କୋଟିଆ ଆମର; ଏହା ହିଁ ଧ୍ରୂବ ସତ୍ୟ: ଭକ୍ତ

ରାଜ୍ୟ ସରକାର ତୁରନ୍ତ ଏକ ସ୍ୱତନ୍ତ୍ର ବିକାଶ ବୋର୍ଡ଼ ଗଠନ କରି ସ୍ବତନ୍ତ୍ର ପ୍ୟାକେଜ୍ ଘୋଷଣା କରନ୍ତୁ
ଭୁବନେଶ୍ବର:  ଗୁରୁବାର ମଧ୍ୟାହ୍ନରେ ପିସିସି ସଭାପତି ଏକ ସାମ୍ବାଦିକ ସମ୍ମିଳନୀରେ କୋଟିଆ ଗସ୍ତର ଅଭିଜ୍ଞତା ବର୍ଣ୍ଣନା କରିବା ସହ କୋଟିଆର ସୁରକ୍ଷା ପାଇଁ ସରକାରଙ୍କ ଆଗରେ ଏକାଧିକ ଦାବି ଉପସ୍ଥାପନ କରିଥିଲେ। ପିସିସି ସାମାଜିକ ଗଣମାଧ୍ୟମ ବିଭାଗ ଅଧ୍ୟକ୍ଷ ବିଶ୍ୱଜିତ ମହାନ୍ତିଙ୍କ ସଂଯୋଜନାରେ ଆୟୋଜିତ ଏହି ସାମ୍ବାଦିକ ସମ୍ମିଳନୀରେ ଶ୍ରୀ ଦାସ କହିଥିଲେ:-
କୋଟିଆ ଓଡ଼ିଶାର କୋରାପୁଟ ଜିଲ୍ଲାର ପୋଟ୍ଟାଙ୍ଗୀ ବ୍ଲକ ଅଧୀନରେ ରହିଥିବା ବେଳେ ଆନ୍ଧ୍ରପ୍ରଦେଶ ଏହାକୁ ପାର୍ବତୀପୁରମ ମାନ୍ୟମ ଜିଲ୍ଲାର ସାଲୁର ମଣ୍ଡଳର ଏକ ଅଂଶ ଭାବେ ଅଯଥାର୍ଥ ଦାବି କରୁଛି।
ସ୍ୱାଧୀନତା ପୂର୍ବ ଏବଂ ଜୟପୁର ଜମିଦାରୀ ଗୋଷ୍ଠୀର ସମୟ
ଭାରତର ସ୍ୱାଧୀନତା ପୂର୍ବରୁ, ସମଗ୍ର କୋଟିଆ ଅଞ୍ଚଳ ମାନ୍ଦ୍ରାଜ ପ୍ରେସିଡେନ୍ସି ଅଧୀନରେ ଥିବା ଜୟପୁର ଜମିଦାରୀ (ଷ୍ଟେଟ୍) ର ଅଂଶ ଥିଲା ।
୧ ଅପ୍ରେଲ ୧୯୩୬ ବ୍ରିଟିଶ ସରକାର ଭାଷା ଭିତ୍ତିରେ ମାନ୍ଦ୍ରାଜ ପ୍ରେସିଡେନ୍ସିରୁ ଓଡ଼ିଶା ପ୍ରଦେଶ ଗଠନ କରିଥିଲେ ।
ଓଡ଼ିଶା ୧୯୩୬ ପରଠାରୁ କ୍ରମାଗତ ଭାବେ ଏହି ଅଞ୍ଚଳର ଶାସନ ପରିଚାଳନା କରିଆସୁଥିଲା, ଭୂ-ରାଜସ୍ୱ ଆଦାୟ କରୁଥିଲା ଏବଂ ପ୍ରାରମ୍ଭିକ ପ୍ରଶାସନିକ ବ୍ଲକଗୁଡ଼ିକର ସ୍ଥାପନ କରିଥିଲା । ସେତେବେଳେ ଏହି ଅଞ୍ଚଳ ଅନ୍ୟ କାହାର ହେବା ପ୍ରଶ୍ନ ନ ଥିଲା।
୨୦୦୬ର ରାୟ:ଦଶନ୍ଧି ଦଶନ୍ଧି ଧରି ବିଚାର ବିମର୍ଶ ପରେ, ସୁପ୍ରିମକୋର୍ଟ ବୈଷୟିକ କାରଣ ଦର୍ଶାଇ ଏହି ମାମଲାକୁ ଖାରଜ କରିଦେଇଥିଲେ । କୋର୍ଟ ରାୟ ଦେଇଥିଲେ ଯେ ଭାରତୀୟ ସମ୍ବିଧାନ ଅନୁଯାୟୀ କେବଳ କେନ୍ଦ୍ର ସଂସଦ (ପାର୍ଲାମେଣ୍ଟ) ପାଖରେ ରାଜ୍ୟ ସୀମା ପରିବର୍ତ୍ତନ କିମ୍ବା ସମାଧାନ କରିବାର ଆଇନଗତ କ୍ଷମତା ରହିଛି । ସଂସଦର ହସ୍ତକ୍ଷେପ ପର୍ଯ୍ୟନ୍ତ ଉଭୟ ରାଜ୍ୟକୁ ସ୍ଥିତାବସ୍ଥା କଡ଼ାକଡ଼ି ଭାବେ ବଜାୟ ରଖିବାକୁ ଏହା ନିର୍ଦ୍ଦେଶ ଦେଇଥିଲା ।
ସାମ୍ପ୍ରତିକ ଉତ୍ତେଜନା: ୨୦୨୧ରେ ଯେତେବେଳେ ଆନ୍ଧ୍ରପ୍ରଦେଶ କେତେକ କୋଟିଆ ଗ୍ରାମରେ ସଫଳତାର ସହ ନିଜର ପ୍ରଥମ ସ୍ଥାନୀୟ ସ୍ୱାୟତ୍ତ ଶାସନ (ପଞ୍ଚାୟତ) ନିର୍ବାଚନ ପରିଚାଳନା କଲା, ସେତେବେଳେ ଏହି ବିବାଦ ପୁଣି ଥରେ ମୁଣ୍ଡ ଟେକିଥିଲା, ଯାହାକୁ ଓଡ଼ିଶା ସ୍ଥିତାବସ୍ଥାର ଉଲ୍ଲଂଘନ ବୋଲି ଦର୍ଶାଇ ଚ୍ୟାଲେଞ୍ଜ କରିଥିଲା । ଜାନୁଆରୀ ୨୦୨୨ରେ ଓଡ଼ିଶା ଦ୍ୱାରା ଦାୟର କରାଯାଇଥିବା ଏକ ନୂତନ ମାମଲା ସୁପ୍ରିମକୋର୍ଟରେ ଏବେ ବି ବିଚାରାଧୀନ ରହିଛି ।
ବର୍ତ୍ତମାନର ବାସ୍ତବତା: ଆନ୍ଧ୍ରର ଲୋଲୁପ ଦୃଷ୍ଟି ଖଣିଜ ସମ୍ପଦ ଉପରେ
ଯେହେତୁ ଏହି ଅଞ୍ଚଳ ଖଣିଜ ସମ୍ପଦ (ଯେପରିକି ବକ୍ସାଇଟ୍, ମାଙ୍ଗାନିଜ୍ ଏବଂ ଗ୍ରାଫାଇଟ୍… ଏପରିକି ସୁନା)ରେ ସମୃଦ୍ଧ, ଆନ୍ଧ୍ର ରାଜ୍ୟ ସରକାର ପ୍ରତିଯୋଗିତାମୂଳକ କଲ୍ୟାଣକାରୀ ଯୋଜନା ମାଧ୍ୟମରେ ସ୍ଥାନୀୟ ଆଦିବାସୀ ଜନସଂଖ୍ୟାକୁ ନିଜ ଆଡ଼କୁ ଆକର୍ଷିତ କରିବା ପାଇଁ ଆକ୍ରମଣାତ୍ମକ ଭାବେ ପ୍ରତିଯୋଗିତା କରୁଛି:
ଦ୍ୱୈତ ପରିଚୟ: ବିବାଦିତ ୨୧ଟି ଗ୍ରାମର ଅଧିକାଂଶ ବାସିନ୍ଦାଙ୍କ ପାଖରେ ଦୁଇଟି ସରକାରୀ ପରିଚୟ ପତ୍ର ରହିଛି— ଦୁଇଟି ଆଧାର କାର୍ଡ, ଦୁଇଟି ରାସନ କାର୍ଡ ଏବଂ ଦୁଇଟି ଭୋଟର ପରିଚୟ ପତ୍ର (ଗୋଟିଏ ଓଡ଼ିଶାରୁ ଏବଂ ଅନ୍ୟଟି ଆନ୍ଧ୍ରପ୍ରଦେଶରୁ)।
ଦୁଇଥର ମତଦାନ: ପ୍ରମୁଖ ନିର୍ବାଚନ ସମୟରେ, ବାସିନ୍ଦାମାନେ ପ୍ରାୟତଃ ଦୁଇଥର ଭୋଟ୍ ଦିଅନ୍ତି: ଥରେ ଓଡ଼ିଶାର ପୋଟ୍ଟାଙ୍ଗୀ ନିର୍ବାଚନ ମଣ୍ଡଳୀ ପାଇଁ ଏବଂ ଆଉ ଥରେ ଆନ୍ଧ୍ରପ୍ରଦେଶର ସାଲୁର ନିର୍ବାଚନ ମଣ୍ଡଳୀ ପାଇଁ ।
କୋଟିଆ କେବଳ ବଣଜଙ୍ଗଲ ଘେରା ପ୍ରାକୃତି ସମ୍ପଦରେ ଭରପୂର ଏକ ଅଞ୍ଚଳ ନୁହେଁ; ଏହା ଓଡ଼ିଶାର ସ୍ବାଭିମାନ ଓ ଅସ୍ମିତାର ପ୍ରତୀକ। ଦେଓମାଳି ପରି ଏହି ସ୍ଥାନ ମଧ୍ୟ ପର୍ଯ୍ୟଟନର ଅପାର ସମ୍ଭାବନା ସୃଷ୍ଟି କରେ।
କୋଟିଆ ଆମର। ଏହା ହିଁ ଧ୍ରୁବ ସତ୍ୟ। ଜୟପୁର ଜମିଦାରୀ – ମାଡ୍ରାସ ପ୍ରେସିଡେନ୍ସି … ଏ ସବୁ ଇତିହାସର ମୂକସାକ୍ଷୀ। ଆମର ଆଇଟିଡିଏ, ଆମର ଓଡ଼ିଆ ସ୍କୁଲ -ସବୁକିଛି ଅଛି। ଆନ୍ଧ୍ରର କିଛି ଚିହ୍ନବର୍ଣ୍ଣ ନାହିଁ। ସୀମା ଭିତରକୁ ଆସି କିଛି ତେଲୁଗୁ ଭାଷାଭାଷୀ ଲୋକ ସ୍ଥାୟୀ ବାସିନ୍ଦା ହୋଇଯାଇଛନ୍ତି। ତା’ମାନେ ନୁହେଁ କୋଟିଆ ଆନ୍ଧ୍ରର। ଓଡ଼ିଶାର ସୀମାନ୍ତ ବାହାରକୁ ଯାଇ ଆନ୍ଧ୍ର, ଛତିଶଗଡ଼, ଝାଡ଼ଖଣ୍ଡ, ପଶ୍ଚିମବଙ୍ଗରେ ମଧ୍ୟ ପ୍ରାୟ ଦେଢ଼କୋଟି ଓଡ଼ିଆ ବସବାସ କରୁଛନ୍ତି; ଆଜି ବି ଓଡ଼ିଆ କହୁଛନ୍ତି। ତା’ମାନେ କ’ଣ ଆମେ ସେହି ଗ୍ରାମ ବା ଜନପଦଗୁଡ଼ିକୁ ଆମର ବୋଲି ଦାବି କରି ଓଡ଼ିଶାରେ ମିଶାଇପାରିଛୁ?
ତେବେ, ପ୍ରଶ୍ନ ଉଠେ, ଓଡ଼ିଶା ସରକାର କରୁଛି କ’ଣ?
ମୋ ନେତୃତ୍ବରେ ଅନୁସନ୍ଧାନକାରୀ ଦଳ କୋଟିଆ ଗସ୍ତ କରି ନିମ୍ନଲିଖିତ ତଥ୍ୟ ସଂଗ୍ରହ କରିଥିଲା:
କୋଟିଆ ଗସ୍ତ ସମ୍ପର୍କିତ ତଥ୍ୟ ଅନୁସନ୍ଧାନ ରିପୋର୍ଟ
ତାରିଖ: ୨୭ ଅକ୍ଟୋବର ୨୦୨୬
ଏକ ପ୍ରତିନିଧି ଦଳ କୋରାପୁଟ ଜିଲ୍ଲାର କୋଟିଆ ଅଞ୍ଚଳ ଗସ୍ତ କରି ଗଞ୍ଜେଇପଦର, ଉପର ସେମ୍ବି, କୋଟିଆ ଓ ନେରେଡିବାଲାସା ଗ୍ରାମ ପରିଦର୍ଶନ କରିଥିଲେ। ଏହି ଗସ୍ତରେ କୋରାପୁଟ ସାଂସଦ ଶ୍ରୀ ସପ୍ତଗିରି ଶଙ୍କର ଉଲାକା, ସିଏଲପି ନେତା ରାମଚନ୍ଦ୍ର କଡମ୍, ବିଧୟକବୃନ୍ଦ ମଧ୍ୟ ସାମିଲ ହୋଇଥିଲେ। ଗସ୍ତ ସମୟରେ ସ୍ଥାନୀୟ ଜନସାଧାରଣଙ୍କ ସହ ଆଲୋଚନା କରାଯାଇ ସେମାନଙ୍କ ସମସ୍ୟା, ସରକାରୀ ଯୋଜନାର କାର୍ଯ୍ୟକାରିତା, ମୌଳିକ ସୁବିଧାର ଉପଲବ୍ଧତା, ସାମାଜିକ ସୁରକ୍ଷା ଓ ସୀମାନ୍ତ ଅଞ୍ଚଳର ପ୍ରଶାସନିକ ସ୍ଥିତି ସମ୍ପର୍କରେ ଅନୁଧ୍ୟାନ କରାଯାଇଥିଲା।
ଗସ୍ତ ସମୟରେ ପରିଲକ୍ଷିତ ପ୍ରମୁଖ ସମସ୍ୟା ଓ ତଥ୍ୟ
୧. ବ୍ୟାଙ୍କିଂ ସୁବିଧା ଓ ସରକାରୀ ଅର୍ଥରାଶି ପ୍ରଦାନରେ ସମସ୍ୟା
କୋଟିଆ ଅଞ୍ଚଳରେ ପର୍ଯ୍ୟାପ୍ତ ବ୍ୟାଙ୍କିଂ ସୁବିଧା ନଥିବାରୁ ସ୍ଥାନୀୟ ଲୋକମାନେ ଦୈନନ୍ଦିନ ବ୍ୟାଙ୍କ କାରବାର ପାଇଁ ପଟ୍ଟାଙ୍ଗୀ ବ୍ଲକ୍ ମୁଖ୍ୟାଳୟ ଉପରେ ନିର୍ଭର କରୁଛନ୍ତି। ପୂର୍ବରୁ ଡାକଘର ମାଧ୍ୟମରେ ହିତାଧିକାରୀମାନେ ସରକାରୀ ଅର୍ଥରାଶି ପାଉଥିବାବେଳେ ବର୍ତ୍ତମାନ ବିଭିନ୍ନ କଲ୍ୟାଣକାରୀ ଯୋଜନାର ଅର୍ଥ ପ୍ରାପ୍ତିରେ ସମସ୍ୟା ହେଉଥିବା ଅଭିଯୋଗ କରିଛନ୍ତି। ଏହି ପରିସ୍ଥିତିରେ କୋଟିଆରେ ସ୍ଥାୟୀ ବ୍ୟାଙ୍କିଂ ସୁବିଧା ସ୍ଥାପନ ସହିତ ସମସ୍ତ ଯୋଗ୍ୟ ହିତାଧିକାରୀଙ୍କୁ ସମୟୋଚିତ ଭାବେ ସରକାରୀ ଅର୍ଥରାଶି ପ୍ରଦାନ ସୁନିଶ୍ଚିତ କରିବା ଆବଶ୍ୟକ।
୨. ସୀମାନ୍ତ ଅଞ୍ଚଳରେ ଆନ୍ଧ୍ରପ୍ରଦେଶର ଚେକପୋଷ୍ଟ ଓ ପୁଲିସ ଉପସ୍ଥିତି
ଉପର ସେମ୍ବି ଗ୍ରାମ ପରିଦର୍ଶନ ସମୟରେ ଆନ୍ଧ୍ରପ୍ରଦେଶ ପକ୍ଷରୁ ସ୍ଥାପିତ ଏକ ଚେକପୋଷ୍ଟ ଦେଖିବାକୁ ମିଳିଥିଲା। ସ୍ଥାନୀୟ ଲୋକଙ୍କ ସୂଚନା ଅନୁଯାୟୀ, ଗତ ଚାରି ମାସ ଧରି ଆନ୍ଧ୍ରପ୍ରଦେଶର ପୁଲିସ କର୍ମଚାରୀମାନେ ସାଧା ପୋଷାକରେ ସେଠାରେ ଅବସ୍ଥାନ କରୁଥିବା ଜଣାପଡ଼ିଛି। ପରବର୍ତ୍ତୀ ସମୟରେ ଓଡ଼ିଶା ପକ୍ଷରୁ ମଧ୍ୟ ଏକ ଚେକପୋଷ୍ଟ କାର୍ଯ୍ୟକ୍ଷମ କରାଯାଇଥିବା ସୂଚନା ମିଳିଛି। ଏହା ସୀମାନ୍ତ ଅଞ୍ଚଳରେ ଓଡ଼ିଶାର ପ୍ରଶାସନିକ ଉପସ୍ଥିତି, ସୁରକ୍ଷା ବ୍ୟବସ୍ଥା ଓ ସୀମା ବିବାଦର ପରିଚାଳନା ସମ୍ପର୍କରେ ଗୁରୁତ୍ୱପୂର୍ଣ୍ଣ ପ୍ରଶ୍ନ ସୃଷ୍ଟି କରୁଛି। ଏହି ବିଷୟରେ ରାଜ୍ୟ ସରକାର ତୁରନ୍ତ ତଥ୍ୟ ଯାଞ୍ଚ କରି ଆବଶ୍ୟକ ପଦକ୍ଷେପ ଗ୍ରହଣ କରିବା ଜରୁରୀ।
୩. ବାର୍ଦ୍ଧକ୍ୟ ଓ ଅନ୍ୟାନ୍ୟ ପେନ୍‌ସନ୍ ଯୋଜନାରେ ପାର୍ଥକ୍ୟ
ସ୍ଥାନୀୟ ଲୋକଙ୍କଠାରୁ ମିଳିଥିବା ସୂଚନା ଅନୁଯାୟୀ, ଓଡ଼ିଶା ସରକାରଙ୍କ ପେନସନ୍ ଯୋଜନାରେ କେତେକ ହିତାଧିକାରୀ ମାସିକ ୧,୦୦୦ ଟଙ୍କା ପାଉଥିବାବେଳେ ଆନ୍ଧ୍ରପ୍ରଦେଶ ସରକାରଙ୍କ ସମ୍ପୃକ୍ତ ଯୋଜନାରେ ୪,୦୦୦ ଟଙ୍କା ମିଳୁଥିବା ଜଣାପଡ଼ିଛି। ଏହି ଅର୍ଥରାଶିର ପାର୍ଥକ୍ୟ ସୀମାନ୍ତ ଅଞ୍ଚଳର ଗରିବ, ବୃଦ୍ଧବୃଦ୍ଧା ଓ ଅନ୍ୟାନ୍ୟ ଅସହାୟ ହିତାଧିକାରୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରୁଥିବା ପରିଲକ୍ଷିତ ହୋଇଛି। ଉଭୟ ରାଜ୍ୟର ସମ୍ପୃକ୍ତ ଯୋଜନା, ଯୋଗ୍ୟତା ଓ ଅର୍ଥରାଶିର ଯାଞ୍ଚ କରି କୋଟିଆର ଯୋଗ୍ୟ ହିତାଧିକାରୀଙ୍କ ପାଇଁ ଉପଯୁକ୍ତ ସାମାଜିକ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବା ଆବଶ୍ୟକ।
୪. ଛାତ୍ରଛାତ୍ରୀଙ୍କ ବୃତ୍ତି ଓ ଶିକ୍ଷା ସହାୟତାରେ ପାର୍ଥକ୍ୟ
ଗସ୍ତ ସମୟରେ ଜଣାପଡ଼ିଥିଲା ଯେ, ଓଡ଼ିଶା ସରକାରଙ୍କ କେତେକ ବୃତ୍ତି ଯୋଜନାରେ ସ୍ଥାନୀୟ ଛାତ୍ରଛାତ୍ରୀମାନେ ଆର୍ଥିକ ସହାୟତା ପାଉ ନ ଥିବା ବେଳେ ଆନ୍ଧ୍ରପ୍ରଦେଶ ସରକାରଙ୍କ ସମ୍ପୃକ୍ତ ଯୋଜନାରେ ୧୫,୦୦୦ ଟଙ୍କା ପର୍ଯ୍ୟନ୍ତ ସହାୟତା ମିଳୁଥିବା ସୂଚନା ମିଳିଛି। ଏହି ପାର୍ଥକ୍ୟର ସଠିକ୍ ଯାଞ୍ଚ କରିବା ସହିତ କୌଣସି ଯୋଗ୍ୟ ଛାତ୍ରଛାତ୍ରୀ ଯେପରି ସରକାରୀ ବୃତ୍ତି ଓ ଶିକ୍ଷା ସହାୟତାରୁ ବଞ୍ଚିତ ନହୁଅନ୍ତି, ସେଥିପାଇଁ ସ୍ୱତନ୍ତ୍ର ପଦକ୍ଷେପ ଗ୍ରହଣ କରିବା ଆବଶ୍ୟକ।
୫. କୋଟିଆ ପାଇଁ ସ୍ୱତନ୍ତ୍ର ବିକାଶ ବୋର୍ଡ଼ ଗଠନ ପୁଲିସ ମୁତୟନ ଦାବୀ
କୋଟିଆ ପଞ୍ଚାୟତ ସମିତିଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ପିସିସି ସଭାପତି ଶ୍ରୀ ଭକ୍ତ ଚରଣ ଦାସ କୋଟିଆ ଅଞ୍ଚଳର ସାମଗ୍ରିକ ବିକାଶ ପାଇଁ ଓଡ଼ିଶା ସରକାର ତୁରନ୍ତ ଏକ ସ୍ୱତନ୍ତ୍ର ବିକାଶ ପ୍ୟାକେଜ୍ ଘୋଷଣା କରିବାକୁ ଦାବି କରିଥିଲେ। ବର୍ତ୍ତମାନ ଚାଲୁଥିବା ସରକାରଙ୍କର ବିକାଶ/କଲ୍ୟାଣକର ଯୋଜନାରେ କୋଟିଆର ଅଧିବାସୀଙ୍କୁ ସ୍ବତନ୍ତ୍ର ଭାବେ ପ୍ରୋତ୍ସାହିତ କରିବା ସମ୍ଭବ ନ ଥିବାରୁ କୋଟିଆ ପାଇଁ ଏକ ବିକାଶ ବୋର୍ଡ଼ ଗଠନ ଜରୁରି। ଆନ୍ଧ୍ରପ୍ରଦେଶ ପକ୍ଷରୁ ପଞ୍ଚାୟତ ନିର୍ବାଚନ ଘୋଷଣା କରାଯାଇଥିବା ଗ୍ରାମଗୁଡ଼ିକରେ ଓଡ଼ିଶାର ପ୍ରଶାସନିକ ଉପସ୍ଥିତି ସୁଦୃଢ଼ କରିବା ସହିତ ତୁରନ୍ତ ପର୍ଯ୍ୟାପ୍ତ ଓଡ଼ିଶା ପୁଲିସ କର୍ମଚାରୀ ମୁତୟନ କରିବାକୁ ମଧ୍ୟ ଦାବୀ କରାଯାଇଥିଲା। ଏହା ସହିତ କୋଟିଆ ପାଇଁ ସ୍ୱତନ୍ତ୍ର ସାମ୍ବିଧାନିକ ଓ ପ୍ରଶାସନିକ ବ୍ୟବସ୍ଥାର ସମ୍ଭାବନା ସମ୍ପର୍କରେ ସମ୍ବିଧାନର ଅନୁଚ୍ଛେଦ ୩୭୧ ଉପରେ ଆଲୋଚନା କରାଯାଇଥିଲା। ଏହାର ଆଇନଗତ ପ୍ରଯୁଜ୍ୟତା ଓ ସମ୍ଭାବ୍ୟ ବିକଳ୍ପ ସମ୍ପର୍କରେ ସାମ୍ବିଧାନିକ ବିଶେଷଜ୍ଞଙ୍କ ମତାମତ ନେବା ଆବଶ୍ୟକ।
୬. ପେନସନ୍ ଯୋଜନା, ପରିଚୟପତ୍ର ଓ ଭୋଟର ତାଲିକା ସମ୍ପର୍କିତ ସମସ୍ୟା
ସ୍ଥାନୀୟ ସୂଚନା ଅନୁଯାୟୀ, ଆନ୍ଧ୍ରପ୍ରଦେଶ ସରକାର ୨୦୦୬ ମସିହାରୁ ପେନ୍‌ସନ୍ ସମ୍ପର୍କିତ କେତେକ ଯୋଜନା କାର୍ଯ୍ୟକାରୀ କରିଥିବା ଏବଂ ୨୦୦୯ ମସିହାରୁ ପରିଚୟପତ୍ର ପଞ୍ଜୀକରଣ ସମ୍ପର୍କିତ ପଦକ୍ଷେପ ନେଇଥିବା ଦାବି କରାଯାଇଛି। ଏହି ତଥ୍ୟଗୁଡ଼ିକର ସରକାରୀ ରେକର୍ଡ ଆଧାରରେ ଯାଞ୍ଚ ଆବଶ୍ୟକ। କେତେକ ବାସିନ୍ଦାଙ୍କ ନିକଟରେ ଉଭୟ ଓଡ଼ିଶା ଓ ଆନ୍ଧ୍ରପ୍ରଦେଶ ସମ୍ପର୍କିତ ପରିଚୟପତ୍ର ଏବଂ ଭୋଟର ପରିଚୟପତ୍ର ଥିବା ନେଇ ମଧ୍ୟ ଅଭିଯୋଗ ହୋଇଛି। ଏହା ଏକ ସମ୍ବେଦନଶୀଳ ପ୍ରସଙ୍ଗ ହୋଇଥିବାରୁ ସମ୍ପୃକ୍ତ କର୍ତ୍ତୃପକ୍ଷଙ୍କ ଦ୍ୱାରା ନିରପେକ୍ଷ ଯାଞ୍ଚ କରାଯିବା ସହିତ ଯୋଗ୍ୟ ନାଗରିକଙ୍କ ମତଦାନ ଅଧିକାର ଓ ସରକାରୀ ସୁବିଧା ସୁରକ୍ଷିତ ରଖିବା ଆବଶ୍ୟକ।
୭. ସଂସଦରେ କୋଟିଆ ପ୍ରସଙ୍ଗ ଉତ୍ଥାପନ
କୋରାପୁଟ ସାଂସଦ ଶ୍ରୀ ସପ୍ତଗିରି ଶଙ୍କର ଉଲାକା କୋଟିଆର ସୀମା ବିବାଦ, ପ୍ରଶାସନିକ ସମସ୍ୟା ଓ ବିକାଶ ସମ୍ପର୍କିତ ପ୍ରସଙ୍ଗକୁ ସଂସଦରେ ଶୂନ୍ୟକାଳ ଓ ପ୍ରଶ୍ନକାଳ ମାଧ୍ୟମରେ ବାରମ୍ବାର ଉତ୍ଥାପନ କରିଛନ୍ତି।
ସାମଗ୍ରିକ ପର୍ଯ୍ୟବେକ୍ଷଣ
କୋଟିଆ ଗସ୍ତରୁ ସ୍ପଷ୍ଟ ହୋଇଛି ଯେ, ସୀମା ବିବାଦ ସହିତ ଏହି ଅଞ୍ଚଳର ବିକାଶ, ସାମାଜିକ ସୁରକ୍ଷା ଓ ପ୍ରଶାସନିକ ଉପସ୍ଥିତି ମଧ୍ୟ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ଦୀର୍ଘ ୨୪ ବର୍ଷର ବିଜେଡି ଶାସନ ସତ୍ତ୍ୱେ କୋଟିଆରେ ଅନେକ ମୌଳିକ ସମସ୍ୟା ରହିଯାଇଥିବା ବେଳେ ବର୍ତ୍ତମାନର ବିଜେପି ସରକାରଙ୍କ ସମୟରେ ମଧ୍ୟ ଏହି ସମସ୍ୟାଗୁଡ଼ିକର ପ୍ରଭାବଶାଳୀ ସମାଧାନ ହୋଇପାରିନାହିଁ। ଏହା ଉଭୟ ସରକାରଙ୍କ ପ୍ରଶାସନିକ ପଦକ୍ଷେପ ଓ ବିକାଶମୂଳକ ଯୋଜନାର ପ୍ରଭାବଶୀଳତା ଉପରେ ପ୍ରଶ୍ନ ସୃଷ୍ଟି କରୁଛି। କୋଟିଆ ପରି ସମ୍ବେଦନଶୀଳ ସୀମାନ୍ତ ଅଞ୍ଚଳରେ କେବଳ ରାଜନୈତିକ ବୟାନ ନୁହେଁ, ବରଂ ଦୃଢ଼ ପ୍ରଶାସନିକ ଉପସ୍ଥିତି, ନିୟମିତ ଜନସମ୍ପର୍କ, ଉନ୍ନତ ମୌଳିକ ସୁବିଧା ଓ ସରକାରୀ ଯୋଜନାର ପ୍ରଭାବଶାଳୀ କାର୍ଯ୍ୟକାରିତା ଆବଶ୍ୟକ।
ପ୍ରମୁଖ ସୁପାରିସ ଓ ଦାବି
୧. କୋଟିଆର ସାମଗ୍ରିକ ବିକାଶ ପାଇଁ ରାଜ୍ୟ ସରକାର ତୁରନ୍ତ ଏକ ସ୍ୱତନ୍ତ୍ର ବିକାଶ ବୋର୍ଡ଼ ଗଠନ କରି ସ୍ବତନ୍ତ୍ର ପ୍ୟାକେଜ୍ ଘୋଷଣା କରନ୍ତୁ।
୨. ସମ୍ବେଦନଶୀଳ ସୀମାନ୍ତ ଗ୍ରାମଗୁଡ଼ିକରେ ପର୍ଯ୍ୟାପ୍ତ ଓଡ଼ିଶା ପୁଲିସ ମୁତୟନ ସହିତ ପ୍ରଶାସନିକ ଉପସ୍ଥିତି ସୁଦୃଢ଼ କରାଯାଉ।
୩. କୋଟିଆରେ ସ୍ଥାୟୀ ବ୍ୟାଙ୍କିଂ ସୁବିଧା ସ୍ଥାପନ କରାଯାଇ ସରକାରୀ ଯୋଜନାର ଅର୍ଥରାଶି ସମୟ ମତେ ପ୍ରଦାନ ସୁନିଶ୍ଚିତ କରାଯାଉ।
୪. ପେନ୍‌ସନ୍ ଓ ଛାତ୍ରବୃତ୍ତି ସମ୍ପର୍କିତ ସମସ୍ୟାର ସମୀକ୍ଷା କରି ସମସ୍ତ ଯୋଗ୍ୟ ହିତାଧିକାରୀଙ୍କୁ ଉପଯୁକ୍ତ ସହାୟତା ପ୍ରଦାନ କରାଯାଉ।
୫. ପରିଚୟପତ୍ର ଓ ଭୋଟର ତାଲିକା ସମ୍ପର୍କିତ ଅଭିଯୋଗଗୁଡ଼ିକର ନିରପେକ୍ଷ ଯାଞ୍ଚ କରାଯାଉ।
୬. କୋଟିଆର ସୀମା ବିବାଦ ସମ୍ପର୍କରେ ଆଇନଗତ ଓ ସାମ୍ବିଧାନିକ ପଦକ୍ଷେପକୁ ସୁଦୃଢ଼ କରାଯାଉ।
୭. କୋଟିଆର ପ୍ରତ୍ୟେକ ଗ୍ରାମ ପାଇଁ ସ୍ୱତନ୍ତ୍ର ବିକାଶ ଯୋଜନା ପ୍ରସ୍ତୁତ କରାଯାଇ ଏହାର ସମୟବଦ୍ଧ କାର୍ଯ୍ୟକାରିତା ସୁନିଶ୍ଚିତ କରାଯାଉ।
କୋଟିଆ କେବଳ ଏକ ସୀମା ବିବାଦର ପ୍ରସଙ୍ଗ ନୁହେଁ; ଏହା ଓଡ଼ିଶାର ଭୌଗୋଳିକ ଅଖଣ୍ଡତା, ପ୍ରଶାସନିକ ଦାୟିତ୍ୱ ଓ ସ୍ଥାନୀୟ ଆଦିବାସୀ ଜନସାଧାରଣଙ୍କ ଅଧିକାର ଓ ବିକାଶ ସହିତ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। କୋଟିଆବାସୀଙ୍କ ସ୍ୱାର୍ଥ ଏବଂ ଓଡ଼ିଶାର ଆଇନସମ୍ମତ ଅଧିକାରର ସୁରକ୍ଷା ପାଇଁ ରାଜ୍ୟ ସରକାର ତୁରନ୍ତ ସ୍ୱତନ୍ତ୍ର ବିକାଶ ପ୍ୟାକେଜ୍ ଘୋଷଣା କରିବା ସହିତ ମୌଳିକ ସୁବିଧା, ପ୍ରଶାସନିକ ଉପସ୍ଥିତି, ସୁରକ୍ଷା ବ୍ୟବସ୍ଥା ଓ ଜନକଲ୍ୟାଣକାରୀ ଯୋଜନାର ସୁଫଳ ସୁନିଶ୍ଚିତ କରିବା ଆବଶ୍ୟକ। କୋଟିଆର ସୁରକ୍ଷା କେବଳ ସୀମାର ସୁରକ୍ଷା ନୁହେଁ, ବରଂ ସେଠାକାର ଜନସାଧାରଣଙ୍କ ଅଧିକାର, ସମ୍ମାନ, ଜୀବିକା ଓ ଭବିଷ୍ୟତର ସୁରକ୍ଷା। ଏହି ଦିଗରେ କେନ୍ଦ୍ର ଓ ରାଜ୍ୟ ସରକାର ତୁରନ୍ତ ସମନ୍ୱିତ ଏବଂ ଫଳପ୍ରଦ ପଦକ୍ଷେପ ଗ୍ରହଣ କରିବା ଆବଶ୍ୟକ ବୋଲି ପିସିସି ସଭାପତି ଭକ୍ତ ଚରଣ ଦାସ ପ୍ରକାଶ କରିଥିଲେ। ଏହି ସାମ୍ବାଦିକ ସମ୍ମିଳନୀରେ ଏଆଇସିସି ପର୍ଯ୍ୟବେକ୍ଷକ ନିଲଂଶୁ, ମୁଖପାତ୍ର ହମିଦ ହୁସେନ ଓ ରଜନୀ ମହାନ୍ତି ଉପସ୍ଥିତ ଥିଲେ।