ଗର୍ଭବତୀ ପତ୍ନୀକୁ ମେଡିକାଲ ନେଉଥିଲେ ସ୍ୱାମୀ, ରାସ୍ତାରେ ଜଳିଗଲା କାର

ହାଇଦ୍ରାବାଦ: ହଠାତ ନିଆଁ ଲାଗିଯିବା ଫଳରେ କାର ଭିତରେ ସ୍ୱାମୀଙ୍କ ସହ ଜଳିଗଲେ ଗର୍ଭବତୀ । ଦମ୍ପତିଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲକୁ ନେବା ବେଳେ ଉଭୟଙ୍କର ମୃତ୍ୟୁ ଘଟିଛି । କେରଳର କନ୍ନୁର ଜିଲ୍ଲାରେ ଏପରି ଏକ ଅଭାବନୀୟ ଘଟଣା ସାମ୍ନାକୁ ଆସିଛି । କାରରେ ଦମ୍ପତିଙ୍କ ସମେତ ମୋଟ ୬ଜଣ ଯାତ୍ରା କରୁଥିଲେ । ବେଳେ ଅନ୍ୟ ୪ଜଣ ସୌଭାଗ୍ୟବଶତଃ ରକ୍ଷା ପାଇଯାଇଥିବା ବେଳେ ଦମ୍ପତିଙ୍କର ମୃତ୍ୟୁ ହୋଇଛି । ପ୍ରତ୍ୟେକ୍ଷଦର୍ଶୀଙ୍କ ସୂଚନା ଅନୁସାରେ, ଏକ ସୁଜୁକି କାରରେ ଆଜି ସକାଳେ ଦମ୍ପତିଙ୍କ ସମେତ ମୋଟ ୬ଜଣ ଯାତ୍ରା କରୁଥିଲେ । ହଠାତ ଚଳନ୍ତା କାରରେ କୌଣସି କାରଣରୁ ନିଆଁ ଲାଗି ଯାଇଥିଲା । କାରଟି ଜଳିବାକୁ ଲାଗିଥିଲା ବେଳେ ଅନ୍ୟ ୪ଜଣ ସେଥିରୁ ବାହାରିବାରେ ସକ୍ଷମ ହେବା କାରଣରୁ ବର୍ତ୍ତି ଯାଇଛନ୍ତି । ହେଲେ ଏହି ଦମ୍ପତି ସେଥିରୁ ବାହାରି ପାରିନିଥିଲେ । କିଛି ସମୟ ପରେ ସ୍ଥାନୀୟ ଲୋକେ ଉଭୟଙ୍କୁ ଜଳନ୍ତା କାରରୁ ଉଦ୍ଧାର କରିଥିଲେ ସୁଦ୍ଧା ଉଭୟଙ୍କ ଅବସ୍ଥା ସଙ୍କଟାପନ୍ନ ଥିଲା । ହସ୍ପିଟାଲ ନେବା ବାଟରେ ଉଭୟ ସ୍ୱାମୀ ଓ ତାଙ୍କ ଗର୍ଭବତୀ ପତ୍ନୀଙ୍କ ମୃତ୍ୟୁ ହୋଇଥିଲା ।