ପେନ୍‌ସିଲ୍‌ଭାନିଆରେ ଗୁଳିକାଣ୍ଡ: ୨ ମୃତ

ପେନ୍‌ସିଲଭାନିଅ: ଆମେରିକାର ପେନ୍‌ସିଲ୍‌ଭାନିଆର ରାଜ୍ୟର ପିଟ୍‌ସବର୍ଗରେ ରବିବାର ଏକ ପାର୍ଟିରେ ଗୁଳିକାଣ୍ଡ ଘଟି ଦୁଇଜଣ ବ୍ୟକ୍ତିଙ୍କର ମୃତ୍ରୁ ଘଟିଛି ଏବଂ ଅନ୍ୟ କେତେକ ଆହତ ହୋଇଛନ୍ତି । ପିଟ୍‌ସବର୍ଗ ପୁଲିସ ଏକ ବିଜ୍ଞପ୍ତିରେ କହିଛି, ସହରରେ ଭଡ଼ାରେ ନିଆଯାଇଥିବା ଏକ ସ୍ଥାନରେ ଚାଲିଥିବା ଏକ ପାର୍ଟିରେ ପୂର୍ବାହ୍ନ ପ୍ରାୟ ୧୨ଟା ବେଳେ ଗୁଳିକାଣ୍ଡ ଘଟିଥିଲା । ଏହି ସମୟରେ ସେଠାରେ ୨୦୦ରୁ ଅଧିକ ଲୋକ ଉପସ୍ଥିତ ଥିଲେ, ଯାହା ମଧ୍ୟରେ ଅଧିକାଂଶ କିଶୋର ଥିଲେ । ପୁଲିସ୍ କହିଛି, ଆହତଙ୍କ ମଧ୍ୟରୁ କେତେକଙ୍କୁ ହସ୍ପିଟାଲ୍‌ରେ ଭର୍ତ୍ତି କରାଯାଇଥିବା ବେଳେ ସେମାନଙ୍କ ମଧ୍ୟରୁ ଦୁଇଜଣଙ୍କର ମୃତ୍ୟୁ ଘଟିଛି । ମୃତକଙ୍କ ପରିଚୟ ମିଳିପାରି ନାହିଁ । ଆହତଙ୍କ ମଧ୍ୟରୁ ୧୧ ଜଣଙ୍କୁ ଗୁଳି ଲାଗିଥିଲା । ଗୁଳିକାଣ୍ଡ ସୂଚନା ପାଇ ପୁଲିସ୍ ଘଟଣାସ୍ଥଳରେ ପହଞ୍ଚିବା ବେଳକୁ କେତେକ ଲୋକ ଦୌଡ଼ି ପଳାଇଥିବା ବେଳେ ଅନ୍ୟ କେତେକ ଝରକାରୁ ଡେଇଁ ପଳାଇବା ଉଦ୍ୟମ ମଧ୍ୟ କରୁଥିଲେ । ଏକ ରିପୋର୍ଟ ଅନୁସାରେ ପାର୍ଟି ଭିତରେ ୫୦ ରାଉଣ୍ଡ୍ ଏବଂ ବାହାରେ କିଛି ରାଉଣ୍ଡ୍ ଗୁଳି ଚାଳନା କରାଯାଇଥିବା ପୁଲିସ କହିଛି । ଘଟଣାସ୍ଥଳରୁ ପୁଲିସକୁ ରାଇଫଲ୍ ଓ ପିସ୍ତଲର ଖାଲି ଖୋକା ମିଳିଛି । ଘଟଣାର ତଦନ୍ତ ଚାଲିଥିବା ବେଳେ ଗୁଳିକାଣ୍ଡ ଘଟାଇଥିବା ସନ୍ଦିଗ୍ଧର ସନ୍ଧାନ ମିଳିନାହିଁ ।