ ଏହି ଅସନ୍ତୁଳନକୁ ବହୁ ପରିମାଣରେ ହ୍ରାସ କରାଯାଇପାରିବ। ଗାଭାସ୍କରଙ୍କ ମନ୍ତବ୍ୟ କ୍ରିକେଟ୍ ସମ୍ପ୍ରଦାୟ ମଧ୍ୟରେ ଭାରତର ପ୍ରମୁଖ ଘରୋଇ ପ୍ରତିଯୋଗିତାରେ ସନ୍ତୁଳନ ଏବଂ ମୂଲ୍ୟ ଫେରାଇ ଆଣିବା ପାଇଁ ବର୍ଦ୍ଧିତ ଦାବିକୁ ପ୍ରତିଫଳିତ କରେ ଯାହା ନିଶ୍ଚିତ କରିବ ଯେ ସମସ୍ତ ଫର୍ମାଟରେ ସ୍ଥିର ପ୍ରଦର୍ଶନକାରୀମାନଙ୍କୁ ପର୍ଯ୍ୟାପ୍ତ ଭାବରେ ପୁରସ୍କୃତ କରାଯିବ।
