ବେଙ୍ଗାଲୁରୁ: କର୍ଣ୍ଣାଟକରେ କଂଗ୍ରେସ ମୁଖ୍ୟମନ୍ତ୍ରୀ ପରିବର୍ତ୍ତନ କରିପାରେ। ଯଦିଓ ଦଳ ପକ୍ଷରୁ ଏ ସମ୍ପର୍କରେ ଆନୁଷ୍ଠାନିକ ଘୋଷଣା କରାଯାଇନାହିଁ, କିନ୍ତୁ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଏକ ବୟାନକୁ ନେଇ ଏପରି କିଛି ଅନୁମାନ କରାଯାଉଛି। ସିଦ୍ଧରମୈୟା କହିଛନ୍ତି, କର୍ଣ୍ଣାଟକରେ ମୁଖ୍ୟମନ୍ତ୍ରୀ ପରିବର୍ତ୍ତନ କରାଯିବା ନେଇ ନିଷ୍ପତ୍ତି ନିଆଯାଇଛି। ରାଜ୍ୟରେ କଂଗ୍ରେସ ସରକାର ଗଠନ କରିବାର ଇତିମଧ୍ୟରେ ଅଢ଼େଇ ବର୍ଷ ପୂରଣ ହେବାକୁ ଯାଉଥିବା ବେଳେ କଂଗ୍ରେସ ଏବେ ଏଠାରେ ଆଉଜଣଙ୍କୁ ମୁଖ୍ୟମନ୍ତ୍ରୀ କରିପାରେ ବୋଲି ଅନୁମାନ କରାଯାଉଛି।
ଏହିକ୍ରମେ ମୁଖ୍ୟମନ୍ତ୍ରୀ ପଦ ପାଇଁ ଦୌଡ଼ରେ ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କ ନାମ ଆଗରେ ଅଛି। ଗତ ଗୁରୁବାର ସିଦ୍ଧରମୈୟାଙ୍କ ବୟାନ ସୂଚାଇ ଦେଇଥିଲା ଯେ ତାଙ୍କର ଏବଂ ଡିକେ ଶିବକୁମାରଙ୍କ ମଧ୍ୟରେ ଏକ କଥାବାର୍ତ୍ତା ହୋଇଥିଲା। ଗଣମାଧ୍ୟମ ରିପୋର୍ଟ ଅନୁସାରେ, ସେ କହିଛନ୍ତି ଯେ ଶେଷରେ ହାଇକମାଣ୍ଡକୁ ସବୁକିଛି ଉପରେ ନିଷ୍ପତ୍ତି ନେବାକୁ ପଡିବ। ଟାଇମ୍ସ ଅଫ ଇଣ୍ଡିଆ ରିପୋର୍ଟ ଅନୁଯାୟୀ, ସିଦ୍ଧରମୈୟାଙ୍କ ଏହି ବକ୍ତବ୍ୟକୁ ତାଙ୍କର ପୂର୍ବ ବକ୍ତବ୍ୟ ସହିତ ଯୋଡାଯାଉଛି, ଯେତେବେଳେ ସେ ତାଙ୍କର ପାଞ୍ଚ ବର୍ଷର କାର୍ଯ୍ୟକାଳ ପୂରଣ କରିବା ବିଷୟରେ କହୁଥିଲେ ଏବଂ ରାଜ୍ୟରେ ମୁଖ୍ୟମନ୍ତ୍ରୀ ପରିବର୍ତ୍ତନ ଖବରକୁ ଅସ୍ୱୀକାର କରୁଥିଲେ। ଯେତେବେଳେ ଡିକେ ଶିବକୁମାରଙ୍କୁ ଏ ବିଷୟରେ କିଛି ଗଣମାଧ୍ୟମ ପ୍ରତିନିଧିମାନେ ପ୍ରଶ୍ନ କଲେ ସେତେବେଳେ ସେ କୌଣସି ପଦବୀ ପାଇଁ କୌଣସି ମହତ୍ତ୍ୱାକାଂକ୍ଷାକୁ ପ୍ରତ୍ୟାଖ୍ୟାନ କରିଥିଲେ। ସେ କହିଥିଲେ ଯେ ଆମେ ଆମର କାମ ଜାରି ରଖିବୁ। ଦଳର ହାଇକମାଣ୍ଡ ନେତୃତ୍ୱ ବିଷୟରେ ନିଷ୍ପତ୍ତି ନେବେ।
