ସିଲବାସା: ଦାଦରା ଓ ନଗର ହବେଲିର ସିଲବାସାରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ଜଣେ ୧୯ ବର୍ଷୀୟା ଯୁବତୀଙ୍କୁ ତଙ୍କ ମାଆଙ୍କ ପୂର୍ବତନ ଲିଭ୍-ଇନ୍ ପାର୍ଟନର ଛୁରୀ ଭୁସି ହତ୍ୟା କରିଥିବା ଅଭିଯୋଗ ହୋଇଛି । ପୁଲିସ ଏହି ଘଟଣାର ପ୍ରାଥମିକ ତଦନ୍ତ କରି ରବିବାର ପ୍ରକାଶ କରିଛି ଯେ ମୃତ ଯୁବତୀ ଜଣକ ହେଉଛନ୍ତି ଅଙ୍କିତା ରାଜପୁତ । ଏହି ଘଟଣାରେ ଅଭିଯୁକ୍ତଙ୍କୁ ଗିରଫ କରାଯାଇ ସାରିଛି । ଅଙ୍କିତାଙ୍କ ମାଆ ତାଙ୍କ ଲିଭ୍-ଇନ୍ ପାର୍ଟନରଙ୍କ ସହ ଗୋଟାଏ ଘରେ ରହୁଥିବା ବେଳେ ଅଙ୍କିତା ବି ସେମାନଙ୍କ ସହ ରହୁଥିଲେ । ଅଭିଯୁକ୍ତଙ୍କ ଅସଭ୍ୟ ବ୍ୟବହାର କାରଣରୁ ମାଆ ଓ ଝିଅ ବ୍ୟତିବ୍ୟସ୍ତ ହୋଇ ସିଲବାସା ଫେରି ଯାଇଥିଲେ ।
ପୁଲିସ ଅଧିକାରୀ ଜଣକ କହିଛନ୍ତି ଯେ ଅଭିଯୁକ୍ତ ଶନିବାର ଦିନ ମହିଳାଙ୍କୁ ଖୋଜି ଖୋଜି ଆସି ତାଙ୍କ ଘର ବାହାରେ ପହଞ୍ଚିଥିଲେ । ସେ ମହିଳାଙ୍କୁ କବାଟ ଖୋଲିବାକୁ କହିବା ସତ୍ତ୍ୱେ ମହିଳା କବାଟ ଖୋଲିନଥିଲେ । ଭିତର ପଟୁ କବାଟ କିଳି ଘରେ ପଶି ରହିଥିଲେ । ଫଳରେ ଅଭିଯୁକ୍ତ ଜଣକ ରାଗରେ ଆସି ମହିଳାଙ୍କୁ ଓଲଟା ବାହାର ପଟରୁ କବାଟ ଦେଇ ଦେଇଥିଲେ । ମହିଳାଙ୍କ ଝିଅ ସେତିକିବେଳେ ଟ୍ୱିସନ୍ରୁ ଫେରୁଥିଲେ । ସେ ଅଭିଯୁକ୍ତଙ୍କୁ ତାଙ୍କ ଘର ବାହାରେ ଦେଖିବା ପରେ ଦୁହିଁଙ୍କ ମଧ୍ୟରେ ଝଗଡ଼ା ହୋଇଥିଲା । ଉଭୟଙ୍କ ମଧ୍ୟରେ ବଚସା ହୋଇ କଥା ଏତେ ବଡ଼ ହୋଇ ଯାଇଥିଲା ଯେ ଅଭିଯୁକ୍ତ ଏକ ଛୁରୀରେ ଯୁବତୀଙ୍କୁ ଆକ୍ରମଣ କରିଥିଲେ ଓ ଯୁବତୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା ।
