ଭୁବନେଶ୍ୱର: ପର୍ଯ୍ୟଟନକ୍ଷେତ୍ର ଖଣ୍ଡଗିରିରେ ମାଘ ସପ୍ତମୀ ଅବସରରେ ଆରମ୍ଭ ହୋଇଛି କୁମ୍ଭମେଳା । ଦେଶର ବିଭନ୍ନ କାଶୀ, ହରିଦ୍ୱାର, ବନାରସ ନାସିକ ଆଦି ସ୍ଥାନରୁ ଶତାଧିକ ସାଧୁଙ୍କ ସମାଗମ ହୋଇଛି । ଐତିହ୍ୟସ୍ଥଳୀରେ ଥିବା ପବିତ୍ର ରାଧାକୁଣ୍ଡରେ ଜଳ ଆଣି କଳସ ବସାଇବା ସହ ଧୂନି ସ୍ଥାପନ କରିଛନ୍ତି । ଅନ୍ୟପଟେ ମା’ ବାରଭୂଜା ପୀଠରେ ହନୁମାନ ମନ୍ଦିର ସମ୍ମୁଖରେ ୪୦ ବର୍ଷ ଧରି ଆୟୋଜିତ ହୋଇ ଆସୁଥିବା ରାମଚରିତ ମାନସ ପାଠ ଆରମ୍ଭ ହୋଇଛି ।
ତେବେ ପବିତ୍ର ସପ୍ତମୀ ଅବସରରେ ବିଶ୍ୱଶାନ୍ତି ମହାଯଜ୍ଞ ନିମନ୍ତେ ଅଙ୍କୁରାରୋପଣ କରାଯାଇଥିବାବେଳ ଅଷ୍ଟମୀରେ କଳସ ଯାତ୍ରା ସହ ବିଶ୍ୱଶାନ୍ତି ମହାଯଜ୍ଞ ଆରମ୍ଭ ହେବ ବୋଲି ମା’ ବାରଭୂଜା ମ୍ୟାନେଜିଂ ଟ୍ରଷ୍ଟର କୋଷାଧ୍ୟକ୍ଷ ଦୀନବନ୍ଧୁ ଜେନା ସୂଚନା ଦେଇଛନ୍ତି । ତେବେ ୧୫ ତାରିଖ ଦିନ ସାଧୁ ସମ୍ମିଳନୀ ଏବଂ ଧର୍ମସଭା ଅନୁଷ୍ଠିତ ହେବ । ୧୬ ତାରିଖ ଦିନ ବିଶ୍ୱଶାନ୍ତି ମହାଯଜ୍ଞର ପୂର୍ଣ୍ଣହୂତି ଅନୁଷ୍ଠିତ ହେବ । ତେବେ ପ୍ରତିବର୍ଷ ପରି ଅଗ୍ନ ଉତ୍ସବ ମଧ୍ୟ ମେଳାର ଆକର୍ଷଣ ରହିବ ।
