ତିଗିରିଆ : ତିଗିରିଆ ଥାନା ଅନ୍ତର୍ଗତ ବିନ୍ଧାଣୀମା ପଞ୍ଚାୟତ ଅନ୍ତର୍ଗତ ବିନ୍ଧାଣୀମା ଗ୍ରାମରେ ପ୍ରେମ ସମ୍ପର୍କକୁ କେନ୍ଦ୍ରକରି ଗତକାଲି ବିଳମ୍ବିତ ରାତିରେ ବୋମାମାଡ଼ ହୋଇଛି । ବୋମାମାଡ଼ରେ ଗୋଟିଏ ବଖରା ଘରର ଚାଳ ନଷ୍ଟ ହୋଇଯାଇଛି । ଏ ନେଇ ଥାନାରେ ଲିଖିତ ଅଭିଯୋଗ କରିଛନ୍ତି କୁନି ଦଳେଇ । ଅଭିଯୋଗ ପରେ ମାମାଲା ରୁଜୁକରି ଅଭିଯୁକ୍ତମାନଙ୍କୁ ପୁଲିସ ଗିରଫ କରିବା ପାଇଁ ତନାଘନା କରି ତଦନ୍ତ ଚଳାଇଛି । ଏହି ଘଟଣାକୁ ନେଇ ଗ୍ରାମରେ ଚାପା ଉତ୍ତେଜନା ଲାଗି ରହିଛି ।
ସୂଚନା ମୁତାବକ, ଗତକାଲି ମଧ୍ୟରାତ୍ରରେ ବିନ୍ଧାଣୀମା ପଞ୍ଚାୟତ ବିନ୍ଧାଣୀମା ଗ୍ରାମରେ ପୁରୁଣା ପ୍ରେମ ସମ୍ପର୍କକୁ ନେଇ କୁନି ଦଳେଇଙ୍କ ଘର ଉପରକୁ ବୋମା ମାଡ଼ କରାଯାଇଥିଲା । ବୋମାମାଡ଼ରେ ଘରର କାନ୍ଥ ଓ କେତେକ ଆସବାବପତ୍ର କ୍ଷତିଗ୍ରସ୍ତ ହୋଇଥିବା ସେ ଅଭିଯୋଗ କରିଛନ୍ତି । ଅଭିଯୋଗକାରୀ କୁନି ଦଳେଇ ସେହି ଗ୍ରାମର ଟୁଲୁ ସେଠ, ବୁଲୁ ସେଠ ଓ କୁଲୁ ସେଠ ତିନିଜଣ ମିଶି ବୋମାମାଡ଼ କରିଛନ୍ତି ବୋଲି ଏତଲାରେ ଦର୍ଶାଇଛନ୍ତି । କୁନିଙ୍କ ଅଭିଯୋଗକୁ ଭିତ୍ତିକରି ତିଗିରିଆ ଥାନା ପକ୍ଷରୁ ତଦନ୍ତ ଆରମ୍ଭ କରାଯାଇଛି । ଖୁବ୍ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଥାନା ଅଧିକାରୀ ସୁଚିତ୍ରା ଜେନା ସୂଚନା ଦେଇଛନ୍ତି ।
