ଲକ୍ଷ୍ନୌ: ବିଶ୍ବାସଘାତ ସାଜିଲା ଡ୍ରାଇଭର । ସ୍କୁଲ ଭ୍ୟାନରେ ଦୁଷ୍କର୍ମର ଶିକାର ହେଲେ ଛାତ୍ରୀ । ଉତ୍ତରପ୍ରଦେଶର ରାୱତପୁର ଥାନା ଅଞ୍ଚଳରେ ଘଟିଛି ଏଭଳି ଲୋମହର୍ଷଣକାରୀ ଘଟଣା । ଷଷ୍ଠ ଶ୍ରେଣୀରେ ପଢୁଥିବା ଜଣେ ଛାତ୍ରୀଙ୍କୁ ଦୁଷ୍କର୍ମ କରିଛି ନିଷ୍ଠୁର ଡ୍ରାଇଭର । ଛାତ୍ରୀ ଜଣକ ପଢୁଥିବା ସ୍କୁଲ ଭ୍ୟାନ ଡ୍ରାଇଭର ନାଁରେ ଆସିଛି ଏଭଳି ଅଭିଯୋଗ । ଏନେଇ ପରିବାର ଲୋକେ ଥାନାରେ ଅଭିଯୋଗ କରିଛନ୍ତି । ଅଭିଯୋଗ ପରେ ନାବାଳିକା ଛାତ୍ରୀଙ୍କ ଡାକ୍ତରୀ ମାଇନା କରାଯାଇଥିବା ଜଣାପଡିଛି । ଅଭିଯୋଗ ସତ ହୋଇଥିବା ନେଇ ତଦନ୍ତ ବେଳେ ଜାଣିବାକୁ ପାଇଛି ପୋଲିସ । ଏହି ଦୁଷ୍କର୍ମ ମାମଲାରେ ଅଭିଯୁକ୍ତ ଡ୍ରାଇଭରକୁ ଗିରଫ କରି ପୋଲିସ କୋର୍ଟ ଚାଲାଣ କରିଛି । ସୂଚନା ଅନୁସାରେ, ଦୁଷ୍କର୍ମର ଶିକାର ହେବା ପରେ ସ୍କୁଲରେ ପହଞ୍ଚି ଛାତ୍ରୀ ଜଣକ ପ୍ରଥମେ ପ୍ରଧାନଶିକ୍ଷକଙ୍କୁ ଏହି ଘଟଣା ସମ୍ପର୍କରେ କହିଥିଲେ । ହେଲେ ପ୍ରଧାନଶିକ୍ଷକଙ୍କ ଏହି କଥାକୁ ହାଲୁକା ଭାବେ ନେଇଥିଲେ ।
ପରେ ଛାତ୍ରୀ ଜଣକ ଘରେ ପହଞ୍ଚି ପରିବାର ଲୋକଙ୍କ ଆଗରେ ଘଟଣା ସମ୍ପର୍କରେ କହିଥିଲେ। ଏନେଇ ଶନିବାର ଦିନ ପରିବାରଲୋକେ ରାୱତପୁର ଥାନାରେ ପହଞ୍ଚି ଲିଖିତ ଅଭିଯୋଗ କରିଥିଲେ । ଏହାପରେ ଛାତ୍ରୀଙ୍କର ଡାକ୍ତରୀ ମାଇନା କରାଯିବା ପରେ ସେ ଦୁଷ୍କର୍ମର ଶିକାର ହୋଇଥିଲା ଜଣାପଡିଥିଲା । ଏହାପରେ ଭ୍ୟାନ ଚାଳକକୁ ଗିରଫ କରିଛି ପୋଲିସ । ଏହାସହ ଘଟଣାକୁ ଗମ୍ଭୀରତାର ସହ ନେଇନଥିବାରୁ ପ୍ରଧାନ ଶିକ୍ଷକଙ୍କ ନାଁରେ ମଧ୍ୟ ଅଭିଯୋଗ ହୋଇଛି । ନାବାଳିକା ଜଣକ ଦୁଷ୍କର୍ମର ଶିକାର ହୋଇଥିବା ଜାଣିବା ପରେ ମଧ୍ୟ ପ୍ରଧାନଶିକ୍ଷକ ଜଣଙ୍କ କିପରି ଏଭଳି ଭାବେ ବେପରୁଆ ହୋଇପାରିଲେ ତାହାକୁ ନେଇ ଉଠିଛି ପ୍ରଶ୍ନ । ସେପଟେ ଏହି ମାମଲାକୁ ଅତି ଗୁରୁତର ସହ ନେଇଛି ପୋଲିସ । କେବଳ ଏହି ଜଣେ ଛାତ୍ରୀ ଦୁଷ୍କର୍ମର ଶିକାର ହୋଇଛନ୍ତି ନା ଅନ୍ୟମାନଙ୍କୁ ମଧ୍ୟ ଏଭଳି ନିର୍ଯାତନା ଦିଆଯାଇଛି ସେନେଇ ପୋଲିସ ତନାଘନା କରୁଛି । ଏଥିପାଇଁ ସାଇଣ୍ଟିଫିକ ଟିମ୍ ସେହି ଭ୍ୟାନରେ ପରୀକ୍ଷା ନୀରିକ୍ଷା କରୁଛନ୍ତି । ଅଭିଯୁକ୍ତର ଫିଙ୍ଗର ପ୍ରିଣ୍ଟ ନିଆଯାଇଥିବାବେଳେ ଭ୍ୟାନରେ ଛାନଭିନ କରୁଛି ଟିମ୍ । ତେବେ ଏହି ଘଟଣା ସମଗ୍ର ଅଞ୍ଚଳରେ ଆଲୋଡନ ସୃଷ୍ଟି କରିଛି।
