ମୁମ୍ବାଇ: ମହାରାଷ୍ଟ୍ରର ନାଗପୁରରେ ଗଣେଶ ବିସର୍ଜନ ଶୋଭାଯାତ୍ରା ବେଳେ ଘଟିଛି ଏକ ବଡ଼ ଦୁର୍ଘଟଣା । ଗୁରୁବାର ସନ୍ଧ୍ୟାରେ ଏଠାରେ ଉମରେଡ୍ ଅଞ୍ଚଳରେ ଗଣେଶ ବିସର୍ଜନ ଶୋଭାଯାତ୍ରା ଚାଲିଥିଲା । ଏହି ସମୟରେ ଆତସବାଜି ମଧ୍ୟ ଜାରି ରହିଥିଲା । ହେଲେ ଏହାରି ଭିତରେ ହଠାତ୍ ବାଣ ନିଆଁ ଅନେକ ଲୋକଙ୍କ ଉପରେ ପଡ଼ିଥିଲା । ଫଳରେ ଏହା ସଂସ୍ପର୍ଶରେ ଆସି ୭ ଜଣ ମହିଳା ପୋଡ଼ି ହୋଇଯାଇଥିବା ସୂଚନା ରହିଛି । ପ୍ରବଳ ଭିଡ଼ ହେତୁ ଘଟଣା ପରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ବର୍ତ୍ତମାନ ପୋଡ଼ି ଯାଇଥିବା ମହିଳାମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ସେଠାରେ ସେମାନଙ୍କ ଚିକିତ୍ସା ଚାଲିଛି ।
ନାଗପୁରର ଉମରେଡ୍ ଅଞ୍ଚଳରେ ଗଣେଶ ମୂର୍ତ୍ତି ବିସର୍ଜନ ଶୋଭାଯାତ୍ରା ବେଳେ କେତେକ ମହିଳା ଢୋଲବାଜା ବଜାଉଥିଲେ । ଏହି ସମୟରେ ଭିଡ଼ ଭିତରେ କେହି ଜଣେ ବାଣ ଫୁଟାଇଥିଲା ଏବଂ ବାଣ ନିଆଁ ଲୋକଙ୍କ ଉପରେ ଆସି ପଡ଼ିଥିଲା । ଦୁର୍ଘଟଣା ପରେ ଲୋକେ ଚିତ୍କାର କରିଥିଲେ । ଘଟଣାସ୍ଥଳରେ ଭୟର ବାତାବରଣ ଖେଳିଯାଇଥିଲା । ଧାଁ ଦୌଡ଼ରେ ମଧ୍ୟ କିଛି ଲୋକ ଆହତ ହୋଇଥିବା ଜଣାଯାଇଛି । ବାଣ ନିଆଁ ସଂସ୍ପର୍ଶରେ ଆସି ୭ ଜଣ ମହିଳା ପୋଡ଼ି ହୋଇଯାଇଛନ୍ତି । ପୋଲିସ ଏହି ଘଟଣାର ତଦନ୍ତ କରୁଛି ।
