ମର୍ମନ୍ତୁଦ ସଡକ ଦୁର୍ଘଟଣା : ଶରୀରରୁ ଅଲଗା ହେଲା କାର୍‌ ଚାଳକ ମୁଣ୍ଡ

ନୂଆଦିଲ୍ଲୀ : ଗତକାଲି ସନ୍ଧ୍ୟା ସମୟରେ ପଶ୍ଚିମ ଦିଲ୍ଲୀର କିର୍ତ୍ତି ନଗର ଅଞ୍ଚଳରେ ଏହି ଦୁଃଖଦ ଘଟଣା ଘଟିଛି। ଦୁଇ କାର୍‌ ମଧ୍ୟରେ ହୋଇଥିବା ଭୟଙ୍କର ଦୁର୍ଘଟଣାରେ ଏକ କାର୍‌ ଚାଳକଙ୍କ ମୁଣ୍ଡ ଶରୀରରୁ ଅଲଗା ହୋଇ ଯାଇଛି। ମୃତକ ୨୭ ବର୍ଷୀୟ ବଂଶ ଜାଁଲି ବୋଲି ଜଣାଯାଇଛି। ବଂଶ ଏକ କମ୍ପାନୀରେ ଜଣେ ମାର୍କେଟିଂ ଏଜେଣ୍ଟ ଭାବେ କାମ କରୁଥିଲେ। ଘରେ କେବଳ ତାଙ୍କ ମା’ ଥିବା ଜଣାଯାଇଛି। ସୂଚନା ଅନୁଯାୟୀ, ପ୍ରଥମେ ଦ୍ରୁତ ଗତିରେ ଆସୁଥିବା ବଂଶଙ୍କ କାର୍‌ ଡିଭାଇଡରରେ ପିଟି ହୋଇ ଅନ୍ୟ ଏକ କାର୍‌କୁ ଧକ୍କା ଦେଲା। ଏହି ଧକ୍କା ଏତେ ଜୋରରେ ଥିଲା ଯେ, ଏହାପରେ କାର୍‌ଟି ଉପରକୁ ଉଠିଯାଇ ରାସ୍ତାର ଅପର ପାର୍ଶ୍ୱରେ ଛିଟିକି ପଡ଼ିଲା।ସ୍ଥାନୀୟ ଲୋକେ ତୁରନ୍ତ କାର୍‌ ନିକଟରେ ପହଞ୍ଚିବା ବେଳେ କାର୍‌ ଭିତରେ ବଂଶଙ୍କ ରକ୍ତ ଜୁଡ଼ୁବୁଡ଼ୁ ଶରୀର ଥିବା ବେଳେ ତାଙ୍କ ମୁଣ୍ଡ ଅଲଗା ହୋଇ ସାରିଥିଲା। ଏହି ଭୟଙ୍କର ଦୁର୍ଘଟଣାର ଭିଡିଓ ଏବେ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି। ବଂଶଙ୍କ କାର୍‌ ସହ ପିଟି ହୋଇଥିବା ଅନ୍ୟ ଏକ କାର୍‌ର ଚାଳକ ଆହତ ହୋଇଥିବା ବେଳେ ତାଙ୍କ ଜୀବନ ରକ୍ଷା ହୋଇ ଯାଇଥିବା ଜଣାଯାଇଛି। ପୁଲିସ୍‌ ଘଟଣାସ୍ଥଳରେ ପହଞ୍ଚି କାର୍‌ରୁ ମୃତଦେହ ବାହାର କରି ବ୍ୟବଚ୍ଛେଦ ପାଇଁ ପଠାଇଛି। ଏଥିସହ ଘଟଣାର ତଦନ୍ତ ଆରମ୍ଭ କରିଛି।