ଇମ୍ଫାଲ: ମଣିପୁରର ହିଂସାରେ ଆଉ ଜଣେ ବିକ୍ଷୋଭକାରୀଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଆହତ ହୋଇଛନ୍ତି। ରବିବାର ବିଳମ୍ବିତ ରାତିରେ ଜିରିବାମ୍ ଜିଲ୍ଲାରେ ଉତ୍ତ୍ୟକ୍ତ ଜନତାଙ୍କୁ ନିୟନ୍ତ୍ରଣ କରିବା ପାଇଁ ସୁରକ୍ଷା ବାହିନୀ ଗୁଳି ଚାଳନା କରିଥିବା ବେଳେ ୨୦ ବର୍ଷୀୟ ଯୁବକ କେ ଅଥୁବାଙ୍କର ମୃତ୍ରୁ୍ୟ ଘଟିଥିବା ସୂଚନା ରହିଛି। ଏହାକୁ ନେଇ ଉତ୍ତେଜନା ଆହୁରି ବଢ଼ିଯାଇଛି। ପରିସ୍ଥିତିକୁ ଦୃଷ୍ଟିରେ ରଖି ଅତିରିକ୍ତ ୫୦ ପ୍ଲାଟୁନ୍ କେନ୍ଦ୍ରୀୟ ଫୋର୍ସଙ୍କୁ ମଣିପୁରରେ ନିୟୋଜିତ କରାଯାଇଛି। ଏସବୁ ମଧ୍ୟରେ ସ୍ୱରାଷ୍ଟ୍ର ମନ୍ତ୍ରୀ ଅମିତ୍ ଶାହ ଆଜି ଦ୍ୱିତୀୟ ଦିନରେ ମଧ୍ୟ ମଣିପୁର ହିଂସାଜନିତ ପରିସ୍ଥିତି ଉପରେ ସମୀକ୍ଷା ବୈଠକ କରିଥିବା ଜଣାପଡିଛି।
ମଣିପୁରରରେ କୁକି ଉଗ୍ରବାଦୀ ଗୋଷ୍ଠୀ ମୈତେଇ ଗୋଷ୍ଠୀର ୬ ଜଣଙ୍କୁ (୩ ମହିଳା ଓ ୩ ଶିଶୁ) ନିର୍ମର୍ମ ଭାବେ ହତ୍ୟା କରିବା ପରେ ସମ୍ପୂର୍ଣ୍ଣ ମଣିପୁରରେ ଏବେ ବିରୋଧ ଓ ହିଂସା ଜାରି ରହିଛି। ସେହିପରି ଗତକାଲି ଏକ ଶିଶୁର ମୁଣ୍ଡବିହୀନ ମୃତଦେହ ମଧ୍ୟ ମିଳିଥିଲା। ଏହି ଘଟଣାରେ ମଧ୍ୟ କୁକି ଗୋଷ୍ଠୀଙ୍କ ହାତ ଥିବା ଅନୁମାନ କରାଯାଉଛି। ତେବେ ଏହାର ପ୍ରତିବାଦରେ ମୈତେଇ ଗୋଷ୍ଠୀ ଏବଂ ମଣିପୁରର ଅନ୍ର ସାଧାରଣ ନାଗରିକମାନେ ବିକ୍ଷୋଭ ତଥା ପ୍ରତିବାଦକୁ ଓହ୍ଲାଇଛନ୍ତି। ବିକ୍ଷୋଭକାରୀମାନେ ବିଭିନ୍ନ ନେତା ଓ ରାଜନୀତିକ ଦଳର ଅଫିସ ଉପରେ ଆକ୍ରମଣ କରିବାରୁ ପୁଲିସ୍ ସେମାନଙ୍କ ଉପରକୁ ଗୁଳି ଚଳାଇଥିଲା। ଏଥିଯୋଗୁ ଜଣେ ୨୦ ବର୍ଷୀୟ ଯୁବକ ଜିରିବାମ ଜିଲ୍ଲାରେ ପ୍ରାଣ ହରାଇଛନ୍ତି। ହିଂସାକାଣ୍ଡ ମଧ୍ୟରେ ଭାରତୀୟ ଜନତା ପାର୍ଟି (ବିଜେପି) ଏବଂ କଂଗ୍ରେସର ସ୍ଥାନୀୟ କାର୍ଯ୍ୟାଳୟରୁ ନିଆଯାଇଥିବା ଆସବାବପତ୍ର ଏବଂ ଅନ୍ୟାନ୍ୟ ସମ୍ପତ୍ତିରେ ସ୍ଥାନୀୟ ଲୋକମାନେ ନିଆଁ ଲଗାଇ ଦେଇଛନ୍ତି। ଜିରିବାମ୍ ପୁଲିସ୍ ଷ୍ଟେସନର ୫୦୦ ମିଟର ମଧ୍ୟରେ ଏହି ହିଂସା ଘଟିଥିଲା। ଆଦିବାସୀ ଓ ଅଣଆଦିବାସୀଙ୍କ ସଂଘର୍ଷ ଯୋଗୁ ଅଶାନ୍ତ ହୋଇଥିବା ମଣିପୁରର ସ୍ଥିତି ଏବେ ଅତ୍ୟନ୍ତ ସାଂଘାତିକ ହୋଇପଡ଼ିଛି। ପୋଡ଼ାଜଳା ଯୋଗୁ ମଣିପୁର ସ୍ଥିତି ଦିନକୁ ଦିନ ବେକାବୁ ହେଉଛି।
