ଅଡ଼ୁଆରେ ଯୋଗଗୁରୁ ବାବା ରାମଦେବ

ନୂଆଦିଲ୍ଲୀ: ଅଡ଼ୁଆରେ ଯୋଗଗୁରୁ ବାବା ରାମଦେବ । ଧାର୍ମିକ ଭାବନାକୁ ଆହତ କରିବା ଯୋଗୁଁ ରାଜସ୍ଥାନର ବାରମେର ଜିଲ୍ଲାରେ ରାମଦେବଙ୍କ ବିରୋଧରେ ମାମଲା ରୁଜୁ ହୋଇଛି । ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଧାର୍ମିକ ଭାବନାକୁ ଉତ୍ତେଜିତ କରିବା ନେଇ ଜଣେ ସ୍ଥାନୀୟ ବାସିନ୍ଦା ରାମଦେବଙ୍କ ବିରୋଧରେ ମାମଲା ରୁଜୁ କରିଛନ୍ତି । ଗତ ଗୁରୁବାର ବାରମେରରେ ସାଧୁମାନଙ୍କ ଏକ ସମାବେଶରେ ରାମଦେବ ହିନ୍ଦୁ ଧର୍ମକୁ ଇସଲାମ ଏବଂ ଖ୍ରୀଷ୍ଟିଆନ ଧର୍ମ ସହ ତୁଳନା କରୁଥିବାବେଳେ ମୁସଲମାନ ଆତଙ୍କବାଦୀଙ୍କୁ ପ୍ରୋତ୍ସାହନ ଦିଅନ୍ତି ବୋଲି କହିଥିଲେ । ଏଥିସହ ହିନ୍ଦୁ ମହିଳାଙ୍କୁ ଅପହରଣ କରନ୍ତି ବୋଲି କହିଥିଲେ । ପୂର୍ବରୁ ମଧ୍ୟ ବାବା ରାମଦେବ ମହିଳାମାନଙ୍କ ବିଷୟରେ ଏକ ବିବୃତ୍ତି ଦେଇଥିଲେ । ସେ ବିଷୟରେ ମଧ୍ୟ ଅନେକ ବିବାଦ ଦେଖାଦେଇଥିଲା | ସେହି ସମୟରେ, ମହାରାଷ୍ଟ୍ରର ଥାନାରେ ଆୟୋଜିତ ଏକ କାର୍ଯ୍ୟକ୍ରମରେ ରାମଦେବ କହିଥିଲେ ଯେ ମହିଳାମାନେ କିଛି ନ ପିନ୍ଧିଲେ ବି ଭଲ ଦେଖାଯିବେ। ତାଙ୍କ ମନ୍ତବ୍ୟକୁ ନିନ୍ଦା କରି ଦିଲ୍ଲୀ ମହିଳା ଆୟୋଗ ରାମଦେବ କ୍ଷମା ମାଗନ୍ତୁ ବୋଲି କହିଥିଲେ ।