ନୂଆଦିଲ୍ଲୀ: ମଙ୍ଗଳବାର ୨୩ତମ ଭାରତ-ଆସିଆନ ଶିଖର ସମ୍ମିଳନୀରେ ଉଦବୋଧନ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାରା ବିଶ୍ୱରେ ବୃଦ୍ଧି ପାଉଥିବା ଅନିଶ୍ଚିତତା ମଧ୍ୟରେ ପାରସ୍ପରିକ ସହଯୋଗ ଏବଂ ସହଭାଗୀତା ଉପରେ ଗୁରୁତ୍ୱାରୋପ କରିଛନ୍ତି। ପ୍ରଧାନମନ୍ତ୍ରୀ ସ୍ପଷ୍ଟ ଭାବେ କହିଛନ୍ତି ଯେ ଏହି କ୍ଷେତ୍ରର ଭବିଷ୍ୟତ ପ୍ରତିଯୋଗିତା ଦ୍ୱାରା ନୁହେଁ, ବରଂ ପାରସ୍ପରିକ ସହଯୋଗ ଦ୍ୱାରା ନିର୍ଣ୍ଣୟ କରାଯିବା ଉଚିତ। ବିଶ୍ୱର ପ୍ରାୟ ଏକ ଚତୁର୍ଥାଂଶ ଜନସଂଖ୍ୟା ପ୍ରତିନିଧିତ୍ୱ କରୁଥିବା ଏହି କ୍ଷେତ୍ର ପାଇଁ ଶାନ୍ତି, ସ୍ଥିରତା ଏବଂ ସ୍ପଷ୍ଟତା ଅତ୍ୟନ୍ତ ଜରୁରୀ। ସେ ରାଷ୍ଟ୍ରପତି ମାର୍କୋସଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ ଭାରତର ବିକାଶ ଏବଂ ଆସିଆନର ସମୃଦ୍ଧି ଗଭୀର ଭାବରେ ଜଡିତ। ୨୦୧୪ ପରଠାରୁ ଲୋକ ସମ୍ପର୍କକୁ ସୁଦୃଢ଼ କରିବା ପାଇଁ ପ୍ରାୟ ୨୫୦ ଟି ଦ୍ରୁତ-ପ୍ରଭାବଶାଳୀ ପ୍ରକଳ୍ପ ଆରମ୍ଭ କରାଯାଇଛି । ଏବଂ ୧୦ ହଜାରରୁ ଅଧିକ ଦକ୍ଷତା ବିକାଶ ଛାତ୍ରବୃତ୍ତି ପ୍ରଦାନ କରାଯାଇଛି। ପୂର୍ବ କିଛି ବର୍ଷ ଗୁଡ଼ିକରେ ବିଶ୍ୱ ସାମ୍ନା କରିଥିବା ସଙ୍କଟ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଆଜି ବିଶ୍ୱକୁ ଯାହା ସବୁଠାରୁ ଅଧିକ ଆବଶ୍ୟକ ତାହା ହେଉଛି ଶାନ୍ତି। ସେପଟେ ପ୍ରଧାନମନ୍ତ୍ରୀ ଆଜି ଅପରାହ୍ନ ୪ଟାରେ ମନିଲାରେ କ୍ୱାଡ୍ ନେତା ମାନଙ୍କ ବୈଠକରେ ଯୋଗ ଦେବେ। ଏହି ବୈଠକରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଜାପାନ ପ୍ରଧାନମନ୍ତ୍ରୀ ଏବଂ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ମଧ୍ୟ ଯୋଗଦେବାର କାର୍ଯ୍ୟକ୍ରମ ରହିଛି।










