ଭୁବନେଶ୍ୱର : ଭାରତ ବର୍ଷର ସବୁଠୁ ଚର୍ଚ୍ଚିତ ତଥା ଲୋକପ୍ରିୟ ରିଅଲିଟି ଶୋ’ ‘ବିଗ୍ ବସ୍’ରେ ନଜର ଆସିବେ ମୁମ୍ବାଇରେ ରହୁଥିବା ଓଡ଼ିଆ ଅଭିନେତ୍ରୀ ପ୍ରକୃତି ମିଶ୍ର । ଆସନ୍ତା ଅକ୍ଟୋବର ୧ରୁ ଆରମ୍ଭ ହେବାକୁ ଯାଉଛି ‘ବିଗ୍ ବସ୍-୧୬’ । ଏଥର ଶୋ’ରେ କାହା ଗେମ୍ ରହିବ ରୋମାଞ୍ଚପୂର୍ଣ୍ଣ । କେଉଁ ପ୍ରତିଯୋଗୀଙ୍କ ଗେମ୍ ଶୋ’ର ଟିଆର୍ପି ବଢ଼ାଇବ । ଏଭଳି ଅନେକ ପ୍ରଶ୍ନ ଉଠୁଥିବାବେଳେ ଏକ ପ୍ରମୋ ରିଲିଜ୍ କରି ଦର୍ଶକଙ୍କ ଉତ୍କଣ୍ଠା ବଢ଼ାଇ ଦେଇଛନ୍ତି ଖୋଦ୍ ‘ବିଗ୍ ବସ୍’ ।
କିନ୍ତୁ ଏଯାଏଁ ବିଧିବଦ୍ଧ ଭାବେ କୌଣସି ପ୍ରତିଯୋଗୀଙ୍କ ନାଁ ଘୋଷଣା ହୋଇନାହିଁ । ମାତ୍ର ନିକଟରେ ବ୍ୟକ୍ତିଗତ କାରଣ ପାଇଁ ଚର୍ଚ୍ଚାକୁ ଆସିଥିବା ପ୍ରକୃତି ‘ବିଗ୍ ବସ୍’କୁ ଯିବେ ବୋଲି ଚର୍ଚ୍ଚା ଜୋର୍ ହେଉଛି । କଥା ମୁମ୍ବାଇରୁ ଆସି ଓଲିଉଡରେ ପହଞ୍ଚିଛି । ଯଦି ଏହା ସତ ହୁଏ, ତେବେ ଓଲିଉଡର ସ୍ୱିଟ୍ହାର୍ଟ ଭାବେ ପରିଚିତ ପ୍ରକୃତି ପୁଣିଥରେ ଜାତୀୟସ୍ତରରେ ହଲଚଲ ସୃଷ୍ଟି କରି ନିଜ ପତିଆରା ରଖିବେ । ବର୍ତ୍ତମାନ ସେ ମୁମ୍ବାଇରେ ଅଭିନେତା ନାନା ପାଟେକରଙ୍କ ସହ ଏକ ହିନ୍ଦୀ ସିନେମା ସୁଟିଂରେ ବ୍ୟସ୍ତ ରହିଛନ୍ତି ।
ଏଥିସହ ସେ ବ୍ୟକ୍ତିଗତ ବିବାଦରେ ଛନ୍ଦି ହେବା ପୂର୍ବରୁ ଗତ ଜୁନ୍ ୩ରେ ବାବୁସାନ୍ଙ୍କ ସହିତ ଓଡ଼ିଆ ଚଳଚ୍ଚିତ୍ର ‘ପ୍ରେମମ୍’ରେ ନଜର ଆସିଥିଲେ । ଏହାପରେ ଦ୍ୱିଭାଷୀ ଚଳଚ୍ଚିତ୍ର ‘ଦ୍ରୌପଦୀ’କୁ ନେଇ ସୋସିଆଲ୍ ମିଡିଆରେ ବେଶ୍ ଚର୍ଚ୍ଚାରେ ରହିଥିଲେ । ଓଡ଼ିଆ ଚଳଚ୍ଚିତ୍ର ‘ହାଲୋ ଆର୍ସି’ରେ ଅଭିନୟ ପାଇଁ ଜାତୀୟ ଚଳଚ୍ଚିତ୍ର ପୁରସ୍କାରପ୍ରାପ୍ତ ହୋଇଥିବା ପ୍ରକୃତି ଜାତୀୟସ୍ତରରେ ଅନେକ ସଫଳତା ସାଉଁଟିଛନ୍ତି । ୨୦୧୪ରେ ଜୀଟିଭିରେ ‘ଇଣ୍ଡିଆଜ୍ ବେଷ୍ଟ ସିନେଷ୍ଟାର୍ସ କି ଖୋଜ୍’ ଏବଂ ୨୦୧୬ରେ ସାବ୍ ଟିଭିରେ ‘ତ୍ରିଦେବିୟାନ’ରେ ନଜର ଆସିଥିଲେ । ପରେ ଷ୍ଟାର୍ ଭାରତରେ ପ୍ରସାରିତ ‘ଜୟ କହ୍ନେୟା ଲାଲ୍ କି’ ଏବଂ ଆଣ୍ଡ୍ ଟିଭିରେ ପ୍ରସାରିତ ‘ବିଟ୍ଟୀ ବିଜ୍ନେସ୍ୱାଲି’ରେ ଅଭିନୟ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ ।
‘ଏମ୍ଟିଭି’ରେ ପ୍ରସାରିତ ରିଅଲିଟି ଶୋ’ ‘ଏସ୍ ଅଫ୍ ସ୍ପେସ୍-୨’ରେ ମଧ୍ୟ ସାମିଲ ହୋଇଥିଲେ । ଶିଶୁ କଳାକାର ଭାବେ ୨୦୦୬ରେ ଓଡ଼ିଆ ଚଳଚ୍ଚିତ୍ର ‘ଶାଶୁଘର ଚାଲିଯିବି’ରୁ ସେ ଅଭିନୟ ଜୀବନ ଆରମ୍ଭ କରିଥିଲେ । ସଙ୍ଗୀତ ନିର୍ଦ୍ଦେଶକ ମନ୍ମଥ ମିଶ୍ର ଏବଂ କଣ୍ଠଶିଳ୍ପୀ କ୍ରିଷ୍ଣା ମିଶ୍ରଙ୍କ ଝିଅ ହେଉଛନ୍ତି ପ୍ରକୃତି ।
