-ଆହ୍ଲାବାଦ୍ରୁ ୩ଟି କାର୍, ବ୍ୟାଙ୍କ ପାସବୁକ୍ ଜବତ
ଭୁବନେଶ୍ୱର: ନକଲି ଡାକ୍ତର ରମେଶ ସ୍ୱାଇଁଙ୍କ ଦ୍ୱିତୀୟ ପତ୍ନୀ କମଳା ସ୍ୱାଇଁଙ୍କୁ ମହିଳା ଥାନା ପୁଲିସ ରବିବାର ଠାରୁ ୪ଦିନିଆ ରିମାଣ୍ଡରେ ନେଇଛି । ପୁଲିସ ୭ଦିନ ପାଇଁ ରିମାଣ୍ଡରେ ନେବାକୁ ଆବେଦନ କରିଥିବାବେଳେ କୋର୍ଟ ୪ଦିନ ଅନୁମତି ଦେଇଛନ୍ତି । ରମେଶଙ୍କ ଠକେଇରୁ ଉପାର୍ଜିତ ଅର୍ଥ କେଉଁଠାରେ ରଖିଛନ୍ତି, ସେହି ଟଙ୍କାରେ କେଉଁଠାରେ ସବୁ ସମ୍ପତ୍ତି କିଣିଛନ୍ତି, ସେ ସମ୍ପର୍କରେ କମଳାଙ୍କୁ ପଚରାଉଚରା ଚାଲିଛି । ସେହିପରି ରମେଶଙ୍କୁ ରିମାଣ୍ଡରେ ନେବାକୁ କୋର୍ଟ ଅନୁମତି ଦେଇନାହାନ୍ତି । ପୂର୍ବରୁ ରମେଶ ୪ଥର ରିମାଣ୍ଡରେ ଆସିଛନ୍ତି । ସେଥିପାଇଁ ରିମାଣ୍ଡ ଅନୁମତି ମିଳିନଥିବା ଜଣାପଡ଼ିଛି ।
ସେପଟେ କମଳାଙ୍କ ଆହ୍ଲାବାଦ୍ ସ୍ଥିତ ଘରେ ଚଢ଼ଉ କରି ପୁଲିସ ବ୍ୟାଙ୍କ ପାସବୁକ୍, ଫିକ୍ସ ଡିପୋଜିଟ୍ ବଣ୍ଡ ଓ ଅନ୍ୟନ୍ୟା କାଗଜପତ୍ର ଜବତ କରିଛି । ଖାଲି ଏତିକି ନୁହେଁ, ସେଠାରୁ ୩ଟି କାର୍ ମଧ୍ୟ ଜବତ ହୋଇଛି । ସେଥିମଧ୍ୟରୁ ଦୁଇଟି କାର୍ ବିଦୁପ୍ରକାଶ ସ୍ୱାଇଁ ନାଁରେ ଥିବାବେଳେ ଗୋଟିଏ କମଳା ସ୍ୱାଇଁଙ୍କ ନାଁରେ ରହିଛି । ଏଥିସହ କମଳାଙ୍କ ପଡ଼ୋଶୀ ଓ ଅଫିସ୍ ଷ୍ଟାଫ୍ଙ୍କୁ ପଚରାଉଚରା କରାଯାଇଛି । ପଡ଼ୋଶୀ ଓ ଅଫିସର ସହକର୍ମୀଙ୍କୁ କମଳା ଅନ୍ଧାରରେ ରଖିଥିଲେ । ନିଜ ସ୍ୱାମୀ ଜଣେ ବଡ଼ ଡାକ୍ତର କହି ସେ ଭୁଆଁ ବୁଲାଉଥିବା ମହିଳା ଥାନାଧିକାରିଣୀ ସନ୍ତୋଷିନୀ ବେହେରା କହିଛନ୍ତି ।
ସୂଚନା ଅନୁଯାୟୀ, ରମେଶଙ୍କ ଆକାଉଣ୍ଟରୁ କମଳାଙ୍କ ଆକାଉଣ୍ଟକୁ ଲକ୍ଷାଧିକ ଟଙ୍କା ଟ୍ରାନ୍ସଫର ହୋଇଥିବାର ପ୍ରମାଣ ପୁଲିସ ହାତରେ ଲାଗିଛି । ରମେଶଙ୍କୁ ଜାମିନ୍ରେ ବାହାର କରିବାକୁ କମଳା ପୁରା ପ୍ରସ୍ତୁତି କରିଥିଲେ । ଜଣେ ଓକିଲଙ୍କୁ ଯୋଗାଡ଼ କରିବା ସହ ସମସ୍ତ ଟଙ୍କା ନିଜେ ବହନ କରୁଥିବା ଜଣାପଡ଼ିଛି । ତେବେ ରାଜ୍ୟ ବାହାରେ ରମେଶଙ୍କ ସମ୍ପତ୍ତି ଥିବା କୁହାଯାଉଥିବାରୁ ସେ ଦିଗରେ ମଧ୍ୟ ଖୋଳତାଡ଼ ଚାଲିଛି । ଗିରଫଦାରୀକୁ ଭୟ କରି କମଳା ଫେରାର ହୋଇ ଝାରଖଣ୍ଡରେ ଥିଲେ । ପରେ ପୁଲିସ ଝାରଖଣ୍ଡର ରାଞ୍ଚିରୁ ତାଙ୍କୁ ଧରିବାରେ ସଫଳ ହୋଇଥିଲା ।
