ଆଜି ନେତ ଉତ୍ସବ : ଆସନ୍ତାକାଲି ଗଡ଼ିବ ରୁକୁଣା ରଥ

ଭୁବନେଶ୍ୱର: ଆସନ୍ତା ୯ ତାରିଖରେ ମହାପ୍ରଭୁ ଶ୍ରୀ ଲିଙ୍ଗରାଜଙ୍କ ରୁକୁଣା ରଥଯାତ୍ରା ଅନୁଷ୍ଠିତ ହେବାକୁ ଥିବାବେଳେ ଆଜି ନେତ ଉତ୍ସବ ଅନୁଷ୍ଠିତ ହେବ । ତେବେ ନେତ ଉତ୍ସବର ନୀତି ନିର୍ଘଣ୍ଟ ସହ ସୁରକ୍ଷା ଦୃଷ୍ଟିରୁ ସମସ୍ତ ବନ୍ଦୋବସ୍ତ କରାଯାଇଛି । ରଥ ପ୍ରତିଷ୍ଠା ପାଇଁ କେଦାରଗୌରୀ ପାଖ ମୁକ୍ତେଶ୍ୱର ମନ୍ଦିର ଠାରେ ଥିବା ମରିଚି କୁଣ୍ଡରୁ ପାଣି ଅଣାଯିବ । ଶ୍ରୀଲିଙ୍ଗରାଜଙ୍କ ସନ୍ଧ୍ୟା ଧୂପ ନୀତି ପରେ ରଥ ପ୍ରତିଷ୍ଠା ପକ୍ରିୟା କରାଯିବ । ମରିଚି କୁଣ୍ଡର ପ୍ରଥମ ଗରା ପାଣି ରଥ ପ୍ରତିଷ୍ଠା ନୀତିରେ ବ୍ୟବହାର ହେବ । ଏହାପରେ ଉକ୍ତ କୁଣ୍ଡର ପାଣି ନିଃସନ୍ତାନ ଦମ୍ପତିଙ୍କ ଉଦେଶ୍ୟରେ ନିଲାମ କରାଯିବ । ନିଲାମ ପ୍ରକ୍ରିୟା ଶୁକ୍ରବାର ମଧ୍ୟରାତ୍ରିରୁ ୯ତାରିଖ ସକାଳ ପ୍ରାୟ ୭ଟା ଯାଏ ଜାରି ରହିବ । ଏହି ପାଣିରେ ନିଃସନ୍ତାନ ଦମ୍ପତି ସ୍ନାନ କଲେ ସନ୍ତାନ ପ୍ରାପ୍ତି ହୋଇଥାଏ ବୋଲି ଶ୍ରଦ୍ଧାଳୁ ବିଶ୍ୱାସ କରନ୍ତି । କରୋନା କଟକଣା କାରଣରୁ ବିଗତ ୨ବର୍ଷ ହେବ ଏହି ପାଣି ନିଲାମ ହୋଇ ପାରି ନଥିଲା । କିନ୍ତୁ ଚଳିତ ବର୍ଷ ରାଜ୍ୟର ବିଭିନ୍ନ ସ୍ଥାନରୁ ଶତାଧିକ ଦମ୍ପତି ନିଲାମରେ ଅଂଶ ଗ୍ରହଣ କରିବେ । ନିଲାମ ପ୍ରକ୍ରିୟା ବଡୁ ନିଯୋଗ କର୍ମକର୍ତ୍ତାଙ୍କ ତତ୍ତ୍ୱାବଧାନରେ କରାଯିବ । ଏଥିରେ ଯେଉଁ ଦମ୍ପତି ସବୁଠାରୁ ଅଧିକ ଟଙ୍କାରେ ନିଲାମ ଡାକିବେ ତାଙ୍କୁ ମିଳିବ ପ୍ରଥମ ଗରା ପାଣି । ଏହାପରେ ନିଲାମ ମୂଲ୍ୟର କ୍ରମ ଅନୁସାରେ ପାଣି ଦିଆଯିବ । ଶେଷରେ ଏକ ମୂଳ ମୂଲ୍ୟ ନିର୍ଦ୍ଧାରଣ କରା ଯାଇ ପାଣି ଗରା ଦିଆଯିବ । ରଥ ଖଳାରେ ରଥ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ôଚସାରିଛି । ରଥଯାତ୍ରା ଅବସରରେ ଏକାମ୍ର ସାଂସ୍କୃତିକ ପ୍ରକାଶନି ପକ୍ଷରୁ ଆୟୋଜିତ ହେବାକୁ ଥିବା ଶ୍ରୀ ଲିଙ୍ଗରାଜ ମହୋତ୍ସବ ପାଇଁ ପ୍ରସ୍ତୁତି ମଧ୍ୟ ଜୋରସୋର ଚାଲିଛି ।