ନୟାଗଡ଼ : ନୟାଗଡ଼ ଜିଲ୍ଲା ବାଣିଗୋଚ୍ଛା ଅଞ୍ଚଳର ଜନୈକ ନବମ ଶ୍ରେଣୀ ଛାତ୍ରୀ ଅନ୍ତସତ୍ତ୍ୱା ହେବା ଜଣାପଡିବା ପରେ ସିଡବ୍ଲୁସି ନିର୍ଦ୍ଦେଶରେ ପ୍ରଥମେ ଜିଲ୍ଲା ମୁଖ୍ୟଚିକିତ୍ସାଳୟ ପରିସରରେ ଥିବା ୱାନ୍ଷ୍ଟପ ସେଣ୍ଟରରେ ପହଞ୍ଚାଇଥିଲେ । ସେଠାରେ ଦୁଇଦିନ ରହିବା ପରେ ତାଙ୍କୁ ସପସ୍ୟା ଗୃହକୁ ପଠାଇ ଦିଆଯାଇଛି । ସୂଚନା ଅନୁଯାୟୀ, ଛାତ୍ରୀ ଜଣକ ଘର ବାଣିଗୋଚ୍ଛା ହୋଇଥିବା ବେଳେ ସେ ଗଣିଆ ଅଞ୍ଚଳର ଏକ ଆବାସିକ ବିଦ୍ୟାଳୟରେ ଅଧ୍ୟୟନ କରୁଥିଲେ ।
କରୋନା ଯୋଗୁଁ ସମସ୍ତ ବିଦ୍ୟାଳୟ ଛୁଟି ଥିବାରୁ ସେ ଘରକୁ ପଳାଇ ଆସିଥିଲେ । ସେହି ସମୟରେ ସେ ଅନ୍ତସତ୍ତ୍ୱା ହୋଇଥିଲେ ମଧ୍ୟ ପରିବାରଲୋକେ ଜାଣିପାରି ନଥିଲେ । ଛାତ୍ରୀଜଣକ ସ୍କୁଲକୁ ଯିବା ପରେ ସ୍କୁଲ କର୍ତ୍ତୃପକ୍ଷ ଏହା ଜାଣିପାରି ସିଡବ୍ଲୁସିକୁ ଖବର ଦେଇଥିଲେ । ସଂପୃକ୍ତା ଛାତ୍ରୀକୁ ବାଣିଗୋଚ୍ଛା ଥାନା ଅଞ୍ଚଳର ୨୨ବର୍ଷୀୟ ଯୁବକ ପ୍ରେମ ଜାଲରେ ଫସାଇ, ପରେ ବିବାହର ପ୍ରଲୋଭନ ଦେଖାଇ ଶାରୀରିକ ସମ୍ପର୍କ ରଖିଥିଲେ । ଫଳରେ ସେ ଅନ୍ତସତ୍ତତ୍ୱା ହୋଇଥିଲେ । ଏବେ ଛାତ୍ରୀ ଜଣକ ୭ମାସର ଅନ୍ତସତ୍ତ୍ୱା ହୋଇଥିବା ଜଣାପଡିଛି । ପରିବାର ଲୋକଙ୍କ ଅଭିଯୋଗ ପରେ ଏବେ ସିଡବ୍ଲୁସି ପକ୍ଷରୁ ସଂପୃକ୍ତ ଛାତ୍ରୀଙ୍କୁ ଉଦ୍ଧାର କରାଯାଇ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଏ ନେଇ ବାଣିଗୋଚ୍ଛା ଥାନା ପକ୍ଷରୁ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଚାଲିଛି ।
